¹ Lyakumine liyuwa limweya apo Jesu kuma afundishile anu mu tempele no kukutathza evangeli a pulisita owakulu na an'oli po akeya kuwenji pofoci na akulu. ² Awopo amba kukwenji, kumuambela ci, ''Otutongwele ou okolo okwamisha ei enu, ne kalo elye nakupu ou okolo.'' ³ Ayepo tawa no kuwambela ci, ''Name kenge nimiipula shiipula, ne munitongwele. ⁴ Kolovethzo thza Joani kuma thzatundile kuwilu nji thzatunda kwa anu?'' ⁵ Awopo alipaula awo ashinda, kuamba ci, ''Ou tuamba ci, 'Thzatunda kuwilu,' kenge amba ci, 'Nehoni ine namukanena kumuyuvela?' ⁶ Unone mona tu amba ci, 'Thzatunda kwa anu,' anu wahe kenge atukuhathzana mawe, mukonda awo anatawa ci Joani neli mupolofita.'' ⁷ Honi awopo atawa ci kanalimuka oku thzatundile. ⁸ Jesu po wambela ci, ''Name kanimitongwela ou okolo nikwamisha ei enu.'' ⁹ Ayepo ambela anu ethzi nguli, ''Munu kuma akunine shilwa sho veine ayepo pa shilwa kwaka kulima veine, ne ayepo thza ku litunga limweya mu shikati shoshile. ¹⁰ Shikati apa shakwanine ayepo tuma mupika kwaka kulima veine, ci aka mupe ko ku oshuku o mushilwa sho veine. Unone akwaku kulima veine awopo amufula, no kumuhusha nyala-nyala. ¹¹ Kalo ayepo tuma mupika yumweya kalo awopo amufula naye, no kumukwama omango, no kumuhsha nyala-nyala. ¹² Ayepo tuma kalo yumweya omushihatu kalo awopo akamukuliukisha , no kumukuhela pola. ¹³ Honi fumu o shilwa sho veine ayepo amba ci, 'Kenge nikwama ngepi? Kenge nituma mwanange nihima. Nahimi ngwa kenge akamukuteka.' ¹⁴ Unone akwa kulima veine apa amumonine, alitongwelile mukaci ko ci, 'Oyu yoliyo shwana. Tumupaenu, ci kushwana kuka;e kwetu.' ¹⁵ Awopo amukuhela pola thzo shilwa no kumu paa. Honi fumu oshilwa sho veine kenge akukwama ngepi kukwo? ¹⁶ Kenge akeya no kuna episha awa aka kulima veine, ne kenge akupa shilwa sho veine kwa amweya.'' Apa ayuvile kengeyo, awopo amba ci, ''Kwakala kengeyo!'' ¹⁷ Unne Jesu ayepo watanelela, no kuamba ci, ''Yatongola ine ei inan'oliwa: 'Liwe elyo akanine aumbi linaaluka lishina lyo mawe'? ¹⁸ Yomuhe oyu wela apo pa liwe kenge ayatauka tupathsipathsi, ne munu yomuhe oyu liwela kenge limuololola.'' ¹⁹ Honi an'oli no akulu o apulisita anekelile kumupaka nyala ci amukwate omo mushikati esho mwene, mukonda kuma alimukile ci kuma ambile ethzi nguli kukwo. Unone kuma ayapile anu. ²⁰ Awopo amutaneka ko kumuendishisha, awopo atuma anu (matwela) alimonishile eci akuwa micima(kuluka) ci amuwanene mulandu mu maywi enji, ci awane po kumutwalela ku mulao no ku kwa muka kuendisha. ²¹ Awopo anuipula, ci, ''Mufundishi, twalimuka ci wa ambanga no kufundisha shuwana, kalo kotaneka munu ci oyu ne elye, unone wafundisha likun'wa lya Nyambi mushemwa. ²² Kunaloo ci tukule mutelo kwa Sesare, nji kaku loile?'' ²³ Unone Jesu kuma anangulile maayalo o, ne ayepo wambela ci, ²⁴ ''Munomonishe ao mali o mutelo. Shihanga no lithzina yalye ei ilipo?'' Awopo amba ci, ''Ya Sesare.'' ²⁵ Ayepo wa ambela ci, ''Nehoni mupe Sesare enu ya Sesare, ne mupe Nyambi enu ya Nyambi.'' ²⁶ Katweshile kuwana mulandu kwei ambile pakaci ka anu, unone akomokile kalabo thzenji, awopo atutwala. ²⁷ Asaduki wamweya ou akeile kukwenji, awa ana ambanga ci kwithsa kupindka kwawa anafu, ²⁸ awopo amuipula ci, ''Mufundishi, mushe watun'olelile ci ngeci mukulwa munu po fa, kuna yeka mbuyama, ne kali no mwana, munu atwesha kuyeka oyo munu wa mukulwenji ci awanene mukulwenji mwana. ²⁹ Hime kwakalile akwelume okukwana mutanu noeli ana munu yofoci, ne omutatekelo ayepo yeka mbuyama, ne ayepo fa kashiile mwana, ³⁰ omusili naye kalo kengeyo. ³¹ Omushihatu naye kalo wamuyekile, mulikun'wa lyofoci omushitanu no eli naye wamuyekile naye kashiile mwana, ne ayepo fa. ³² Munyima mbuyama naye ayepo fa. ³³ Honi mukupinduka kwakakufa, kenge akukala munu walye? Mukonda wahe o mutanu no eli amuyekile.'' ³⁴ Jesu ayepo wambela ci, ''Ana amuno mu kaye ayeka kalo ayekishiwa. ³⁵ Unone awo anapiwa ci aloela kupinduka kwakakufa kakuyeka nji kuyekishiwa. ³⁶ Shanga kufa kakufa kalo, mukonda alipitula ni man'eloi kalo ana Nyambi, mukuninga ci ana o kupinduka kwakakufa. ³⁷ Unone yokupinduka kwakakufa, shanga Mushe wamonishile kengeyo, mushimuna sho kuyuuma oko ashile Fumu ci Nyambi wa Abrahama, no Nyambi wa Isaka, no Nyambi wa Jakobo. ³⁸ Honi kali Nyambi wakakufa, unone Nyambi wawa ayoya, mukonda wahe ayoya kukwenji.'' ³⁹ An'oli wamweya awopo atawa, ''Mufundishi, onatawa shuwana.'' ⁴⁰ Mukonda kuma ayapile ku muipula ipula imweya kalo. ⁴¹ Jesu po wambela ci, ''Ngepi ana ambanga ci Kilesite mwana Davida? ⁴² Mukonda Davida aye amba mu vuka thza lisamu ci, Fumu amba kwa Fumu wange, 'Okale ku lyoko lyange lyo shilyo, ⁴³ kukumena apo naku kwamena akwethzimbo yoye wikalo o ilyatelo yo maulu oye.' ⁴⁴ Nehoni Davida aisha Kilesite ci, 'Fumu,' honi ngepi akala mwana Davida?'' ⁴⁵ Anu wahe kwayuva ayepo ambela afundishiwi enji, ⁴⁶ ''Muyape an'oli, awa ahima kuenda kwanavata ito yoile no kuhima kuvumeneniwa mu maulishelo no kuhima ipula yo kuendisha muma sinagoge no makalelo o kuposho ku mikiti. ⁴⁷ Kalo amana lufumo mu manjiyo o mafakathzi ko kuwa kwamena malombelo oshole. Anu o kengeya kenge akuatuliwa mu katulo thzo thzikalu.''