¹ Mashikushiku oliyuwa lyo matatekelo oviki, akeile kumbumbo, kuleta mathzi aliloishelile. ² Ana wanine liwe lina yanjululiwa kushelo thzo mbumbo. ³ Awopo engena mo unone kaka waninemo elama ya Fumu Jesu. ⁴ Okwa kwamahalile eci, kwana likomokela ei, akwelume aili ana wa emanine kuma mbali nevatoyo yo kutethzima. ⁵ Apo ambuyama aliyapelile no kufulumanisha lupala lo pashi, awopo ambela awa ambuyama, "Ine mufotela munu omuyumi kwawa nafu? ⁶ Kalimo, unone na pinduka! Mwaayele eyina miambela koli nenu mu Galileya, ⁷ kuamba eci mwana munu henge akumupa mu moko anu owamango no kumungongotela pa mbimba, unone muliyuwa lyo mu shihatu apinduke kalo." ⁸ Ambuyama aylile maywi enji ⁹ no kuhuka kutunda kumalalo no katonwela eihe enu kwa fundishiwi olikumi na yofoci nanu wahe. ¹⁰ Maria Magadalena , Joana, Maria mama wa Jakovo na ambuyama amweya akatongolile einu kwa apositola. ¹¹ Unone amaywi hime ayuvahalile eci alipome kwa apositila, unone kaitawile ei ambile ambuuyama. ¹² Honi Pitolosi wakatukile, no kucilela ku mbumbo, unone, wakemanine no kuhokela mo, ayepo mona eto inalikalela yofoci. Pitolosi ayepo huka ku njiyo thzenji, kona komoka eyi uya kwamahalile. ¹³ Mone, kwakalile anu eli awathzile elyo liyuwa kuliumbo eli lineshiwa Emausi, ne makumi mutanu na lyofoci oma mmailo kutunda mu Jelusalema. ¹⁴ Hime ali to[ngawelile enu yoihe naikwammahala. ¹⁵ Okwa kalahalile, eci kwalitonwela no kulipaula epula, Jesu ayepo wahenyena no kuendelela no. ¹⁶ unone meho o wapalelishile kumu limuka. ¹⁷ Jesu ayepo wepula, "Enu mwine mu litonwela ko muenda? "Awopo awimana apa ana anjipa. ¹⁸ Yumweya, olithzina lya cleopas, wa mutawile, "Ane yowe yofoci pohuma munu mu Jelesalema oyu nakana ku limuka eyi ina kwamahala muno mumayuwa?" ¹⁹ Jesu ayepo watawa eci, "Enu mwine?" Awopo amutawa, "Eyi ina kwamahala kwa Jesu omu Nazareta, neli mupolofita shokolo mwikwama no mumaywi palupala lwa Nyambi na anu wahe, ²⁰ na kulu oma pulisita nawa natuendisha eci aka atuliwele kufa no ka mwamba pa mbinda. ²¹ Unone hime na tuthsepe eci yoliyo wa kuamwena mbunga thza israele. Ee, unone ine kalo, pano po kuna piti mayuwa ahatu kutunda apa naikwamahalela einu yoihe. ²² Unone kalo, ambuyama etu amweya anatu komokethsa, ou ana kala kumbumbo mashikushiku. ²³ Kaka wanine shithzimbi, awopo akahuka, kwa amba eci tuna mono kalo shimona sho mangeloi anatu ambela eci ayoya. ²⁴ Akwelume amweya awa tunakala no wana cilela kumbumbo, no kawana eci eli ambuyama ana amba. unone kaka mumonine." ²⁵ Jesu ayepo wawatawa no kuambela, "Amwe mwa kwelume etomba no kata okulitawa ko micima thzenu eyi nei ana mbaele apolofita! ²⁶ Ene kana kuloela eci kilesite ai nyande, no kengena mukutethzima kwenji? ²⁷ Kutatekela kwa Mushe no kutwala kwa polofita wahe, Jesu wawatolokelile enu ei ina pitela kukwenji muman;olo oahe oakenu. ²⁸ Ou atambile muliumbo omuathzile, Jesu walimonahashile eci afota kupitelela kulupala. ²⁹ Unone wa mulombile, no kumu ambela eci, "Owikale netu liyuwa linatoko kalo lungulo. "Honi Jesu wathzile no kekala no. ³⁰ Oya kwamahalile eci, ayepo kala no no kulya no, ayepo shimba mukasha, kuufiyaweza, no kukuyaula, no kuwapa. ³¹ No meho o mbeci akenge, no kumulimuka, popo ayepo watunda mumeho. ³² Awopo aliambisha, "Micima thzetu kathziyumine, uya ana amba netu mulikun'wa, uya ana tuyepulela mu man'olo oakenu?" ³³ Kesho shikati awopo apinduka kuhukela ku Jelusalema. waka wanine a olikumi na yofoci kwa naliwana mofoci na mweya awa kalile no. ³⁴ Kwa amba, "Jesu no pinduka yo shemwa, no muanalimona halishela kwa Simoni." ³⁵ Awopo atongaula einu ya kwamahalile mulikun'wa no mu alimukelile Jesu ko kuyula eshima. ³⁶ Kwai ambaula, Jesu wane manine mukaci ko, no ku waambela, "Kuliyala kukale nenu." ³⁷ Unone ayapila no kuyala wowa, hime ane kelile ci shilumba. ³⁸ Jesu po wa ambela, "Ine munathzielehela? Ine mulipaula mu micima thzenu? ³⁹ Mumone moko ange no maulu ange, yame mwene. Muni kwate muni mone. Inene shilumba kashakala no nyama ne shoko, ame po nili nayo. ⁴⁰ Ou amanine kuamba kengeyo, ayepo wamonisha moko enji no maulu enji. ⁴¹ Hinga kengeyo katawile nawa inene hime a anyanyukile, kalo hime akomokile. Jesu ayepo wambela, "Muli nelya?" ⁴² Awopo amupa kayavu kothsi okuteleka, ⁴³ Ayepo kashimba no kalya kwa natanekela. ⁴⁴ Ayepo wambela, "A apo oliyo maywi nani miambelanga konili nenu, eci eli kunan'oliwa mumulao wa Mushe na polofita no mumembo eci iyalisheleliwe." ⁴⁵ Ayepo wavukula muwongo, eci ayuvishishe man'olo. ⁴⁶ Ayepo wambela ''Yoliyo ina n'oliwa eci kilesite aloela kunyanda no kupinduka kwafu muliyuwa lyo mushihatu. ⁴⁷ Kuhumba no kuteteliwa ivi yoliyo muna loela kufundisha mulithzina lyange ku matunga oahe, kutatekela ku Jelusalema. ⁴⁸ Mwa mbangi wei inu. ⁴⁹ Mumone, namitumena eyi tata wange nani kulupelisha. Unone mwikale muno muliumbo katele ou mwa kuwana okolo ou tunda kuwilu." ⁵⁰ Jesu wawa tundishile muliumbo no kuwatwala poppepi na Betania. Ayepo yelula moko enji no kuya fuyawela. ⁵¹ Okwa kwamahalile. Kowa fiyawela, ayepo washiya no kushimbiwa kutwaliwa muwilu. ⁵² Awopo amulombela no kuhuka ku Jelusalema ko shinyanyu sho shokulu. ⁵³ Akawanahalangile mutempele shikati sho shihe, kwa fiyawela Nyambi.