¹ Honi akakutelisha wahe nakakukwama omango wamweya kuma akaile kuna teelele kukwenji. ² Afalisi na an'oli awopo kumbaula mukaci ko no kuamba ci, ''Oyu munu atambula akakukwama omango kalo mane alya no.'' ³ Jesu ayepo watongwela ethzi nguli, yaepo amba ci, ⁴ ''Elye kukwenu, oyu li no mangu shita ne akopo kuyonga lingu lyofoci, oyu nga kana kushiya aa mangu amweya mulihalaupa nokuthza kukafota eli lingu linayongo shime ou akaliwana? ⁵ Nehoni ou akaliwana aliyelula no kulipaka pa mapee ne anyanyuka. ⁶ Ou nakuma ku njiyo thzenji, anawaneka a mbushenji nawa anatungu no, no kuatongwela ci, 'Munyanyuke nange, mukonda ninakawana lingu lyange naliyongo.' ⁷ Namitongwela ci shianga hengeyo, kenge kwakukala kunyanyuka muwilu pa mukakukwama omango yofoci oyu humba, kupita anu owangi okuluka awa akana kuloela kuhumba. ⁸ Nji mbuyama yupi oyu li no mali o muwayawaya likumi, ci kuyonge po kofoci, oyu nga kana kuyumisha lampi, kufiyela munjiyo no kufotishisha yuwana shime oukawana? ⁹ Ou akawana awaneka ambushenji nawa anatungu no, nokuwaambela ci, 'Munyanyuke nange, mukonda ninawana ka muwayawaya kange nakayongo. ¹⁰ shanga kengeyo namitongwela ci, kuli kunyanyuka mukaci ko mangeloi a Nyambi pa mukakukwama omango yofoci oyu humba.'' ¹¹ Honi Jesu ayepo amba ci, ''Mukwelume yumweya oyu wakalile naanenji owakwelume eli, ¹² omwanuke ayepo ambela tata wenji ci, 'Onipeko yange ku lufumo loye.' Honi tata o ayepo waela lufumo. ¹³ Kakwapile mayuwa oangi, oyo mwane omwanuke ayepo waneka yoihe ei akalile nayo nokuthza ku litunga lyo kule, oko ayepo kepisha lufumo lwenji ko kuyoya uyoye ouhuka. ¹⁴ Honi ou amanine kwipisha yenji yoihe, omo mulitunga amopo kukala njala thzoshokulu manene, ne ayepo tateka pila. ¹⁵ Ayepo thza kukafota ekwama ku munu yumweya omo mulitunga, oyo wamupakile kunyunganga ngulu. ¹⁶ Kuma alyangile ku ilya yo ngulu mukonda kwithsa namupanga yo kulya. ¹⁷ Unone oyo mwana omwanuke ou alikupulile, ayepo amba ci, 'Angahi awa anapiwa kukwama kwa tata awa anapiwanga ilya yoingi, ne yame ono kuno kunifa njala! ¹⁸ kenge nitundako kuno no kuthza kwa tata, ne kenge nikamuambela ci, ''Tata ninaipishela liwilu no kukuipishela. ¹⁹ Kaniloela kalo kuishiwa mwanaoye; onikwame eci awa angamba oye.''' ²⁰ Honin oyo mwana omwanuke ayepo katuka no kuthza kwa tata wenji. Kushili kokule, tata wenji ayepo mumona ne ayepo muyuvela n'eke ayepo mundandumukela kuka kukamukwata no kukamucuveta. ²¹ Nehoni mwana ayepo muambela ci, 'Tata, ninaipishela liwilu no kukkuipishela. Kaniloela kuishiwa mwanoe.' ²² Tata wenji ayepo ambela angamba enji ci, 'muyakame mulete shito shoshiwa, namumuvateke, kalo mumupake kathzeya kulyoko, no makatulo ku maulu enji. ²³ Honi mukalete ngombe o kununa namumupae. Tukwamenu mukiti tukine! ²⁴ Mukonda mwanange kuma nafu, ne honi ayoya. Kuma nayongo honi onawaniwa.' Awopo atateka kukina. ²⁵ Honi mwanenji omukulu kuma athzile ku shilwa. Ou ahukile kuhenyena ku njiyo, ayepo yuva membo no kukina. ²⁶ Ayepo isha yumweya kwa angamba no kumuipula ci ine ikwamahala. ²⁷ Oyo ngamba ayepo muambela ci, 'Minoye onakeye ne tata woye onapaa ngombe okununa mukonda onahuku kuli shuwana.' ²⁸ Oyo mwane omukulu kuma anjipile ayepo kana kuingena, tata wenji ayepo puna kunamulomba ci aingene. ²⁹ Unone oyo mwane omukulu ayepo tawa no kuambela tata wenji ci 'Omone, ethzi myaka thzothzingi ninakukwamena, kalo nishime kuleya mulao oye, unone oshime kunipa shanga ka membe kokaonye ci nikine na amabushange, ³⁰ unone mwanoe ou anakeya, oyu nakaipisha inu yoye no mahule, onamupaela ngombe o kununa.' ³¹ ''Tata wenji wamuambelile ci, 'Mwanange, owe wakala nange mayuwa oahe, ne yoihe nili nayo yoye. ³² Unone kunaloo atwe kukwama mukiti no kunyanyuka, mukonda oyu minoe kuma nafu, ne honi ayoya; kuma nayongo honi onawaniwa.'''