¹ Kuma kwakwamahalile ci munyima thzeyo Jesu ayepo tateka kuthza mumambongi no mumaumbo, kufundisha no kuamba evangeli thzo ofumu wa Nyambi. Olikumi na eli kuma akalile nenji, ² na ambuyama wamweya awa napolishiwa ku mipepo thzothzimango no ekola: Maria oyu ishiwa Magadalena, oyo watundishiwile mipepo thzothzimango mutanu nathzili; ³ Joana munu wa Kuza, mukakuendisha Heroda; Suzana; na amweya owangi, awo, kutunda ku lufumo lo, aletile yoihe afotile anu. ⁴ Anu owangi kwanaliwana, kalo anu kuma akeile kukwenji kutunda mu mbongi no mu mbongi, ayepo wambela nguli: ⁵ Mukakulima kuma athzile kukakuna mbutothzenji. Ou akunine hengeyo, thzimweya thzopo thziwela kunyonga no likun'wa athzopo thzilyatalyatiwa ko maulu, ne enyunyi yo muwilu ayopo thiilya. ⁶ Thzimweya athzopo thziwela pa mawe, ne ou thza kulile athzopo thziolaola mukonda kathzawanine mukamo. ⁷ Thzimweya kuma thzawelelile muitondo yo miondo, ne miondo thzopo thzikulela pofoci no mbuto ne miondo athzopo thzikwangisha mbuto kukula. ⁸ Unone thzimweya athzopo thziwela mumuve ouwa ne athzopo thzima kukakuma pa shita kuungi. Jesu ou amanine kuamba ei enu, ayepo kuwelela, ''Yomuhe li no matwi okuyuvisha, ayuve.'' ⁹ Afundishiwi enji awopo amuipula ci ethzo nguli thza tongola ine. ¹⁰ Ayepo amba, ''Kulimuka yo kunthzimba yo ofumu wa Nyambi kunapiwa kuwenu, unone kwa amweya naamba mumanguli, ci 'kumona amone unone amonishisha, no kuyuva ayuve unone ayuvishisha.' ¹¹ Honi ethzi nguli thzatongola ei: Mbuto liywi lya Nyambi. ¹² Awo ali kunyonga no likun'wa woliyo awo anayuvu, unone diavulosi akeya nokunatundisha iywi mumicima thzo ci lelo atawa kalo akuyoyishiwa. ¹³ Awo ali pawe woliyo awo, ou ayuva liywi alitambula kwananyanyuka. Unone kali no mithzithzi; alitawa mushikati shoshoonye, mushikati sho kuelekiwa ahuka munyima. ¹⁴ Mbuto ethzi nathziwela mu itondo yo miondo woliyo anu awa ayuva liywi, akwangishiwa ko lufumo no shihuno yo uyoye, ne oshuka wo kaukulu. ¹⁵ Unone mbuto ethzi thzawelelile mumuve ouwa, awa woliyo awo, ayuva liywi no kukulupeiwa no mucima ouwa, alikwata shuwana no kuima oshukam mukukwatelela ko mushkati shoshile. ¹⁶ Kwithsa munu yumisha lampi no kuthzithsikela mukanyungu nji kuthzipaka mushi thzo mumbeta. Unone athzipaka popakenu ci munu yomuhe oyu ingena amone mwethzi. ¹⁷ Mukonda kwithsa eshi shinaholama eshi shakukana kulimukiwa, nji eshi shili kunthzimba eshi shakukana kulimukiwa nji kukeya mumwethzi. ¹⁸ Cohoni muteelele shuwana, mukonda oyu li noshimweya, henge akupakeliwapo imweya, unone oyu napili, shinga ei anekela ci oli nayo henge akumunyanga yo. ¹⁹ Nehoni njina na aminenji po akeya kukwenji, unone katweshile kuhenyena popepi nenji mukonda anu kuma avulile. ²⁰ Ayepo ambeliwa, ''Njinoye na aminoye anemana pola, afota kukumona.'' ²¹ Unone Jesu po watawa no kuwambela ci, ''Mama na aminange awo ayuva liywi lya Nyambi no kulikwama.'' ²² Honi liyuwa limweya ayepo ingena mushisepe na afundishiwi enji, ne ayepo wambela, ''Tuthzenu musambwa limweya thzo liviya.'' Awopo afuula. ²³ Unone kwashienda ayepo lala tulo. Akopo kukeya mupepo oshokulu pa liviya, mushisepe sho akopo kuingena meyu, ne kuma akalile mu ukalu. ²⁴ Nehoni afundishiwi a Jesu po akeya kukwenji nokunamupindula, kwaamba, ''N'athsile! N'athsile! Twaafa!'' Ayepo pinduka no kuanjipela mupepo no man'ithsingi o meyu, ne ayopo ishiya, akopo kututwala. ²⁵ Nehoni ayepo waambela, ''Kulitawa kwenu kupi kuli?'' Unone kuma ayapile no kukomoka, awopo aliipaula mukci ko, ''Elye oyu, oyu twesha kutuminina shanga mupepo no meyu, ne yamuyuva?'' ²⁶ Awopo athza kulitunga lyo Mageraseni, eli lili musambwa thzo liviya litunda ku Galilea. ²⁷ Jesu ou athzile pa likanda, ayepo liwana no mukwelume yumweya oyu watundile mu mbongi oyu wakalile no mipepo thzothzimango. Mushikati