¹ Jesu ayepo taneka no kumona afumanyi owa kwelume kwaloka nopu thzo mushipaupau sho kutulukela. ² Ayepo mona lifukathzi yu mweya kokoleka tu kwacha twili. ³ Honi ayepo amba, "Namiambela yo shemwa, oyu lifakathzi oshihutu na koleka nene kupita wahe. ⁴ Wahe awa anakoleka atundisha pei yoingi ali nayo, unone oyu lifakathzi, ona tundisha pouhutu wenji, kukoleka aka analoela kuliyoisha nako." ⁵ A mweya ambile yo tempele, elinathziyenge ko mawe oawa ne tavelo, ayepo amba, ⁶ "Keinu yeihe ei mumona, liyuwa lya keya eli lya kuninga ci kwisha hinga liwe lyofoci eli lya kushiala lya kukana kuumbuliwa." ⁷ Honi awopo amwipula, kuamba ci, "Mufundishi, liyuwa lipi yakukwamahala ei?" Imonisho mwine ya kumonisha kukwamahala kwa inu ei? ⁸ Jesu ayepo watawa eci, "Mumamele eci katele a myangela. Ou anu owangi henge akukeya mulithzina lyange, kwa amba, 'Yamono kuno, 'no, 'Shikati shina henyenena.' mwawa shupwela. ⁹ Ou mwakuyuva mandwa no kulipilukela katele mwa kuyape, eyi ina loela kukwamahala popano." ¹⁰ Ngoni honi awambelile, "Litunga henge lya ku alukela litunga limweya, no mivuso henge thza kualukela miviso. ¹¹ Henge kwa kukala kunyanganya kokukulu kokaye kokahe, no mwivakaa imweya henge nthzala thza kukalamo ne kola yo kuyambukela. Henge kwa kukala enu ya kuyapisa ne imonisho ya kutunda kuwilu henge ya kukalako. ¹² Unone eihe koihime kukwamahala, henge akupaka moko papenu kalo henge akuminyandisha, akumitwale muma Sinagoge no mutumenga, amilete ku mafumu no kumavuthsisi mulivaka lyo lithzina lyange. ¹³ Henge ya kutwala kushikati shoshiwa sho kunitongola. ¹⁴ Uno honi muloishi micima thzenu eci muliloishele kuliamwena apo pashikati shikeya, ¹⁵ Inene henge na kumipa matwi no nyanyami eci kupile hinga yofoci kowa akwa ethzimbo awa kumikanena nji kumilwisha. ¹⁶ Unone henge akumipilukela ashemi enu, akuluenu, apenu, na mbushenu, aklo henge kwa kupiwa amweya kukwenu. ¹⁷ Anu wahe henge akumithzimba mulivaka lyo lithzina lyange. ¹⁸ Unone kwithsa shinga lihuki lyo ku mitwithzenu eli lya kuyonga. ¹⁹ Mukulitanalisha kwenu henge mwakuliyoisha. ²⁰ "Ou mwa kumona Jelusalema kwana mu thzinguluka eta, mulimuke ci kwipa kwao po pepi kuli. ²¹ Apo awali mu Judea acilela ku mikinya, nawa ali mu mambongi henge akuthzishiya, nowa ana tundu mulitunda katele engena mu mbongi. ²² Inene aopo oliyo mayuwa okulihushela anu mumango, eci enu yoihe ina n'oliwa ikwamahale. ²³ Kuvindama po kowa kukala polemu nawa kuyamwisha omo mumayuwa! Inene kulithzekela kokukulu pakaye, no kuanjipela anuenji. ²⁴ Henge akupaiwa ko mwele, no kuwatwala muupika mu matunga oahe, no mu Jelusalema henge akulyata lyatiwa kwanu kenge katele shikati shanu kenge ousha kukwana. ²⁵ "Henge kwakukala emonisha paliyuwa, no pa ngonda, no matungwethzi, no pano pashi. Anu henge akulithzekela, ayepe mulumo oliwate no man'ithsingi. ²⁶ Anu henge akupwelelishiwa ku wowa apa kuayala enu ya kukeyela kaye. Inene okolo omuwilu henge wakunyanga-nyishiwa. ²⁷ Apo honi henge akumona mwana munu ou akeya mumavui no kolo no kutethzima kokukulu. ²⁸ Unone ou honi ya kukwamahala einu, mwimane no kukotola mitwi thzenu, inene kuyoishiwa kuli popepi." ²⁹ Jesu ayepo watongwela ethzi nguli, "Mumone shitondo sho feiga, ne tondo yoihe. ³⁰ Ino ihokela mite, mwalimonena mwashinda no kulimuka ci mvula pepi ali. ³¹ Mane no, uno muimona koi kwamahala, mulimuke eci muvuso waNyambi pepi uli. ³² Nami ambela shemwa, ou mukuta ou kawa kupwa katele einu koina kwamahala. ³³ Liwilu no kaye henge ya kupwa, unone maywi ange mbela kaapu. ³⁴ "Unone mulimamele, eci katele micima thzenu thzi patehele kunwa no takwa no kutatoka yo mwoyo, ne lyo liyuwa katele lya kumiwane ko shipundumukela ³⁵ eci shilaha. inene henge sha kuwela anu wahe awa yoya mukaye momuhe. ³⁶ Unone mukenge shikati shoshihe, ko mulombela eci mukale no kolo okumitweshisha kupala kwinu yoihe eyi ya kukwamahala, no kemana palupala lwa mwana munu." ³⁷ Mutanya hime na fundishanga mutempele, no shiku hime nathzanga no kekala omu muneshiwanga eci mwitondo yo olive. ³⁸ Anu wahe hime namenekelanga ku kwenji kuka muteelela mutempele.