¹ عیسی ایبار دیگر بوشو کنیسه، اویَ ایته مردای ایسَه بو کی اونِ دسْ خوشکَ بوسته بو. ² فریسیان مراقب بود تا بیدیند اگر عیسی اون مردَ روزِ سَبَّتِ رِه شفا بده، اونَ مُتهم بوکوند کی سَبَّتِ احترامَ ندَأشتِه دَأره. ³ عیسی اون مردِ علیلَ بوگوفت:«بیا اَ جولو بِئس» ⁴ و بعد خو مخالفانَ بوگوفت:«روزِ سبَّت دورون کَ ی تَه بهتره؟ خوبی کودَأن یا بدی کودَأن؟ جانَ نجات دَئَن یا جان فَأگیفتَأن؟» اوشَأن ساکت بِئسَأد. ⁵ عیسی غَضبِ اَمره اوشَأنَ فَأندِرِستْ چره کی اوشَأنِ سنگ دیلی وَسی ناراحتَ بوستِه بو، بعدْ اون مردایَ بوگوفت:«تی دسَ درازَ کون» اونم خو دسَ درازَ کود، و اونِ دس شفا پیدا کود. ⁶ هو لحظه فریسیان بوشود بیرون تا هیرودیس طرفدارانِ اَمرَه نقشه دیچیند کی چوطو وَأستی عیسیَ بوکوشد. ⁷ عیسی خو شاگردانِ اَمرَه بأمو دریا کنار و خیلی جی جلیلیان اونِ دونبال سر بأمود. ⁸ خیلیان هم کی اونِ کارانِ خبرَ بیشتَأوسته بود جی یهودیه و اورشلیم و اَدومیّه و رودِ اُردنِ اوطرف و جی حوالی صور و صیدون بأمود اونِ ورجَه. ⁹ عیسی خو شاگردانَ بوگوفت کی ایته کرجی اونِ رِه حاضرَ کوند تا مردم اونِ رو هجوم نوبورد، ¹⁰ چون عیسی خیلیانَ شفا دَئِه هَنه وَسی هر کسی کی دردی دَأشته اونِ طرف اَموئه تا اونَ لمس بوکونه و شفا پیدا کونه. ¹¹ کسانی کی ارواحِ شریرَ گرفتار بود وختی عیسی یَ دِئِد کفتِد زمینِ رو و ارواحِ شریرْ اوشَأنِ زبانِ جَه فریاد کودد:«تو خدا پسری.» ¹² و عیسی تأکید اَمرَه اوشَأنَ اَمر کوده کی اَنَ کسی یَ نوگوید. ¹³ بعدْ عیسی بوشو ایته تپه رو و هر کسی یَ خواسته خو ورجَه دِخَأدِه و اوشَأنم شوئِد اونِ ورجَه. ¹⁴ و دوازده نفرَ انتخاب بوکود تا اونِ اَمرَه بِئسِد کی اوشَأنَ مردمِ تعلیم دَئَنِ وَسی اوسَه کونه. ¹⁵ و قدرت بِدَأرد کی ارواحِ شریرَ بیرون تَأوَأدد و مریضانَ شفا بِدد. ¹⁶ دوازدَه نفری کی انتخاب بوکود اَشَأن بود؛ شمعونْ کی اونَ «پطرس» نام بنَه. ¹⁷ و یعقوبْ زِبِدی پسر و اونِ برَأر یوحنا کی اوشَأنَ «رَعدِ پسرَان» نام بنَه. ¹⁸ و آندریاس و فیلیپُس و بَرتولما و مَتی و توما و یعقوبْ حَلفی پسرْ و تِدّی و شمعونِ فَدایی. ¹⁹ و یهودا اِسخَریوطی کی آخرسر اونَ تسلیم بوکود. ²⁰ وختی دوباره وَأگردستد بخانه بازم مردم جمعَ بوستد، طوری بوبُست کی دِ نِتَأنستد غذا بوخورد. ²¹ وختی اونِ قؤم و خویش اَ حرفانَ بیشتَأوستد بأمود اونِ دونبالْ، چون خیال بوکودد کی اون دیوانَه بوسته. ²² یهودِ کاتبان هم کی جی اورشلیم بأمو بود گوفتد:«شیطان بوشو دَأره اونِ جِلد دورون و شیطانِ کمک اَمرَه یه کی دیوأنَ بیرون تَأوَأده.» ²³ عیسی اوشَأنَ دِخَأد و بوگوفت:«چوطو اِمکان دَأره کی شیطان خودش، خودشَ بیرون تَأوَأدَه؟ ²⁴ اگر ایته مملکت دورون تفرقه دکفه اون مملکت پایدار نمَأنه. ²⁵ و هر وخت ایته خانواده دورون اختلاف دکفه اون خانواده از هم پاشِه. ²⁶ و اگر شیطانم خو مرَه جنگ بوکونه و اونِ میَأن اختلاف دِکِفه نِتَأنِه دَوام بأوره و هلاک بِهِه. ²⁷ و هیچکی نِتأنِه ایته آدمِ قوی خانه دورون بیشِه و اونِ خانه اسبابَ بودوزانِه، مگر اَنکی اول اون مردَ دَوَدِه و بعدْ اونِ خانه یَ غارت بوکونه. ²⁸ اَنَ شمره بوگویم هر گوناهی کی انسان انجام بِده و هر کُفری کی بوگویه قابلِ بخششه، ²⁹ ولی روح القدسَ کُفر بوگویه تا به اَبد آمرزیده نیبه و عذابِ جاودانی مُستحَقه.» ³⁰ عیسی اَ حرفَ بزَه چون بعضیان نفهمستد اون روح القدسِ قدرتِ اَمرَه اَ کارانَ کونه و گوفتد:«اونْ روحِ شریر دَأره.» ³¹ بعدْ عیسی مار و اونِ برَأرأن بأمود و چون خانه دورون شلوغ بو بیرون بِئسَأد و اینفرَ اوسه کودد تا اونَ خبر بده. ³² وختی عیسی مردمِ میَأن نیشته بو اونَ خبر بِدَأد کی:«تی مار و تی برَأرَأن بیرون تی رأفا ایسَد» ³³ عیسی جواب بده:«می مار کیه؟ می برأرأن کیسِد؟» ³⁴ بعد اوشَأنی کی اونِ دؤر و وَر نیشته بودَ فَأندِرِست و بوگوفت:«اَشَأنْ می مار و می برأراند، ³⁵ هر کسی خدا اراده یَ انجام بده، اونْ می مارْ و می برَأره»