1 Wahe aimanine no kumuleta Jesu kwa Pilato. 2 Atatekile kumunungelela iyamba, kuamba, "Tuna wana uyu mukwelume ashiulula anu mulitunga lyetu, no kukanisha ci apunisha Sithzale, no kuamba ci yoliyo Kilesite, Fumu." 3 Pilato ayepo mwipula, no kuamba, "Yowe Fumu wa Majuda?" Jesu ayepo mutawa no kuamba, "Ona amba." 4 Pilato ayepo amba kuma pulisita oshokulu no kumbunga, "Kaniwanine omango koyu mukwelume." 5 Unone akanine no kuamba, ali no kuanjipisha anu, no kufundisha momuhe mu Judea, kutatekela ku Galileya no kukuma kuno kushivaka." 6 Nehone Pilato ou ayuvile eyi, wepulile ci oyu mukwelume mu Galileya. 7 Ou aye wa kalile mushi thzo Heroda, wa mutuminine kwa Heroda, ou aye wa kalile ku Jerusalema mu mayuwa awo. 8 Ou Heroda wa monine Jesu, wa yangulukile nene, mokonda kwa pitile shikati shile kutunda apo amumoninine. Wa yuvile no kulupela ci amone ikomokisho ekwamiwa kukwenji. 9 Heroda wa mwipulile Jesu muyi yamba ingi. 10 Ma pulisita oshokulu no an'oli emanine, amunungelelile iyamba ingi. 11 Heroda na mathsole enji a tukanethzile Jesu no kumupopa. Nehoni amu vatekile lipai no ku muusha kalo kwa Pilato. 12 Owo heroda no Pilato akalile ambusha muliyuwa elyo, owo kushime kukwamahala ei kaliyuvile. 13 Pilato ayepo esha wahe mapulisita oshokulu no a endishi no ungi wa anu 14 no ku amba kuko, "Munani letela oyu mukwelume ci alino kuangela anu, ne mumone,yame, nina mwipulula pakaci kenu, no kuwana ci kwithsa mulandu mweiyamba muna munungelela. 15 Kwithsa, hinga Heroda ona kwama hengeyo, owo aye anamuusha kukwetu, no kumona, kwithsa eshi ana kwama shilukela lifu. 16 Nehoni ame henge naku mushiteka no ku mulukulula." 17 Nehoni Pilato wa punishile yu mweya kwa akalile mukamenga liyuwa lyo mukiti. 18 Unone awo a kuwile nene, no kuamba, "Apaiwe oyu mukwelume, mutupunishela Barabasi!" 19 Barabasi yoliyo apakiwile mu kamenga pa mifilifili no kupaa akwamine omo muliumbo. 20 Pilato wa eshile mbunga kalo, kuhima kupunisha Jesu. 21 Unone awo akuwile nene, no kuamba, mumukokotele, mumukokotela." 22 Ayepo amba kukolo mushiatu, "Ine, shinu mwine shoshimango eshi anakwama oyu mukwelume? Ame kaniwanine eshi shilukela ci afe. Nehone apa nimana kumushiteka henge ni mulukulula." 23 Unone awo atanalishile kukana no kukuwa nene, kulomba ci amukokotele. Maywi wo amushiululile Pilato. 24 Nehoni Pilato akwamine omu ahimenine awo. 25 Ayepo ulukulula oyo alombile oyu apakiwile mu kamenga mukaci ko mufilifili no kupaa. Unone aye wa lukululile Jesu kuthza mukufota ko. 26 Apo athzile nenji, awanine Simoni wa ku Sirene, atunda mu litunga elyo, no kumu yelulisha shiyako(mbinda) kushupwela Jesu. 27 Ungi wo anu, no ambuyama o kuliyuva a mulilelile, no kumushupwela. 28 Unone wa alukelile kuko, Jesu ayepo amba, Ambuyama a Jerusalema, mwa lilela, unone mulililele mwa shinda no anenu. 