¹ هون روزانِ رِه ایبارِ دیگر مردم عیسی دؤر جمعَ بوستد و چون دِ غذا نَأشتد بوخورد، عیسی خو شاگردانَ دخَأد و بوگوفت: ² «می دیل اَ جمعیتِ رِه سوجِه، چون سه روزه کی می اَمرَه ایسَد و چیزی خوردنِ رِه نَئرد. ³ اگر اَشَأنَ هَطو ویشتا اوسه کونم تا بوشود خوشَأنِ خانه، راه میَأن ضَعف کوند و جی حال شُد، چون بعضیان جی راهِ دور بأمو دَأرد.» ⁴ اونِ شاگردان تعجبِ مرَه بوگوفتد:«اَ بیابانِ میَأن چوطو اَن همه آدمِ رِه نان پیدا کونیم؟» ⁵ عیسی وَأورسه:«چن تَه نان دَأرید؟» اوشَأن جواب بدَأد:«هفتَ نان» ⁶ پس مردمَ بوگوفت زمینِ رو بینیشدْ و اون هفتَ نانَ بیگیفت، شُکر بوکود و پارَه کود و خو شاگردانَ فَأدَه تا مردمِ میَأن تقسیم بوکوند، شاگردان هم نانانَ مردمِ میَأن تقسیم بوکودد. ⁷ و چن تَه کوچدانه ماهی هم دَأشتد، اوشَأنم برکت بدَه و بفرماست تا فأدد مردمَ. ⁸ و همه تَه بوخوردد و سِئرَ بوستد، و بعدْ هفتَ زنبیل جی خورده نانانی کی زیاد بأمو بو جمعَ کودد. ⁹ اوشَأنْ حدودِ چهار هیزار نفر بود. بازن عیسی مردمَ مُرخصَ کود. ¹⁰ و فوری خو شاگردانِ اَمرَه قایقِ دورون بینیشت و بوشو منطقۀ دَلمانُوتَه. ¹¹ وختی فریسیان خبردارَ بوستد کی اون اَمون دره اویَ، جمعَ بوستد و شروع بوکودد اونِ مرَه بحث کودَأن، و جی روی امتحان اونِ جَه مُعجزه ایی عجیب بخَأستد. ¹² عیسی ایتَه آه جی تَه دیل بکشه و بوگوفت:«چره اَ زمانه مردمان مُعجزه خَأید؟ یقین بدَأنید هیچ مُعجزه ایی اوشَأنَ فَأدَه نیبه.» ¹³ پس عیسی اوشَأنَ هویَ ولَ کود و قایقَ سوارَ بوست و بوشو دریاچه اوطرف. ¹⁴ ولی شاگردانَ یادَ شو کی خوشَأنِ اَمرَه نان اوسَأند، و قایقِ دورون ویشتر جی ایتَه نان نَأشتد. ¹⁵ هوطو کی دریاچه دورون شوئون دوبود عیسی اوشَأنَ بوگوفت:«مواظب بیبیدْ، فریسیان خمیرمایه جَه و هیرودیسِ خمیرمایه جَه دوری بوکونید.» ¹⁶ شاگردان خوشأنِ ورجَه فکر بوکودد و بوگوفتد:«چون نان نَأورده دَأریم اَطو گویه» ¹⁷ عیسی بفهمست چی همدیگرَ گوفتَأن درد و اوشَأنَ بوگوفت:«چره دربارۀ اَنکی نان نَئرید همدیگرِ مرَه بحث کونید؟ آیا هنوز درک نوکونید و نفهمید؟ آیا شیمی دیل هنوز سخته؟ ¹⁸ آیا چوم دَأرید و نیدینید و گوش دَأرید و نیشتَأوید؟ آیا جی خاطر بوبورده اید ¹⁹ کی چوطو پنج تَه نانَ پنج هیزار نفرِ میَأن تقسیم بوکودم؟ چن تَه سبدْ خورده نانانِ جَه زیاد بأمو؟» شاگردان جواب بدَأد:«دوازدَه سبد» ²⁰ عیسی وَأورسه:«وختی نانَ چهار هیزار نفرِ میَأن تقسیم بوکودم چن تَه سبدْ خورده نان زیاد بأمو؟» جواب بدَأد:«هفتَ سبد» ²¹ عیسی بوگوفت:«خُ ب پس چره نفهمید؟» ²² وختی فأرسه بِیت صِیدا، ایتَه کورَ بأوردد اونِ ورجَه و التماس بوکودد کی اونِ رو دس بنه تا شفا پیدا کونه. ²³ عیسی کورِ دسَ بیگیفت و اونَ دِهِ جَه بیرون بوبورد. بعدْ اونِ چومِ رو تُف وَأسه و خو دسَ اونِ رو بنَه و وَأورسه:«چیزی دینی؟» ²⁴ اون بوجُر فَأندرست و بوگوفت:«مردمَ دار و درختِ مَأنستأن دینم کی راه شوئون درد.» ²⁵ عیسی ایبار دیگر خو دسانَ اونِ چومَأنِ رو بنَه. اون موقع اونِ چومان بازَه بوست و شفا پیدا کود و بتَأنست همه چیَه خُب بیدینه. ²⁶ پس عیسی اونَ اوسَه کود بیشه خودشِ خانه، و بوگوفت:«دهکده یَ بودورون نوشون و کسی یَ خبر ندن.» ²⁷ عیسی و اونِ شاگردان بوشود قیصریه فیلیپی دهاتانِ طرف. راه میَأن خو شاگردانِ جَه وَأورسه:«مردم مرَه کی دَأند؟» ²⁸ شاگردان جواب بدَأد:«بعضیان گوید تو یحیایِ تَعمید دهنده ایی، بعضیان گوید تو الیاسی، و بعضی هم گوید تو ایتَه جی پیغمبرانی» ²⁹ عیسی وَأورسه:«شومَأن مرَه کی دَأنید؟» پطرس جواب بدَه:«تو مسیح ایی!» ³⁰ ولی عیسی اوشَأنَ دستور بدَه کی دربارۀ اونْ هیچ کسَ چیزی نوگوید. ³¹ اونموقع عیسی اوشَأنَ بوگوفت کی چی عذابهایی کِشِه، و بوگوفت:«لازمه کی انسانِ پسر عذابِ زیادی بکشه و مُلایان و کاهنانِ اَعظم و یهودِ رهبرانْ اونَ ردَ کوند و اونَ بوکوشد، و بعدِ سه روز زندَه بِه.» ³² وختی عیسی اَ موضوعَ خیلی روشن بوگوفت، پطرس اونَ ایتَه کنار فأکشه و بوگوفت کی نوأستی اَ حرفانَ بزنه. ³³ عیسی وَأگردست و شاگردانَ فأندرست و لحنِ تُندی اَمرَه پطرسَ بوگوفت:«می جَه دورَ بون ای شیطان، چون تی اَفکار، اَفکارِ انسانیه نه افکارِ الهی.» ³⁴ اونموقع عیسی، شاگردانْ و مردمَ خو ورجَه دخَأد و بوگوفت:«اگر کسی بخأیه مرَه پیروی بوکونه وَأستی خودشَ جی خاطر بوبوره و خو صلیبَ اوسَأنه و می دونبال بأیه. ³⁵ چون هر کی بخأیه خو جانَ نجات بده، اونَ هلاکْ کونه، و هر کی خو جانَ مِرِه و انجیلِ رِه فدا بوکونه، اونَ نجات دِهه. ³⁶ چی فایده دَأره کی آدم همۀ دونیایَ بوبوره ولی خو جانَ ببازه؟ ³⁷ آدم چی تَأنه فأده تا خو جانَ دوباره فأگیره؟ ³⁸ اگر کسی اَ نسلِ زِناکار و گوناهکارِ میَأنْ می جَه و می گبانِ جَه عار بدَأره، وختی انسانِ پسر خو پئرِ جلالِ میَأنْ و فرشته یانِ مقدسِ اَمرَه اَیه، اونِ جَه عار دَأره.»