¹ دو روز بمَأنسته بو به عیدِ فصح کی کاهنانِ اَعظمْ و یهودِ مُلایان فرصتِ دونبال گردستد کی حیله اَمرَه عیسی یَ دستگیر بوکوند و به قتل برسَأند. ² چون گوفتد:«اَیامِ عیدِ رِه نشَه اَ کارَ کودَأنْ چون ممکنه مردم شورش بوکوند.» ³ وختی عیسی بِیت عَنیا میَأن شمعونِ جُذامی خانه دورون سُفره سر نیشته بو، زنی گلابدانی اَمرَه جی سنگِ مَرمَرْ کی پور جی عَطرِ گرانقیمتِ سُنبلِ خالص بو، بأمو خانه دورون و عطرَ فوکود عیسی سرِ رو. ⁴ بعضیان ناراحتَ بوستد و بوگفتد:«چره اَن عَطرْ هَطو هَچین هَدر بوشو؟ ⁵ چون تَأنستیم کی اون عَطرَ ویشتر از سیصد سکۀ نُقره بوفروشیم و اونِ پولَ فقرایَ فَأدیم.» و هَنه وَسی اون زنَ سرزنش بوکودد. ⁶ ولی عیسی بفرماست:«اونَ کار ندَأرید، چره اَ کارِ خوبِ وَسی اونَ سرزنش کونید؟ ⁷ فقیران همیشه شیمی دور و وَر ایسَأد و هر وخت بخَأئید تَأنید اوشَأنَ کمک بوکونید. ولی من همیشه شیمی اَمرَه نِئسَم. ⁸ اون اونچی کی اونِ دسِ جَه بر اَمویه مِرِه بوکود و اَ کارِ اَمرَه می بدنَ پیش از وختْ دفنِ رِه آمادَه کود. ⁹ شمرَه گویم کی یقین بدَأنید هر جایِ عالم کی انجیل اِعلام بیبه، اونچی کی اَ زن مِره انجام بدَه دَأره اونِ یادبودِ وَسی نقل بِهه.» ¹⁰ بعد از اون یهودایِ اِسخریوطی کی ایتَه جی اون دوازدَه نفر بو، بوشو کاهنانِ اَعظمِ ورجَه تا عیسی یَ اوشَأنَ تسلیم بوکونه. ¹¹ اوشَأنْ وختی اَنَ بیشتَأوستد خوشحال بوستد و اونَ قؤل بدَأد کی پولی اونَ فَأدد. یهودا ایتَه فرصتِ مناسبِ دونبال گردسته تا عیسی یَ اوشَأنَ تحویل بده. ¹² اولین روزِ عیدِ فطیر کی اونِ میَأن فِصحَ ذِبح کوند، شاگردان اونَ بوگوفتد:«کَ یَ خَأیی فِصحِ شامَ تِرِه آماده کونیم؟» ¹³ عیسی دو نفر جی شاگردانَ اوسَه کود اورشلیمْ تا شامَ حاضرَ کوند و اوشَأنَ بوگوفت:«بیشید شهرْ و اینفرَ دینید کی کوزۀ آبی خو دس دَأره، اونِ دونبال بیشید. ¹⁴ و هر جایی کی بوشو صاحب خانه یَ بوگوئید؛ اُستاد گویه مهمانِ اُتاق کَ یَ نَهه تا می شاگردانِ اَمرَه فِصَحِ شامَ اویَ بوخورم؟ ¹⁵ اون ایتَه پیلدانه اُتاق کی طبقۀ دوم نَهه و فرش بوبُسته شمرَه نیشان دِهه. اویَ اَمرِه تدارک بیدینید.» ¹⁶ شاگردان بوشود شهرْ و همه چیَه هوطویی کی اون بفرماسته بو بیدد، و فِصحِ شامَ حاضرَ کودد. ¹⁷ وختی شب بوبُست، عیسی اون دوازدَه نفرِ مرَه بأمو. ¹⁸ وختی سُفره دور بینیشتد، عیسی بوگوفت:«یقین بدَأنید ایتَه جی شومَأن کی می اَمرَه غذا خوره مرَه تسلیم کونه. ¹⁹ اوشَأن ناراحتَ بوستد و ایتَه ایتَه اونِ جَه وَأورسه ئِد:«منم؟» ²⁰ عیسی جواب بدَه:«ایتَه جی شومَأن دوازدَه نفره کی هسَه خو نانَ می اَمرَه زنه کاسه دورون. ²¹ من وَأستی بیمیرم هوطو کی پیغمبران پیشگویی بوکوده بود. ولی وای بحال اونی کی مرَه مرگَ تسلیم کونه. اونِ رِه بهتر بو کی اَصلاً بودونیا نَأمو بو.» ²² وختی شام خوردد، عیسی نانَ بدس بیگیفت، اونَ برکت بدَه و پارَه کود، و بعد فأدَه اوشَأنَ و بوگوفت:«بیگیرید و بوخورید، اَن می بدنه.» ²³ و پیاله ایی بدس بیگیفت و خدایَ شُکر بوکود و اوشَأنَ فَأدَه، و همه اون پیاله جَه بوخوردد. ²⁴ و اوشَأنَ بوگوفت:«اَن می خونه عَهدِ جدیدِ رِه، و خیلیانِ وَسی فوکوده بِه. ²⁵ شمرَه گویم یقین بدَأنید دِ محصولِ اَنگورِ جَه نوخورم تا روزی کی اونَ خدا ملکوتِ دورون تازه بوخورم.» ²⁶ و بعدِ اَنکی سرودی بخأدد کوهِ زیتونِ طرف راه دکفتد. ²⁷ راه میَأنْ عیسی شاگردانَ بوگوفت:«هَ ایمشب همۀ شومَأن مرَه تنها نیئید و شید، چون بینیویشته بوبُسته؛ چوپانَ زنم و گوسفندان پراکندَه بود. ²⁸ ولی بعدِ اَنکی زنده بوستم، شؤم جلیل و شمرَه اویَ دینم.» ²⁹ پطرس عیسی یَ بوگوفت:«حتی اگر همه ترَه تنها بند من اَ کارَ نوکونم.» ³⁰ عیسی اونَ بوگوفت:«یقین بدَأن کی هَ ایمروز و هَ اِمشب قبل اَنکی خروس دو مرتبه بخَأنه، تو سه بار مرَه اِنکار کونی و گویی کی مرَه نشنَأسی.» ³¹ ولی پطرس تأکیدِ اَمرَه جواب بدَه:«حتی اگر لازم بیبه کی تی اَمرَه بیمیرمْ هیچموقع ترَه اِنکار نوکونم.» باقی شاگردانم هَ حرفَ بزد. ³² وختی محلی به نامِ جِتسیمانی یَ فأرسد، عیسی خو شاگردانَ بوگوفت:«هَ یَ بینیشینید تا من بوشوم دوعا بوکونم» ³³ و بعدْ پطرس و یعقوب و یوحنایَ خو اَمره بوبورد. عیسی کی خیلی مُضطرب و دیل تنگ بوبُسته بو ³⁴ اوشَأنَ بوگوفت:«غم و ناراحتیِ زیادِ جَه نزدیکه بیمیرم. شومَأن هَ یَ بِئسید و می اَمرَه بیدار بیبید.» ³⁵ عیسی ایبچه اویَ جَه دورَ بوست و دوعا بوکود تا اگر اِمکان دَأره اون ساعتِ پور جی درد و رنج اونِ نصیب نیبه. ³⁶ اون دوعا بوکود و بوگوفت:«ای پئر، همه چیز تِرِه ممکنه، اَن پیاله یَ می جَه دورَ کون، ولی نه به می خواست، بلکی به تی اِراده.» ³⁷ عیسی وَأگردست و بیده کی اوشَأن خوفتد. پس پطرسَ بوگوفت:«ای شمعون خوفته ایی؟ آیا نتَأنستی ایتَه ساعت می اَمرَه بیدار بِئسی؟ ³⁸ بیدار بیبید و دوعا بوکونید تا آزمایشِ میَأن دنکفید. روح مایله ولی جسم ناتوان.» ³⁹ عیسی ایبار دیگر بوشو و بازم هون دعایَ بوکود، ⁴⁰ وختی وَأگردست بیده بازم اوشَأن خوفتد، اوشَأنْ گیجِ خواب بود و نَأنستِد چی جوابی بدد. ⁴¹ وختی سومین بارِ رِه وَأگردست اوشَأنَ بوگوفت:«آیا بازم خوفته اید و استراحت کونید؟ دِ وَسته، ساعت مُقرر فَأرسه دَأره، هَسَه انسانِ پسرْ گوناهکارانِ دسْ تسلیم بِهه. ⁴² ویریزید وَأستی بیشیم. اونی کی مرَه تسلیم کونه هَسَه فأرسه.» ⁴³ عیسی حرف هنوز تومامَ نوبوسته بو کی یهودا، ایتَه جی اون دوازدَه شاگرد، گروهِ زیادی اَمرَه کی همه تَه شمشیر و چوماق دَأشتد بأمو، اون گروهْ کاهنانِ اَعظم و یهودِ مُلایانِ طرفِ جَه مأمور بوبُسته بود. ⁴⁴ یهودا اوشَأنَ بوگوفته بو:«هر کیَه من مأچی بدَم، بدَأنید هونه، هونَ وَأستی بیگیرد و مراقبتِ کاملِ اَمرَه بوبورید.» ⁴⁵ پس هَطو کی یهودا فأرسه اویَ، فوری بوشو عیسی ورجَه و بوگوفت:«ای اُستاد» و اونَ مأچی بدَه. ⁴⁶ اوشَأنم فووَستد عیسی سرْ و اونَ بیگیفتد. ⁴⁷ هَ موقع ایتَه جی حاضرین خو شمشیرَ بیرون بأورد و کاهنِ اعظمِ غلامَ شمشیرِ اَمرَه بزَه و اونِ گوشَ وَأوِه. ⁴⁸ عیسی اوشَأنَ بوگوفت:«مگر من دوزد و یاغی ام کی اَطو شمشیر و چوبِ اَمرَه بأمو اید مرَه بیگیرد؟ ⁴⁹ من هر روز معبدِ دورون شیمی ورجَه تعلیم دَئم و مرَه نیگیفتید، ولی لازمه همۀ اَشَأن اِتفاق دکفه تا خدا کلامِ پیشگویی انجام بیگیره.» ⁵⁰ اَ گیر و دارِ میَأنْ همۀ اونِ شاگردان اونَ تنها بنَأد و فرار بوکودد. ⁵¹ ایتَه جوانْ کی فقط ایتَه پارچۀ کتانی خو دور بیگیفته بو اوشَأنِ دونبال بوشو. اوشَأن سعی بوکودد اونَم بیگیرد، ⁵² ولی اون جوان اونچی کی خو دور بیگیفته بویَ ولَ کود و هوطو لُخت اوشَأنِ دسِ جَه فرار بوکود. ⁵³ پس عیسی یَ بوبوردد کاهنِ اعظمِ خانه، و سریع همۀ کاهنانِ اَعظم و یهودِ مُلایان و قؤمِ شِیخَأن اویَ جمعَ بوستد. ⁵⁴ پطرس دورادور اونِ دونبال بأمو و بوشو کاهنِ اَعظمِ خانه حیاطِ دورون. و خدمتکارانِ ورجَه بینیشت و آتشِ کنار خورَه گرمَ کود. ⁵⁵ کاهنانِ اَعظم و شورایِ یهودِ اعضاء سعی کودد ایتَه مدرک بر علیه عیسی پیدا کوند تا اونَ بوکوشد، ولی هیچی پیدا نوکودِدْ. ⁵⁶ چن نفر هم شهادتِ دوروغ بدَأدْ ولی اوشَأنِ حرفان همدیگرِ اَمرَه ایتَه نوبو. ⁵⁷ چن نفر هم ویریشتد و شهادتِ دوروغ بدَأد و بوگوفتد: ⁵⁸ «اَمَأن بیشتَأوستیم کی گوفته؛ من اَ معبدَ کی انسانِ دسِ اَمرَه چَأکوده بوبُسته خرابَ کونم و سه روزِ میَأن ایتَه معبدِ دیگر چَأکونمْ کی انسانِ دسِ اَمرَه چَأکوده نوبوسته بِه.» ⁵⁹ ولی اوشَأنِ شهادتم همدیگرِ اَمرَه ایتَه نوبو. ⁶⁰ بعدْ کاهنِ اَعظم ویریشت و شورا حضورِ جَه عیسی جَه وَأورسه:«جواب ندی؟ اَشَأن چی ید کی دربارۀ تو شهادت دهد؟» ⁶¹ ولی عیسی ساکت بِئسَه و هیچ جوابی ندَه. بازم کاهنِ اَعظم اونِ جَه سوال وَأورسه:«آیا تو مسیحْ، خدایِ متبارکِ پسری؟» ⁶² عیسی بوگوفت:«من ایسمْ، و تو ایتَه روز انسانِ پسرَ دینی کی خدایِ قادرِ راستِ طرف نیشته و اَبرایِ آسمانِ رو اَیه.» ⁶³ در اَنموقع، کاهنِ اَعظم خو لباسَ چاک بزَه و بوگوفت:«دِ چره شاهد خَأئید؟ ⁶⁴ خودتان اونِ کُفرَ بیشتَأوستید، چی مَصلحت دَأنید؟» پس همۀ شورا حُکم بوکودد کی اون وَأستی اِعدام بیبه. ⁶⁵ بعضیان اونِ رو تُف فوکودد و اونِ چومَأنَ دوَستد و موشتِ اَمرَه اونَ زئِد و گوفتد:«اگر پیغمبری بوگو، کیی ترَه بزَه.» خدمتکاران هم اونَ زَئِد. ⁶⁶ پطرس هنوز حیاطِ میَأن ایسَه بو کی ایتَه جی کاهنِ اَعظمِ کنیزان بأمو ⁶⁷ و وختی پطرسَ بیده کی خورَه گرمَ کونه، اونَ فأندرست و بوگوفت:«تو هم عیسایِ ناصری اَمرَه ایسَه بی!» ⁶⁸ پطرس اِنکار بوکود و بوگوفت:«نَأنم و نفهمم چی گویی.» و بوشو دالانِ میَأن، هون موقع خروس بخأد. ⁶⁹ اون کنیز دوباره پطرسَ بیده و دیگرانَ بوگوفت:«اَنم ایتَه جی اوشَأنه» ⁷⁰ بازم پطرس اِنکار بوکود. کمی بعدْ دیگران کی آتشِ دور ایسَه بود پطرسَ بوگوفتد:«تونم ایتَه از عیسی شاگردانی، چون تی لَهجه جلیلیه.» ⁷¹ ولی پطرس لعنت بوکود و خو جانَ قسم بوخورد و بوگوفت:«من اَ شخصَ کی شومَأن دربارۀ اون گب زنید نشنَأسم.» ⁷² دوروست هون موقع خروس دومین بارِ رِه بخَأد. پطرس یاد بأورد کی عیسی اونَ بوگوفته بو:«پیش از اَنکی خروس دو بار بخَأنه تو سه بار مرَه اِنکار کونی و گویی کی مرَه نشنَأسی.» پطرسْ وختی اَ حرفَ یاد بأوردْ گریه بوکود.