¹ فریسیان و چن تَه از یهودِ مُلایان کی اورشلیمِ جَه بأمو بود عیسی دؤر جمعَ بوستد. ² اوشَأن وختی بفهمستد کی بعضی جی اونِ شاگردان نجسِ دسْ، یعنی نوشوسته دسِ اَمرَه غذا خورد، اوشَأنَ سرزنش بوکودد. ³ چون یهودیان، مخصوصاً فریسیان تا خوشَأنِ دسَ تا آرنج نوشورد غذا نوخورد، اَنْ اوشَأنِ قدیمی رَسمه. ⁴ و وختی بازارِ جَه وَأگردد تا خوشَأنَ نوشورد چیزی نوخورد، و خیلی رسم و رسومِ دیگر، مثلاً پیاله شوستَأنْ یا کاسه و تیانِ مِسی شوستَأنَ رعایت کوند. ⁶ عیسی اوشَأنَ جواب بدَه:«اِشعیا دربارۀ شومَأن ریاکاران چقدر خوب پیشگویی بوکود وختی بوگوفت؛"اَ مردم خوشَأنِ زبانِ اَمرَه مرَه عبادت کوند ولی اوشَأنِ دیلْ می جَه دوره، ⁷ پس هَطو هَچین مرَه عبادت کوند، و اوشَأنِ تعالیم چیزی جُز اَحکامِ انسانی نییه". ⁸ شومَأن خدا حُکمَ کنار بنَه اید و بچسبسته دَأرید رسم و رسومِ انسانی یَ» ⁹ عیسی ادامه بدَه و بوگوفت:«شومَأن زرنگی اَمرَه خدا اَحکامَ کنار نیئید تا خودتانِ رسمَ بجا بأورید. ¹⁰ مثلاً موسی بوگوفت؛ "تی پئر و مارَ احترام بوکون"، و باز بوگوفت؛ "هر کس خو پئر و مارَ فُحش بده، وَأستی بیمیره". ¹¹ ولی شومَأن گوئید هر کس تَأنه خو پئر و مارَ بوگویه؛ "هر کمکی کی وَأستی شمرَه فأدَه بِمَه خدا وَسی صدقه فأدَه دَأرم"، ¹² و اَطو وَأنَألید هیچ کاری خو پئر و مارِ رِه انجام بده. ¹³ شومَأنْ خدا کلامَ باطل کونید تا خودتانِ رَسم و رسومَ کی دیگرانِ جَه تقلید بوکوده ایدْ حفظ بوکونید، شومَأن اَجور کارانْ زیاد انجام دهید.» ¹⁴ عیسی ایبار دیگر مردمَ خو ورجَه دخَأد و اوشَأنَ بوگوفت:«همه مرَه گوش بدید و سعی بوکونید اونچی کی گویمَه بفهمید، ¹⁵ هیچ چیزی کی بیرونِ جَه آدمی وجودَ داخل بِه نِتَأنه آدمَ نجس بوکونه، بلکی اونچی کی اونِ دورونِ جَه صادر بِه آدمَ نجس کونه، ¹⁶ هر کی گوشِ شنوا دَأره بیشتَأوه.» ¹⁷ وختی عیسی جی مردمِ ورجَه بوشو خانه، اونِ شاگردان اَ مثالِ معنی یَ اونِ جَه وَأورسد. ¹⁸ عیسی اوشَأنَ بوگوفت:«آیا شومَأن دیگرانِ مَأنستَأن نتَأنید درک بوکونید؟ آیا نَأنید هر چی کی خارجِ جَه آدمِ وجودِ دورون بیشه نتَأنه آدمَ نجس بوکونه؟ ¹⁹ چون خوراک آدمِ قلب و روحِ اَمرَه کاری نَئره، بلکی شِه اونِ شکمِ دورون و بعدْ دفع بِهه.» عیسی اَ حرفِ اَمرَه همۀ خوراکانَ پاک اعلام بوکود. ²⁰ عیسی ایدامه بدَه و بوگوفت:«اونچی کی آدمی وجودِ جَه بیرون اَیه، اونه کی آدمَ نجس کونه. ²¹ چون آدمی وجود و قلبِ جَه یه کی افکارِ نادوروست بیرون اَیه، یعنی افکارِ شریر، بی عفتی، دوزدی، قتل، زِناکاری، ²² طمع، شرارت، تقلب، هرزگی، حسودی، تُهمت، غرور و هرجور نادانی دیگر. ²³ اَن بَدی یان همه از دورون سرچشمه گیرد و آدمَ نجس کوند.» ²⁴ عیسی جی اویَ بوشو حوالی صور و صِیدون. بوشو ایتَه خانه دورون، ولی نخَأسته کسی خبردارَ بِه، ولی نتَأنستْ و فوری همه خبردارَ بوستد کی اون بأمو دَأره اویَ. ²⁵ هون موقع زنی کی اونِ دختر روحِ شریرَ گرفتار بو خبردارَ بوست کی عیسی اویَ ایسَه، اون سریع بأمو و عیسی یَ سُجده بوکود و اونِ پا جیر بکفت. ²⁶ اون زن کی یونانی و فینیقیۀ سوریه شین بو، التماس بوکود کی دیوَ اونِ دخترِ جَه بیرون تَأوَأدِه. ²⁷ عیسی اونَ بوگوفت:«بدَه اول زأکأن سِئرَ بود، دوروست نییِه کی زأکأنِ نانَ فَأگیریم تَأوَأدیم سَگانِ جولو.» ²⁸ اون زن جواب بدَه:«آقا دوروست گویی، ولی سگانم سُفره دؤر ایسد و خانه زأکأنِ خورده ریزانَ خورد.» ²⁹ عیسی اونَ بوگوفت:« بوشون بخانه، اَ جوابِ وَسی دیو تی دخترِ جَه بیرون بوشو» ³⁰ وختی زن بوشو بخانه، بیده کی اونِ دختر آرام تختِ رو خوفته و دیو اونَ ولَ کوده. ³¹ عیسی صورِ جَه بوشو صِیدون، و جی راهِ دِکاپولیس بوشو دریاچۀ جلیلِ طرف. ³² اویَ مَردی یَ اونِ ورجَه بأوردد کی کَر بو و جوود هم بو، عیسی جَه بخَأستد کی خو دسَ اونِ رو بنه. ³³ عیسی اون مردَ بوبورد ایتَه گوشه و خو اَنگوشتانَ بنَه اونِ گوش دورون و تُف بوکود و اونِ زبانَ لمس بوکود. ³⁴ بعدْ آسمانَ فأندرست و آهی بکشه و اونَ بوگوفت:«اِفّتَح» یعنی بازَه بون. ³⁵ فوری اونِ گوشان بازَه بوست و اونِ زبانِ مشکلم حل بوبُست و بتَأنست خوب حرف بزنه. ³⁶ عیسی مردمَ بوگوفت کی کسی یَ چیزی نوگوید. ولی هر چقدر ویشتر اوشَأنَ قدغن کوده، ویشتر خبرَ پخشَ کودد. ³⁷ مردم کی اَ مُعجزاتِ جَه تعجب بوکوده بود گوفتد:«اَ مرد هر کاری بوکوده عالیه، حتی کَرانْ ایشتَأود و لالانْ تَأند حرف بزند.»