¹ وختی عیسی معبدِ جَه بیرون شوئِه ایتَه از اونِ شاگردان اونَ بوگوفت:«ای اُستاد بیدین، چی سنگایی، عجب ساختمانی!» ² عیسی اونَ بوگوفت:«اَ پیلدانه ساختمانَ دینی؟ بدَأن کی حتی ایتَه سنگْ سنگِ رو باقی نمَأنه و همه زیر و رو بِهه.» ³ وختی عیسی بوشو کوهِ زیتونِ رو و معبدِ روبرو نیشته بو، پطرس و یعقوب و یوحنا و آندریاس خلوتی اونِ جَه وَأورسد: ⁴ «اَمرَه بوگو کِی اَ اِتفاقان دکفه؟ آیا علامتی دَأره کی اَمَأن بدَأنیم نزدیکَ بوستَأن دره؟» ⁵ عیسی اوشَأنَ جواب بدَه و بوگوفت:«مراقب بیبید کسی شمرَه گومراه نوکونه. ⁶ چون خیلیان به می نام اَید و گوید؛ "من مسیحم" و خیلیانَ گومراه کوند. ⁷ دربارۀ جنگهایی کی دور و نزدیک اتفاق دکفه ایشتَأوید، ولی هراسان نیبید، اَ چیزان وَأستی اتفاق دکفه ولی هنوز آخرِ کار فأنرسه دَأره. ⁸ ملتی ملتِ دیگرِ اَمرَه، و مملکتی مملکتِ دیگرِ اَمرَه جنگ کونه و خیلی جاهان زلزله اَیه و قحطی و شورش بِهه، و اَشَأنْ ایتَه دردِ شروعِ علامتد، دردی دردِ زایمانِ مَأنستَأن. ⁹ ولی خودتانِ مراقب بیبیدْ، چون شمرَه بورد دادگاه و کنیسه یانِ دورون شلاق زند. می وَسی شمرَه بورد حاکمان و پادشاهانِ ورجَه، ولی اَنْ فرصتی ایسه تا اوشَأنِ جولو شهادت بدید. ¹⁰ اول وَأستی انجیلْ همۀ اُمتانِ رِه موعظه بیبه، بعدْ دونیا به آخر فأرسه. ¹¹ ولی وختی شمرَه بورد دادگاه، نگران نیبید کی چی وَأستی بوگوئید، بلکی اونچی شمرَه در اون لحظه عَطا بِهه هونَ بوگوئید، چون گوینده شومَأن نیئید بلکی روح القدسه. ¹² برأر برأرَ، و پئر زأیَ تسلیم کونه تا بیمیره، زَأکأن بر علیه خوشأنِ پئر و مار ویریزد و اوشَأنَ کوشد. ¹³ همۀ مردمْ می نامِ وَسی شمرَه دوشمن دَأند. ولی هر کی تا به آخر صبر بوکونه، هون نجات پیدا کونه. ¹⁴ وختی بیده اید اون مکروهِ ویرانی کی دانیالِ نبی بوگوفته بو، جایی کی نوَأستی برپا بیبه برپایه، "اونی کی خواندَأن دره دقت بوکونه منظور چیسه"، اونموقع اوشَأنی کی یهودیه میَأن ایسَأد فرار بوکوند کوه هانِ طرف. ¹⁵ و هر کی خانه بامِ سر ایسَه بیجیر نَأیه تا خانه جَه چیزی اوسَأنه. ¹⁶ و اگر مزرعه میَأن ایسَه، وَأنگرده تا خو رختَ اوسَأنه. ¹⁷ بیچاره زنَأکأنی کی اونموقع حامله ید، یا شیرخواره زأی دَأرد. ¹⁸ فقط دوعا بوکونید اَ چیزانْ زمستانِ رِه پیش نَأیه. ¹⁹ چون اون اَیامِ رِه، چنان مُصیبتی پیش بأیه کی از هون اول کی خدا دونیایَ خلق بوکوده تا هَسَه اونِ مَأنستَأن پیش نَأمو دَأره، و هیچموقع هم پیش نَأیه. ²⁰ اگر خدا اون روزانَ کوتاه نوکوده بو، حتی ایتَه انسانم نجات پیدا نوکوده، ولی خدا خو انتخاب بوبُسته یانِ وَسی، اون اَیامَ کوتاه بوکوده. ²¹ پس هروخت کسی شمرَه بوگویه؛ "فأندر، مسیح اَیَ یا اویَ ایسَه" باور نوکونید. ²² چون مسیحان و پیغمبرایِ دروغین ظهور کوند، و جوری مُعجزه کوند و مردمَ مُنحرف کوند، کی اگر ممکن بوبُسته بِه، حتی خدا انتخاب بوبُسته یانم گومراه کودد. ²³ پس خودتانِ مراقب بیبید، من شمرَه جی همۀ اَ اُمور خبردارَ کودم. ²⁴ روزایِ بعدِ اَن مُصیبتان، خورشید تاریکَ بِه و ماه خو نورَ جی دس دِهه. ²⁵ ستاره یان جی آسمان کفد و آسمانِ قدرتْ به لرزه دکفه. ²⁶ اونموقع همۀ مردم انسانِ پسرَ دیند کی اَبرانِ رو، قدرت و جلالِ عظیمِ میَأنْ اَمون دره. ²⁷ اونْ خو فرشته یانَ اوسَه کونه تا اونِ انتخاب بوبُسته یانَ جی دونیا چهارطرف، یعنی جی زمین و آسمان جمعَ کونه. ²⁸ هَسَه اَ درسَ انجیر دارِ جَه یاد بیگیرد، وختی اونِ شاخه یان سبز و شاداب بهد و برگ اَورد، دَأنیدی کی تابستان نزدیکه. ²⁹ شومَأنم وختی اون چی کی بوگوفتمَ بیده اید، بدَأنید کی نزدیکه، بلکی حتی درِ سر ایسَه. ³⁰ شمرَه گویم یقین بدَأنید کی اَ نسل مَأنه و همۀ اَ اُمورَ دینه. ³¹ آسمان و زمین جی میَأن شِه، ولی می حرفان هیچموقع جی میَأن نیشه. ³² ولی هیچکس اون ساعت و اون روزِ جَه خبر نَئره، نه آسمانِ فرشته یان نه حتی پسرْ، فقط پئر اون ساعتِ جَه خبر دَأره. ³³ پس آماده، و هر لحظه چومبراه بیبید و دوعا بوکونید، چون نَأنید اون زمان کِی فأرسه. ³⁴ می وَأگردستَأن مردی وَأگردستَأنَ مَأنه کی بیشه سفر و خو خانه یَ خو خادمانَ بیسپاره تا هر کس خو کارَ انجام بده، و دربانَ بوگویه، "بیدار بوبون و گوش بزنگ بِئس". ³⁵ پس شومَأنم بیدار بیبید چون نَأنید کی صاحاب خانه کِی وَأگرده، سرشب، نیصفه شب، سحرِ موقع یا صبح. ³⁶ نوکونه ناخبره بَأیه و بیدینه شومَأن خوفته اید. ³⁷ و اونچی شمرَه گویم همه تَه یَ گویم، "بیدار بیبید".