shoshile kavatangile eto, kalo kakalangile munjiyo unone mukaci ko mambumbo. ²⁸ Ou amonine Jesu, ayepo kuwa no kuwela pashi paposho thzenji ne ayepo amba no liywi lyoshokulu, ''Wafota kunikwama ngepi, Jesu, mwana Nyambi omukulu? Nakulomba lelo waniipisha.'' ²⁹ Mukonda Jesu kuma atumininine mupepo oumango ci utunde koyo mukwelume. Kuma wamuingenine lolungi, kalo shanga ou namuanganga no mawenge no ifu no kumunyunga, kuma nacinaunanga mawenge no kutwaliwa mulihalaupa ko mupepo oumango. ³⁰ Nehoni Jesu ayepo ipula, ''Yowe elye?'' Ayepo amba, ''Mashwalale,'' mukonda mipepo thzothzingi kuma thzamuingenine. ³¹ Mipepo thzakwatelelile kumulomba ci lelo athzituminina kuthza mumukoti. ³² Honi ngulu thzohzngi kuma thzalyelelile oko popepi no mukinya. Mipepo thzothzimango athzopo thzimulomba ci athzitawethze thzikengene omo mungulu, ne ayepo thzitawethza. ³³ Cohoni mipepo thzothzimango athzopo thzitunda koyo mukwelume no kukengena omo munugulu, ne ethzo ngulu athhzopo thzindandumukela muliviya nokukafelamo. ³⁴ Awo nanyungu ethzo ou amonine ei yakwamahalile, awopo andandumuka no kukatongwela anu mumbongi nawa okunyonga. ³⁵ Honi anu awopo athza kukamona ei yakwamahalile, awopo akeya kwa Jesu nokunawana oyo mukwelume thzatundile mipepo thzothzimango. Kuma akalile ku maulu a Jesu, kunavata kalo kuli shuwana; awopo ayapa. ³⁶ Nehoni awa aimonine awopo awatongwela omo apolelile oyo wakalangile no mipepo thzothzimango. ³⁷ Nehoni anu wahe o litunga lyo Magareseni awopo alomba Jesu ci atunde kukwo, mukonda kuma aklile no wowa oukulu manene. Honi ayepo ingena mushisepe awopo ahuka. ³⁸ Oyo mukwelume thzatundile mipepo thzothzimango ayepo mulomba ci athze nenji, unone Jesu po muambela ci athze, kuamba ci, ³⁹ ''Ohuke kunjiyo thzoye okatongole yoihe anakukwamena Nyambi.'' Mukwelume ayepo thza, kuambela mbongi thzothzihe ei amukwamenine Jesu. ⁴⁰ Honi Jesu ou ahukile, mbunga awopo akamutambula, mukonda kuma amutatelelile. ⁴¹ Popo mwene, mukwelume olithzina lyo Jairusi, oyo wapwile yumweya wa akulu o sinagoge, ayepo keya nokunawela pashi ku maulu a Jesu, nokumulomba ci akeye kunjiyo thzenji ⁴² mukonda mwanenji ombuyama yofoci lika, mumbanda o myaka likumi na thzili, afota kufa. Jesu kushili mulikun'wa, anu owangi awopo amuthzinguluka kumukwangisha nokukokupitela. ⁴³ Hni kwakalile mbuyama wakolile luvokotwa myaka likumi na thzili ne koliyo nakupwela mali enji oahe, kalo kwithsa watweshile kumupolisha. ⁴⁴ Ayepo keya munyima thza Jesu nokunakwata ku mungundo wo shito shenji, popo mwene no luvokotwa lwenji po lupola. ⁴⁵ Jesu po amba, ''Elye oyo nanikwata?'' Wahe ou ahamulile, Pitolosi po amba, ''N'athsile, anu owangi anakuthzinguluka ne akukunyaula.'' ⁴⁶ Unone Jesu po amba, ''Kwali munu nanikwata, mukonda nalimuka ci okolo unatundu kukwange.'' ⁴⁷ Mbuyama ou amonine ci katwesha kuliholeka, ayepo keya kututuma nokunawela pashi pa posho thzenji. Mukaci ka anu wahe ayepo amba eshi namukwatela nomu napolela wanguwangu. ⁴⁸ Nehoni ayepo muambela, ''Mwanange, kulitawa koye kunakupolisha. Oende shuwana.'' ⁴⁹ Kushiamba, akopo kukeya munu kutunda kunjiyo thza mukulu o sinagoge, nokunaamba ci, ''Mwanoye onafu. Wanyandisha mufundishi kalo.'' ⁵⁰ Unone Jesu ou ayuvile ei, ayepo tawa Jairusi, ''Wayapa; olitawe pohuma, ne henge apola.'' ⁵¹ Apa akeile ku njiyo, katawethzile munu kuingena nenji, shime Pitolosi na Joani naJakobo, na tata wamwanuke na njina. ⁵² Honi wahe kuma amulilile, unone ayepo wambela ci, ''Mwalila; kafile unone onalala.'' ⁵³ Unone awopo amuheka, alimukile ci onafu. ⁵⁴ Unone ayepo mukwata ku lyoko ayepo kuwa kuamba ci, ''Mwanuke, opituke!'' ⁵⁵ Moyo wenji awopo uhuka, ne popo mwene ayepo pinduka. Ayepo watuminina ci amupe yokulya. ⁵⁶ Ashemi enji kuma akomokile, unone ayepo watuminuna ci atongwela anu ei inakwamahala.