¹ Ne honi Jesu ayepo wambela nguli thzomu ana loela kulombela kukwatelela ne ci kalo aaya kulombela, ² ayepo amba ci, ''Mu mbongi thzimweya kuma kwakalile mukakuatula oyu nakana kuyapa Nyambi kalo kanakutekanga anu. ³ Honi kwakalile lifakthzi omo mu mbongi, ne kuma nakeyanga kukwenji lolungi, kuna muambelanga ci, ''Onikwathse kwawa ni thzeka no ci niatuliwe shuwana.'' ⁴ Pa shikati shoshile kanahimi kumukwathsa, unone munyima ayepo liambela yofoci ci, 'Shanga ci kaniyapa Nyambi nji kukuteka munu, ⁵ uno honi mukonda oyu lifakathzi anilungelela, kenge nimukwathsa ci aatuliwe shuwana, ci akeyanga kuno kukwatelela kunanilungelela.''' ⁶ Nehoni Fumu ayepo amba, ''Munayuvu ei amba oyo mukakuatula okupila n'eke. ⁷ Honi Nyambi kenge akwanga kuatula shuwana anu enji anahanguliwa awa alilela kukwenji ushiku no mutanya? Eine kenge athzihama kuwa atula shuwana? ⁸ Namuiambela ci kenge ayakamisha kuwa atula shuwana. Shanga kengeyo, Mwana Munu ou akukeya ci kenge nawa shitawo pa kaye?'' ⁹ Nehoni ayepo amba ethzi nguli kuambela wamweya awa naanekelanga mu micima thzo ci anakene ne kuma nalyatelela anu angenjo, ¹⁰ ''Anu eli kuma athzile mu tempele kukalombela- yofoci neli mufalisi yumweya neli mukakutelisha. ¹¹ Mufalisi ayepo imana no kulilombelela kengeya, 'Nyambi, nakandelela kukoe ci kanilipitula eci anu amweya- ethzi, anu okukana kukena, akakukwama ohuka- kalo kanilipitula noyu mukakutelisha. ¹² Naliyumenanga yokulya lwili mu viki. Natundishanga koleko thzo ulikumi ku inu yoihe niwana.' ¹³ Unone mukakutelisha, kunemanena kokule, ayepo kwanga no kutanekela kuwilu, unone ayepo lifula pa mucima, kuamba ci,'Nyambi, oniyuvele n'eke ame mukakukwama shivi.' ¹⁴ Namiambela ci, oyu munu kuma ahumile ku njiyo thzenji kunakenishiwa kupita oyu yumweya, mukonda munu yomuhe oyu likulisha aye shinda kenge akuhushiwa pashi, unone munu yomuhe oyu lihusha pashi kenge akukulishiwa.'' ¹⁵ Anu awopo aleta anuke oshonye kukwenji ci awakwate, unone afundishiwi ou amonine kengeyo, awopo awa anjipela. ¹⁶ Unone Jesu ayepo waisha, kuwambela ci, ''Mutawethze anuke oshoonye ci akeye kukwange mwawakanisha. Mukonda ofumu (futisho) wa Nyambi wa anu okengeya. ¹⁷ Yoshemwa namiambela ci, yomuhe kana kutambula ofumu(futisho) wa Nyambi eci mwanuke shemwa kakuingenamo.'' ¹⁸ Mukakuendisha yumweya ayepo muipula, kuambaci, ''Mufundishi omuwa, nikwame ngepi ci nishwane moyo okukana kupwa?'' ¹⁹ Jesu ayepo muambela ci, ''Ine oniishela ci omuwa? Kwithsa omuwa, shime Nyambi yofoci. ²⁰ Walimuka milao- lelo wakwama ohuka, wapaa, waithza, wapa upaki o n'anda, olemeke tata oye na njinoye.'' ²¹ Oyo mukakuendisha ayepo amba, ''Yoihe ei enu ninaikwama kutunda kuwanuke wange.'' ²² Jesu ou ayuvile kengeyo, ayepo muambela ci, ''Shinu shofoci eshi onakanga kukwama. Oulishe yoihe oli nayo oiele ehutu, ne kenge wakukala no lufumo muwilu- ne okeye onishupwele.'' ²³ Unone oyu mukakuendisha ou ayuvile ei enu kuma anjipile manene, mukonda kuma akalile no lifumo loliungi. ²⁴ Honi Jesu, ou amonine ci anjipa, ayepo amba, ''Kukalu ngepi ci awa ali no lufumo aingene mu ofumu wa Nyambi! ²⁵ Mukonda kwoto ci kakambe kaingene mu lithziho lyo songa kupita ci munu oyu li no ufumo aingene mu ofumu wa Nyambi.'' ²⁶ Awa ayuvile eyo awopo amba, ''Nehoni elye twesha kuyoishiwa?'' ²⁷ Jesu ayepo tawa, ''Enu ikana kutweshala kwa anu kwa Nyambi yatweshala.'' ²⁸ Pitolosi ayepo amba, ''Omone, tunashii enu yetu yoihe tunakushupwela.'' ²⁹ Nehoni Jesu ayepo wambela, ''Yoshemwa, namiambela ci kwithsa munu oyu nashii njiyo, nji munu wenji, nji apenji, nji ashemi enji, nji anenji mukonda o ofumu wa Nyambi, ³⁰ oyu wakukana kutambula moyo okukana kupwa munon mukaye kano, no mukaye kakukeya.'' ³¹ Ou amanine kuwaneka olikumi no eli, ayepo wambela, ''Mumone twathza ku Jelusalema, ne enu yoihe ei inan'oliwa ko apolofita ya Mwana Munu kenge ikkakwamahala. ³² Mukonda kenge akapiwa kwa anu angana, ne kenge akamuhendaula, no kumukwama omango, no kumuthsipela mate. ³³ Ou amana kumumwashula, kenge akumupaa, ne pa liyuwa lyomushihatu kenge akupinduka kalo.'' ³⁴ Kwithsa ei ayuvishishile kwei enu, ne eli liywi kuma naliholekiwa kukwo, ne kanayuvishisha enu nai ambiwa. ³⁵ Akopo kukwamahala ci, Jesu ou ahenyenine ku Jeriko, mukwelume yumweya okukana kumona kuma aklile ku likun'wa kulomba, ³⁶ ne ou ayuvile anu owangi kwapita ayepo ipula ci ine ikwamahala. ³⁷ Awopo amutongwela ci Jesu oku Nathzareta yoliyo pita. ³⁸ Honi oyo mukakukana kumona ayepo kuwelela, kuamba ci, ''Jesu, Mwana Davida, oniyuvele n'eke.'' ³⁹ Awa aendile kuposho awopo anjipela oyo mukakukana kumona, awopo amuambela ci atutwale. Unone mbeci akuwelele manene, ''Mwana Davida oniyuvele n'eke.'' ⁴⁰ Jesu ayepo imana ne ayepo tuminina ci oyo mukwelume aletiwe kukwenji.Nehoni oyo mukakukana kumona ou ahenyenine, Jesu ayepo muipula, ⁴¹ ''Ine ofota ci nikukwamene?'' Ayepo amba, ''Fumu, nafota kumona.'' ⁴² Jesu ayepo muambela ci, ''Omone. Kulitawa koye kunakupolisha.'' ⁴³ Popo mwene ayepo mona ne ayepo mushupwela kushangala Nyambi. Anu wahe, ou amonine ei, awopo ashangala Nyambi