¹ Nehoni yakwamahalile anu oku ana thzinguluka Jesu no kuteelela liywi Nyambi, wemanine pa liviya lio Gennesareta. ² Wamonine mawato eli pa liya. Mandui kwana tundumo ali no kuupa maothzi wo. ³ Jesu wengenine muwato umweya, wa Simoni, no kumulumba ci atwale wato mumeyu pakaci ko liviya. wa kongomanine no fundisha anu wato. ⁴ Ou amanishile kuwa tongwela, wa ambile kwa Simoni, "Otwale wato pashothzungi ne okalangeke maothzi oye." ⁵ Simoni watawile no kuamba, "Fumu, tuna nyanda ushiku wouhe kwithsa eshi tunawana, unone ko liywi lioye, henge ni paka maothzi mumeyu." ⁶ Ou amanishile kukwama ei, awo po aungeka ethsithzothzingi, nehoni maothzi awo ayatukile. ⁷ Aopo a tongwela ambusho, o muwato umweya ci akeye no kuna kwathsa. Akeile no kuna humbisha mawato owahe, nehoni atatekile kulowela. ⁸ Unone Simoni Pitolosi, owo amonine ei, wakinyamine ku maulu a Jesu, ko amba, "Otunde ku kwange, ame no munu wo ivi, Fumu." ⁹ Apo a komokile nawa akalile nenji wo wahe, omo awanenine ethsi ashimbile. ¹⁰ Awo kupaka Jakobo no Johani, mwana a Zebedea, awo akalile a mbusha a Simoni. Jesu wambile kwa Simoni, "wa yapa, mukonda kutunda pano henge waku yamba anu." ¹¹ Owo aletile mawato paliya, ashiile yo ine no ku mushupwela. ¹² Kwa keile ci oshili kushivaka shimweya sho maumbo, kwa kalile mukwelume wo mbumba. Ou amonine Jesu, wa welelile palupala lwenji no ku mulomba, ''Fumu ngeci wahima, oni polishe.'' ¹³ Nehoni Jesu ayepo yelula liokolyenji no kumukwata, no kuamba, ''Nahima. Opole.'' popo mwene mbumba opo thzipola. ¹⁴ Wa mutongwelile ci atongwela yumweya, unone wa mu ambelile, ''Othze, okalimonahalishe kuma pulisita no kupa shitavelo kukupolishiwa koye, kuthza kwe kwei atumenine Mushe, ci ukale upaki kuko.'' ¹⁵ Unone hiamba yenji yathzile n'uwa, no mungi o anu akeile kuna yuva nokunapolishiwa kuikola yo. ¹⁶ Unone wa tundangile kwa anu no kuthza mumbulakukutu no ku kalombela. ¹⁷ Kwa keile mumayuwa amweya athzile no kufundisha, ne kwa kalile Afalisi ni wa fundishiwi o mulao kwa kalile awo na tundelela mu maumbo o wahe a Galileya no Judeya no ku Jerusalema. Ukolo wo Fumu kalile nenji wo kupolisha. ¹⁸ Nehoni akwelume a mweya ayelulile munu okukukutela elama, nekalo afotile likun'wa lio kuingena mukaci ci na mutule posho thza Jesu. ¹⁹ Ka wanine likun'wa lio ku muleta mukonda o mungi, wa thzinine peulu thzo njiyo no ku mwingenishela peulu thzo njiyo, pa kanaha kenji, mukaci ko anu, posho thza Jesu. ²⁰ Mukumona kulitawa ko, Jesu po amba, ''mukwelume, ivi yoye ina kwateliwa.'' ²¹ An'oli no Afalisi atatekile kulipula, no kuamba, ''Elie oyu oyu amba mukapopo? Elie twesha kutetela ivi shime Nyambi yofoci.'' ²² Unone Jesu, mukulimuka ei a hayalile, atawile no kuamba kuko, ''Ine mulipaula mu micima thzenu? ²³ Shipi shoshoto kuamba, 'Ivi yoye ina kwateliwa' nji no kuamba 'o imane o ende'? ²⁴ Unone kalo muna limuka ci mwana munu ali no okolo pashi oku tetela ivi,''- wa ambile ku mukwelume okukukutela elama- ''Na kutongwela, oimane, oshimbe kanaha koye othze ku njiyo thzoye.'' ²⁵ Popo mwene waimanine posho thzo no ku shimba kanaha aka alalile. Nehone ayepo thza ku njiyo thzenji, ko shangala nyambi. ²⁶ Wahe a komokile nene nekalo ashangalile Nyambi. Ayapile, no kuamba, ''Tuna mono inu yokukomokisha lelo.'' ²⁷ Apa yapwile ei ya kwamahalile, Jesu wa tundile ko ne ayepo mona mukakutelisha o lithzina lio Levi ko na kongomana kutende thzo wa akakutelisha. Ayepo amba ku kwenji, ''Oni shupwele.'' ²⁸ Nekalo Levi we manine no kumushupwela, kushiya inu yoihe mumanyima. ²⁹ Nehone Levi wa kwamenine Jesu mukiti wo ilya kunjiyo thzenji. Ka kalile atelishi angi no anu amweya awo athzingulukile ku tafule no kulya no. ³⁰ Unone Afalisi no an'oli wo abilaelile kwa fundishiwi enji, no ku amba, ''Ine mulyela no kunwa no a kakutelisha no a ka ivi?'' ³¹ Jesu wa tawile, ''Anu a linawa kafotile muthzi; shime awo akola. ³² Kani keyelile ku nesha wo wa kenu, unone o ivi ci a humbe. ³³ A ambile ku kwenji, ''Afundishiwi a Joani na liyumenanga yo kulya nokulombela, kalo no afundishiwi o awa falisi nao nakwamanga hengeyo. Unone afundishiwi oye awo anwa no kulya.'' ³⁴ Jesu wa ambile kuko, ''ci epwa atwesha kuli yumena yo kulya nukakuyeka ko shilino? ³⁵ Unone mayuwa henge akwiya ou mukakuyeka a kushimbiwa ku kwenu, nekalo mu mayuwa ao henge akuliyumena yo kulya.'' ³⁶ Nehoni kalo Jesu wa tongwelile nguli, ''kwithsa oyu otwesha kuyatula kapinthzi ko shito sho shipe kupaka pa shito shokale. Ngeci akwame hengeyo, kenge ayatula shito shoshipe, nekalo kapinthzi katunda pa shito shipe kashakukwana pa shito shokale. ³⁷ Kwithsa oyu atwesha kupaka waine o mupe muvotela thzo shikanda shokale. Ngeci akwame hengeyo, waine o mupe henge ayatula votela thzo ikanda nekalo waine henge amwahala, ne votela thzo ikanda henge iipa. ³⁸ Unone waine o mupe a loela kupakiwa mu votela thzo ikanda yo waine o mupe. ³⁹ Kwithsa oyu munyima thzo kunwa waine wo kale afote o mupe, ne a ambe ci okale po muwa.''