¹ Mu liyuwa limweya lyo Sabata, ou athzile munjiyo thzo muendishi yumweya o afalisi kukalya ishima, kuma amutanekelile nene. ² Inene, posho thzenji kuma kwakalile oyu wakolile nan'we. ³ Jesu ayepo ipula awa alimuka nene yo mulao o Majuda na Afalisi, ''Kunaloo kupolisha lyo Sabata, nji kakuloile?'' ⁴ Unone kuma atutwalile. Honi Jesu ayepo mukwata, ayepo mupolisha, no kumuambela ci athze. ⁵ Ayepo wambela, ''Elye kukwenu oyu li no mwanenji o mukwelume nji ngombe wenji oyu nawela mulishima lyo Sabata oyunga kana kumukoka mo wanguwangu?'' ⁶ Katweshile kumutawa kwei enu. ⁷ Jesu ou anangulie awa naishiwa omu alihangulela itwamo yokulemekiwa, ayepo amba nguli, kuambela ci, ⁸ ''Ngeci munu onakuisha ku mukiti o shinawenga, lelo wakakala pa shivaka sho kulemekiwa, mukonda nahimingwa kwali munu yumweya okulemekiwa kukupita oyu naishiwa naye. ⁹ Oyo munu namisha mwaheno ou akuma, kenge akuambela ci, 'Ope oyu munu yumweya apo onakala,' ne muhonyi thzoye kenge othza pokukana kulemekiwa. ¹⁰ Unone ngeci onaishiwa , othze okakale pokukana kulemekiwa, ci oyu nakuisha ou akeya, nakuambele ci, 'Mbusha othze paya po kulemekiwa.' Co kenge olemekiwa kwao anakala ku methsa noye. ¹¹ Mukonda munu yomuhe oyu likulisha aye shinda kenge akuhushiwa pashi, ne oyu lihusha pashi kenge akukulishiwa.'' ¹² Jesu kalo ayepo ambela oyo munu wamuishile, ''Ngeci wakwama ilya yo mutanya nji yolungulo, lelo waisha ambushoe shanga aminoe shanga apoe shanga awa onalihata no, katele akukuishe nao, ne kenge wakukuliwa. ¹³ Unone ngeci wakwama ilya, oishe ehutu, akakutenyangela, elema, no tupuputwa, ¹⁴ ne kenge wakufiyauliwa, mukonda katwesha kuikuhushela. Mukonda kenge wakukuliwa mukupinduka ko uwa.'' ¹⁵ Yumweya kwawa akalile na Jesu ku methsa ou ayuvile ei enu, ayepo ambela Jesu ci, ''Oli no fiyauthzi oyu wakulya ishima mu ofumu(futisho) wa Nyambi!'' ¹⁶ Unone Jesu ayepo muambela ci, ''Munu yumweya kuma aloishile ilya yoingi no kuisha mbunga. ¹⁷ Ou aloishile ilya, ayepo tuma angamba enji kukaambela awo naishiwa ci, 'Mukeya mukonda enu yoihe inaloo.' ¹⁸ ''Wahe awopo atteka kulithsevauka. Omatatekelo ayepo muambela, 'Ninaulu shiiwa, ne nafota kuthza ci nikashimone. Nalomba oni teteleko.' ¹⁹ Yumweya epo amba, 'Nina hulu mapulu o ipani mutanu, ne nafota ci nithze nikathzieleke. Nalomba muniteteleko.' ²⁰ ''Kalo munu yumweya epo amba, ninayaka mbuyama, nehoni kani twesha kukeya.' ²¹ ''Mupika epo huka nokukatongwela fumu eyi inu. Ne fumu wethzo njiyo ayepo anjipa no kuambela mupika wenji, 'Othze oyakamene pama mbanja no mumakun'wa omuna umbo ne okalete kuno aka kupila, inyanga, tupuputwa, nawa ana kuluka mahulu.' ²² ''Mupika epo amba, 'Fumu, eshi onatumena shin kwamahala, unone shikati koshishili.' ²³ ''Fumuepo ambela mupika, 'Othze muma kun'wa no mu mikulo ne owa hotelele kuingena, ci njiyo thzanga thziyale. ²⁴ Nami ambela, wahi kwawa akwelume naniishi wakulya ilya yange.''' ²⁵ Ne mungi waendile nenji, ayepo wapilukela no kuamba kuko, ²⁶ ''Ngecipo munu akeya kukwange kupila kuthzimba tata wenji, njinenji, mbuyama wenji, anenji, apenji no andumbu thzenji, shinganga moyo wenji, katwesha kukala mufundishiwi wange. ²⁷ Yumwe akana kushimba siyako shenji ne anishupwela katwesha kukala mufundishiwi wange. ²⁸ Mukonda elye kukwenu ayala kuumba tawala akane tango kukala pashi no kutala teko kupima eyi ifotahala ci thzipwe? ²⁹ Nahimi, ou amanisha kuceka matatekelo no kukwanga kuthzimanisha, wahe awa akuthzimona kenge akumu heka, ³⁰ kua amba, 'Oyu munu shime atateka kuumba kalo katweshile kuthzimanisha.' ³¹ Inji Fumu opi,oyu thza mukuliwana na mungenjenji fumu ku nvo, akane tango kukala pashi no ku anekela ci atwesha kuthza no akwelume akwana 10,000 kukalwa nomungenjenji fumu keya no akwelume akwana 20,000? ³² Ngecipo kwithsa, mushikati ashili kokule maswalale amweya,kenge atuma okupila wowa ci akalilombele kothzo. ³³ Nehoni, yumweya kukwenu kana kulihupwela kuimuna yenji katwesha kukala mufundishiwi wange. ³⁴ Mungwa uwa, unone ngecipo utowi wawo unapu, ngepi utwesha kukwamiwa mungwa kalo? ³⁵ Kauli no ukwashi ku muve shinganga ku mununo. Wakonjiwa kwako. Oyu olino matwi okuyuvisha, ayuve.''