¹ عیسی مثالِ اَمرَه اوشَأنِ اَمرَه گب بزَه و بوگوفت:«اینفر ایتَه تاکستان چَأکود، و اونِ دورَ حَصار بوکود، اونِ دورونم حوضی چَأکود کی اَنگورانِ آبَ بیگیره، ایتَه بُرجم اونِ دورون چَأکود. بعدْ اونَ باغبانانَ بیسپُرد و خودش بوشو سفر. ² اَنگورِ فصلْ کی فَأرسه، ایتَه جی خودشِ غُلامانَ اوسَه کود تا خودشِ سهمَ اَنگورِ محصولِ جَه فَأگیره. ³ ولی باغبانان اونَ بزَد و خالی دس وَأگردَأند. ⁴ صاحاب باغْ ایتَه غُلامِ دیگر اوشَأنِ ورجَه اوسَه کود. باغبانان اونم سنگسار بوکودد، اونِ سرَ بیشکیند و بی احترامی اَمرَه اونَ وَأگردَأند. ⁵ باز ایتَه غلامِ دیگر اوسَه کود، اوشَأنْ اونَ بوکوشتد. باز غلامانِ دیگری یَ اوسَه کود، کی بعضیانَ بزَدْ بعضیانم بوکوشتد. ⁶ آخرسر صاحاب باغ فقط اینفرِ دیگر دَأشته، و اونم اونِ عزیزِ پسر بو. پس اونَ اوسَه کود و خودشِ ورجَه بوگوفت:«اوشَأن می پسرِ احترامَ دَأرد.» ⁷ ولی وختی باغبانان بیدد کی اونِ پسر اَیه همدیگرَ بوگوفتد؛ "اَنْ وارثه، بأئید اونَ بوکوشیم تا اونِ میراث اَمی شین بیبه." ⁸ پس اونَ بیگیفتد و بوکوشتد و تاکستانِ جَه بیرون تَأوَأدد. ⁹ هَسَه تاکستانِ صاحاب چی کونه؟ اون اَیه باغبانانَ کوشه و تاکستانَ فأده دیگرانِ دس. ¹⁰ مگر خدا کلامَ نخَأده دَأرید کی بینیویشته؛ "اون سنگی کی معماران ردَ کودد، هون ساختمانِ اصلی سنگ بوبُست. ¹¹ خداوندْ اَ کارَ بوکوده و و اَمی نظرِ جَه عجیب به نظر اَیه.» ¹² اونموقع یهودِ رهبرانْ هویَ خَأستد اونَ بیگیرد، چون بفهمستد کی عیسی منظور جی باغبانانِ ظالم اوشَأن بود، ولی چون مردمِ جَه ترسِئِد اونَ ولَ کودد و بوشود. ¹³ بعداً چن نفر از فریسیان و هیرودیسِ طرفدارانْ اوسَه بوبُستد تا عیسی یَ خوشَأنِ سوالاتِ اَمرَه بدام تَأوَأدد. ¹⁴ اوشَأن بأمود و اونَ بوگوفتد:«ای اُستاد، اَمَأن دَأنیم کی تو راستگویی و کسی جَه ترسی نَئری، چون مردمِ ظاهرَ فَأندری بلکی براستی خدا راهَ تعلیم دیهی، هَسَه بفرما رومِ اِمپراطورَ مالیات فَأدَن دوروسته یا نه؟ اَمَأن وَأستی اونَ مالیات فأدیم یا فَأندیم؟» ¹⁵ عیسی متوجه بوبُست کی اوشَأن کلک زَئَن درد، هَنه وَسی بوگوفت:«چره خَأئید مرَه آزمایش بوکونید. ایتَه سکه مرَه نیشان بدید تا بوگویم.» ¹⁶ وختی سکه یَ اونَ فأدد وَأورسه:«کی نام و کی صورت سکه رو نَهه؟» جواب بدَأد:«قیصرِ نام و اونِ صورت.» ¹⁷ عیسی اوشَأنَ جواب بدَه:«اونچی کی قیصرِ شینه، قیصرَ فأدید و اونچی کی خدا شینه، خدایَ.» اوشَأنْ اَ جوابِ جَه تعجب بوکودد. ¹⁸ بعد ایتَه گروه از فِرقۀ صَدوقیان بأمود اونِ ورجَه، صَدوقیان قیامتَ قبول نَأشتد، اوشَأن عیسی جَه وَأورسد: ¹⁹ «ای اُستاد، موسی اَمرِه بینیویشت کی هر وخت کسی برأر بیمیره، و اونِ زن بی اولاد بیبه، اون وَأستی خو برأرزنَ بیگیره تا خو برأرِ رِه نسلی بوجود بأوره. ²⁰ هفتَ برأر بود کی؛ اولی زن بیگیفت و اولادی خو جَه بجا ننَه و بمرد. ²¹ بعد دومی اون زنَ بیگیفت، اونم بی اولاد بمرد و هَطو سومی. ²² و تا هفتمی، هر هفت نفر اونِ اَمرَه ازدواج بوکودد و اولادی باقی ننَأد. آخرسر اون زنم بمرد. ²³ روزِ رستاخیزِ رِه وختی اوشَأن دوباره زندَه بود، اون زنْ، کَ ی تَه زن بِهه؟ چون هر هفت نفر اونِ اَمرَه ازدواج بوکوده دَأرد.» ²⁴ عیسی اوشَأنَ بوگوفت:«آیا شیمی گومراهی اَنِ وَسی نییه کی نه کیتاب مقدسِ جَه خبر دَأرید نه خدا قدرتِ جَه؟ ²⁵ وختی انسانْ عالمِ مُرده یانِ جَه قیام کونه، نه زن گیره نه مردِ رِه بِه، بلکی آسمانِ فرشته یانِ مَأنستَأن بِهه. ²⁶ ولی دربارۀ روزِ قیامت و مُرده یانِ زندَه بوستَأن، مگر موسی کیتابِ میَأن، بوتۀ سوزانِ داستانَ نخَأده دَأرید کی خدا چوطو اونِ اَمرَه گب زنه؟ خدا فرمایه؛ "منمْ ابراهیمِ خدا و اِسحاقِ خدا و یعقوبِ خدا." ²⁷ اون مُرده یانِ خدا نییه، بلکی زنده یانِ خدایه. هَسَه بیده اید چقدر اشتباه کودَأن دَأرید.» ²⁸ ایتَه جی یهودِ مُلایان کی اَشَأنِ بحثَ بیشتَأوست و بیده کی عیسی چوطو اوشَأنَ جواب بدَه، پیش بأمو و وَأورسه:«شریعتِ کَ ی تَه حُکم مُهمتره؟» ²⁹ عیسی اونَ جواب بدَه:«مُهمترین حُکم اَنه؛ ای اسرائیل بیشتَأو، اَمی خداوند خدا، خداوندِ یکتایه. ³⁰ و وَأستی تمامی دیل و جان و فکر و، تمامی قُوّتِ اَمرَه اونَ دوس بدَأری. ³¹ دومین حُکمِ مُهم اَنه؛ تی همساده یَ خودتِ مَأنستَأن مُحبت بوکون. پیله تر جی اَن دو تَه حُکم، حُکمی وجود نَئره.» ³² اون شخص عیسی یَ بوگوفت:«ای اُستاد، دوروسته، حقیقتَ بوگوفتی و خدا ایتَه یه و جُز اون خدایی وجود نَئره، ³³ و خدایَ تمامی دیل و جان و فکر و تمامی قُوّتِ اَمرَه دوس دَأشتن، و تی همساده یَ خودتِ مَأنستَأن محبت کودَأن، همۀ هدایایِ سوختنی جَه و قربانی کودَأنِ جَه بوجُرتره.» ³⁴ وختی عیسی بیده کی اونِ جواب عاقلانه یه اونَ بوگوفت:«خدا ملکوتِ جَه دور نیئی.» دِ بعدِ اون کسی جرأت نوکوده عیسی جَه سوالی وَأورسه. ³⁵ ایتَه روز کی عیسی معبدِ دورون تعلیم دَئه اَطو بوگوفت:«چره یهودِ مُلایان گویده کی مسیح داودِ پسره؟ ³⁶ در حالی کی داود خودشْ الهامِ روح القدسِ اَمرَه گویه؛ "خداوند می خداوندَ بوگوفت؛ می راستِ طرف بینیشین تا تی دوشمنانَ تی پا جیر تَأوَأدم." ³⁷ پس وختی خودِ داود اونَ خداوند دخَأنه، اون چوطو تَأنه داودِ پسر بیبه؟» مردمم اونِ حرفانَ، خوشحالی اَمرَه گوش کودد. ³⁸ عیسی باز خو تعلیمِ میَأن مردمَ بوگوفت:«مُلایانِ جَه، کی دوس دَأرد درازه قَبا دوکوندُ راه بوشود و مردمْ اوشَأنَ بازارانِ میَأن سلام و تعظیم بوکوند دوری بوکونید، ³⁹ اوشَأنْ دوس دَأرد عبادتگاهانْ و مِهمانیانِ میَأن سرجاکش بینیشیند، ⁴⁰ و هون موقع بیوه زنأکانِ حقَ خورد ولی خودنمایی وَسی خوشَأنِ نمازَ طول دهد. اَشَأنِ جزا سخت تره.» ⁴¹ و بعدْ عیسی معبدِ دورونْ، صندوقِ بیت-المالِ روبرو نیشته بو و فأندرسته کی مردم چوطو پول تَأوَأددْ صندوقِ دورون. بعضی از ثروتمندان پولِ زیادی تَأوَأدَئِد. ⁴² اونموقع ایتَه بیوه زنِ فقیر بأمو، دو تَه سکۀ مِسیه کم اَرزش تَأوَأده صندوقِ دورون. ⁴³ عیسی خو شاگردانَ خودشِ ورجَه دخَأد و بوگوفت:«شمرَه گویم یقین بدَأنید اَن بیوه زنِ فقیر جی همۀ اوشَأنی کی صندوقِ دورون پول تَأوَأدد ویشتر فَأدَه. ⁴⁴ چون اوشَأن، اونچی کی زیاد دَأشتدَ فأدد، ولی اَن زنْ با اَنکی خودش نیاز دَأشته، هر چی کی دَأشته، یعنی همۀ خو روزی یَ فَأده.»