¹ صبحِ زود، کاهنانِ اَعظم، مشایخ و یهودِ مُلایان و همۀ شورایِ اَعضا جلسه تشکیل بدَأد و عیسی یَ دس بسته بوبوردد پیلاطُسَ تحویل بدَأد. ² پیلاطُس عیسی جَه وَأورسه:«آیا تو یهودِ پادشاهی؟» عیسی جواب بدَه:«تو بوگوفتی کی ایسم.» ³ کاهنانِ اَعظم، خیلی اِتهامات عیسی یَ بزَد. ⁴ پیلاطس باز اونِ جَه وَأورسه:«چره جواب ندی؟ بیدین چقدر تِرِه اِتهام زند.» ⁵ ولی عیسی چیزی نوگوفت، طوری کی پیلاطُس تعجب بوکود. ⁶ پیلاطُس عادت دَأشته هر عیدِ فصحِ رِه ایتَه زندانی آزادَ کونه، هر زندانی ایی کی مردم بخَأسته بِد. ⁷ اون زمانْ مردی «باراباس» نام کی یاغیانِ دیگرِ مرَه ایتَه آشوبِ دورون آدم بوکوشته بو زندانِ دورون ایسَه بو. ⁸ مردم بوشود پیلاطُسِ ورجَه و اونِ جَه خواهش بوکودد کی طبقِ معمولِ هر سال ایتَه زندانی اوشَأنِ رِه آزادَ کونه. ⁹ پیلاطُس وَأورسه:«آیا خَأئید یهودِ پادشاهَ شمرِه آزادَ کونم؟» ^{10 11} چون پیلاطُس دَأنسته کی کاهنانِ اَعظمْ عیسی مرَه حَسودی کوند و اونِ محبوبیتِ جَه ناراضی ید، و هَنه وَسی عیسی یَ تسلیم بوکوده دَأرد. ¹² پیلاطُس ایبارِ دیگر اوشَأنَ بوگوفت:«پس اون مردی مرَه کی اونَ یهودِ پادشاه دخَأنید چی بوکونم؟» ¹³ اوشَأن فریاد بزد:«اونَ مَصلوب بوکون.» ¹⁴ پیلاطُس وَأورسه:«چره؟ چی بدی ایی بوکوده؟» اوشَأن خوشَأنِ صدایَ بلندترَ کودد و ویشتر فریاد بزد:«اونَ مَصلوب بوکون.» ¹⁵ پس پیلاطُسم کی خَأسته مردمَ راضی بدَأره، باراباسَ اوشَأنِ رِه آزادَ کودْ و عیسی یَ فأدَه تا شلاق بزند و بوبورد مصلوب بوکوند. ¹⁶ سربازان عیسی یَ بوبوردد کاخِ فرمانداری مَحوطه دورون و همۀ سربازانَ جمعَ کودد. ¹⁷ اوشَأنْ ایتَه سُرخ لیباس اونَ دوکودد و خارِ جَه ایتَه تاج ببافتدْ و بنَأد اونِ سرِ رو. ¹⁸ اوشَأنْ اونِ جولو تعظیم کودد و گوفتد:«زنده باد، یهودِ پادشاه.» ¹⁹ و چوبِ اَمرَه زده اونِ سرِ رو و اونِ صورتِ رو تُف فوکودد، و بعدْ مسخره بازی مرَه اونِ جولو تعظیم کودد. ²⁰ وختی خوشَأنِ کارِ جَه خستَه بوستد، اونْ سُرخ لیباسَ اونِ تنِ جَه بکدد و خودشِ لیباسانَ اونَ دوکودد و اونَ بوبوردد بیرونْ تا مصلوب بوکوند. ²¹ راه میَأن اینفرَ به نامِ شمعونْ کی قیروانِ شین بو و صحرا جَه وَأگردستَأن دوبو بیدد، اونْ اسکندر و روفُسِ پئر بو، سربازانْ اونَ مجبور بوکودد کی عیسی صلیبَ اوسَأنه. ²² سربازان عیسی یَ بوبوردد محلی به نامِ «جُلجُتا» کی اونِ معنی بِهِه «جمجمۀ سر». ²³ اوشَأنْ اونَ شرابی کی دارویی به نامِ «مُرِ» اَمرَه مخلوط بوبُسته بو فأدَد تا بوخوره کی دردَ احساس نوکونه، ولی اون قبول نوکود. ²⁴ اونموقع اونَ صلیبِ رو میخکوب بوکودد و اونِ لیباسأنِ وَسی قُرعه تَأوَأدد تا هر کس چی بوبوره. ²⁵ حدوداً نُه صبح بو کی اونَ مصلوب بوکودد. ²⁶ و تقصیرنامه ایی اونِ صلیبِ رو نصب بوکودد کی اونِ رو