29 Nga mumone, mayuwa henge akeya awo aku amba, 'Alino fiyauthzi ambuyama akukana kweleka na alino mavumo akukana kweleka, no mele akukana kuyamwiwa.' 30 Kutunda apo henge akutateka kutongwela mikinya, 'Mutuwele,' no kumikinyama, 'Mututhsike.' 31 Owo awo eci akwame ei inu kushitondo ishili sho hiyu, ngepi kwakukala ku shitondo sho kukuta? 32 Akwelume amweya, eli o ikevenga, athzile nenji ci nawo aka paiwe. 33 Owo awakeile ku shivaka eshi shishiwa eci "Katendele," oko aka mukokotelile no ikevenga-yumweya kushilyo ne kalo yu mweya ku shimoho. 34 Jesu ayepo amba, "Tata, muakwatele omango wo, owo awo kalimuka eshi akwama." Epo ahuka, no kuliela eto yenji. 35 Ungi emanine kumona awo manduna athzile no ku mupopa, no ku amba, na yoisha enjenji. Naye aliyoishe aye shinda, ngecipo Kilesite wa Nyambi, aye ana anguliwa." 36 Maswalale nawo amu shomololile, no ku muhenyenena pepi, noku mupa inenga, 37 no kuamba, "Ngecipo o Fumu oma Juda, oliyoishe oshinda." 38 Kwa kalile shimonisho peulu thzenji, "Oyu yoliyo Fumu wo ma Juda." 39 Yu mweya oi kevenga ei ya pakiwile oko shamu shwaulile no kuamba, kali yowe Kilesite? oliyoishe natwe otu yoishe." 40 Unone yumweya epo muanjipela, no kuamba, "Koyapa Nyambi owe, oli mukatulo thzo foci nenji? 41 Yatwepo yashemwa twa fotahala ku kwamiwa hengeyo, owo atwe tutambula eshi shiloela ekwama yetu. Unone oyu mukwelume kwithsa shoshi mango eshi ana kwama." 42 Nehoni kalo ayepo amba, "Jesu, wani vulama mu uFumu woye." 43 Jesu ayepo amba kukwenji, "Yashemwa na kutongwela, lelo henge okala nange mu Paradise." 44 Kwa kalile ci shikati sho mutanya, no milema thzakalile litunga lyolihe kukuma pa shikati sho mutanya olungulo 45 apo liyuwa lya kalile milema. Nehoni shito sho mutempele sha yatukile pakaci. 46 Jesu ayepo lila nene no kuamba, "Tata, napaka moyo wange mumoko oye." Apa amanine kuamba eyi, ayepo ofa. 47 Muka kuhuka apa amonine eyi ya kwamahalile, wa shangalalile Nyambi, no kuamba, "Yashemwa oyu munu ka kwamine yoi mango." 48 Awo wahe akeile kuna mona eyi ya kwamahalile, ashu ulukile no kulifula pa mbando. 49 Unone wahe awo alimukile, no a mbuyama awo amu shupwelile oku Galileya, ai manenine kokule, kumona ei inu. 50 Mumone, kwakalile mukwelume olithzina lyo Josefa, oyu naye akalile kowa ka kuta. Wakalile munu wo muwa no kukena. 51 Oyu munu kana tawa muikwama no ma anekela wo. Hime atundelela ku Arimatea, liumbo lyo Majuda, kalo hime afota ufumu wa Nyambi. 52 Oyu munu, hime athzela Pilato, kukafota elama ya Jesu. 53 Ayepo ishimba, kuithzingela muito yo iwa, no kupaka mulivita lyo kukwamiwa pa liwe, wahi kalo atulekileko. 54 Lya kalile liyuwa lyo kuliloeshela, mukonda savata shime thza tateka. 55 Ambuyama awa akeile na Jesu kutundelela ku Galileya ashupwelile no kukamona livita nomu naitulekiwa ilama yenji. Awpo ahuka no kuka loisha mithzi thzo kuwesha ilama. 56 Nehoni lyo savata awopo apumula kuthza mu mulao.