بینیویشته بوبُسته بو:«یهودِ پادشاه.» ²⁷ هو زمان دو تَه دوزدَ اونِ دو طرفِ جَه مصلوب بوکودد، ایتَه راستِ طرفْ ایتَه چپِ طرف. ²⁸ و اَطو اون پیشگویی به انجام برسه کی فرمایه:«اون جُزوِ خطاکاران مَحسوب بوبُست.» ²⁹ کسانی کی اویِ جَه ردَ بوستد خوشَأنِ سرَ تکان دَئِد و توهینِ اَمرَه عیسی یَ گوفتد:«تو کی خَأستی معبدَ خرابَ کونی و سه روزِ دورون دوباره چَأکونی، ³⁰ هَسَه صلیبِ جَه بیجیر بیأ و خودتَ نجات بدن.» ³¹ کاهنانِ اَعظم و یهودِ مُلایان هم اونَ مسخره کودد و همدیگرَ گوفتد:«دیگرانَ نجات دَئه، ولی نتَأنه خودشَ نجات بده، ³² اَنم مسیح و اسرائیلِ پادشاه، هَسَه صلیبِ جَه بیجیر بَأیه تا اَمَأن بیدینم و ایمان بأوریم.» و اوشَأنی کی اونِ اَمرَه مصلوب بوبُسته بود هم اونَ ناسزا گوفتد. ³³ ظهرِ موقع همه جا تاریکَ بوست و تا ساعتِ سه بعد از ظهر اِدامه دَأشته. ³⁴ اَ موقع عیسی صدایِ بلندِ اَمرَه فریاد بزَه:«ایلوئی ایلوئی، لَما سَبقْتَنی؟» یعنی «الهی الهی، چره مرَه تنها بنَأیی؟» ³⁵ بعضی کسانی کی اویَ ایسَه بود وختی بیشتَأوستد بوگوفتد:«بیدینید الیاسَ دخَأنه.» ³⁶ پس اینفر بودووَست و اِسفنجی یَ تورشِ شراب بزَه و ایتَه لوله رو بنَه و بوبورد اونِ دَهَنِ جولو تا بوخوره و بوگوفت:«وَألید بیدینیم الیاس اَیه اونَ بیجیر بأوره.» ³⁷ اونموقع عیسی فریادِ بلندی بزَه و جان بدَه. ³⁸ هَ موقع مَعبدِ مُقدسِ پرده، بوجُر تا بیجیر دوپارَه بوست. ³⁹ اَفسرِ رومی کی عیسی صلیبِ جیر بپا ایسَه بو وختی بیده کی اون چوطو بمرد بوگوفت:«واقعاً اَ مرد خدا پسر بو.» ⁴⁰ چن تَه زن هم اویَ ایسَه بود کی جی دور نگاه کودد. اوشَأنِ میَأن مریمِ مَجدَلیه، و مریمْ کوچی یعقوبُ یوشا مارْ، و سالومه ایسَه بود. ⁴¹ اَ زنان وختی عیسی جلیلِ میَأن ایسَه بو اونَ ایمان بأورده بود و اونَ کمک کودد. زنایِ زیادِ دیگری هم کی اونِ اَمرَه بأمو بود اورشلیمْ اویَ ایسَه بود. ⁴² وختی غروب بوبُست، چون فردایی روزِ سَبّت بو و اون روزْ، روزِ تهیه بو، ⁴³ شخصی یوسف نامْ کی رامِه شین بو، و ایتَه از اعضایِ شریفِ شورایِ عالی یهود هم بو، و اشتیاقِ اَمرَه خدا ملکوتَ انتظار کِشِه یه، جرأت بوکود و بوشو پیلاطُسِ ورجَه و عیسی جنازه یَ بخأست. ⁴⁴ پیلاطُس تعجب بوکود کی عیسی اَقدر زود بمرده دَأره، پس اَفسرِ مسئولِ اعدامَ بخأست و اونِ جَه وَأورسه:«آیا به هَ زودی بمرد؟» ⁴⁵ وختی اون اَفسرْ، تأئید بوکود کی عیسی بمرده دَأره، پیلاطُس وَأهأشت کی یوسف جنازه یَ بوبوره. ⁴⁶ یوسف هم ایبچه پارچۀ کتانی بِهِه و عیسی جنازه یَ صلیبِ جَه بیجیر بأورد و کتانِ اَمرَه کفن بوکود، و بنَه قبری میَأن کی سنگِ جَه بتراشته بوبُسته بو، بعدْ ایتَه پیلدانه سنگ هم قبرِ درِ جولو جَه بنَه. ⁴⁷ مریمِ مَجدَلیه و مریمْ یوشا مارْ بیدد کی عیسی جنازه یَ کَ یَ بنَأد.