¹ Mwesho shikati, anu wamweya awopo amuambela ya aka Galilea awo Pilato avandakanine onyinga o no matavelo o. ² Jesu po watawa no kuambela ci, ''Mwanekela ci awa aka Galilea kuma akalile no shivi nene kupita aka Galilea wamweya mukonda kuma anyandile kengeyo? ³ Kwahi, namiambela. Unone ngeci kamuhumbu, mwaheno kenge mwakufa eci awo. ⁴ Nji awa anu likumi no mutnu no ahatu omu Siloamu awa thza welelile tawala no kuwa paa, mwanekela ci kuma akalile no shivi nene kupita anu wamweya mu Jelusalema? ⁵ Kwahi, naamba. Unone ngeci kamuhumbu kenge mwakufa namwe mwaheno.'' ⁶ Jesu ayepo amba ethzi nguli, '' Munu yumweya kuma akalile no shitondo sho feiga eshi sha kuniwile mu shilwa shenji sho veine ne ayepo keya kunafota ko oshuka unone kakawanine. ⁷ Oyo mukwelume ayepo ambela mukakulima, 'Omone, myaka thzihatu konikeyanga kunafota oshuka oku ku shitondo sho feiga ne kananiwanagileko oshuka. Oshitete. ine yo kushishiyelela koshiipisha muve?' ⁸ Mukakulima watawile no kuamba, 'N'athsile mushishiye tango unomwaka ci nishihatwele no kupakako mununo. ⁹ Ngeci kenge shima oshuka mwaka ukeya, kuli nawa; unone ngeci kashakupaka, wakushitete!''' ¹⁰ Honi Jesu kuma afundishile mu sinagoge thzimweya lyo Sabata. ¹¹ Ne kwakalile mbuyama oyu wakalile no mupepo o uva pa myaka likumi no mutanu no thzihatu. Neli wakupetamenene pohuma katweshangile kuimana kuna oloka shuwana. ¹² Jesu ou amumonine, ayepo muisha no kumuambela, ''Mbuyama, onapolishiwa muikola yoye.'' ¹³ Ayepo mupaka moko, ne popo mwene ayepo oloka ne ayepo shangala Nyambi. ¹⁴ Unone mukakuendisha sinagoge kuma anjipile mukonda Jesu kuma apolishile lyo Sabata. Honi oyo mukakuendisha sinagoge ayepo tawa no kuambela mbunga ci, ''Mayuwa mutanu no lyofoci oliyo kunaloela kukwama. Mukeye namupolishiwe omo mu mayuwa ao, kali lyo Sabata.'' ¹⁵ Fumu ayepo mutawa no kumuambela ci, ''Akalikamba! Kwali kukwenu oyu nakananga kuangulula ngombe wenji nji kakambe kenji mushilyelo no kumutwala ci akanwe meyu lyo Sabata?'' ¹⁶ Honi koyu mwana Abrahama o mbuyama, oyu Satani angile pa myaka likumi no mutnu nothzihatu, kakuloile ci miothzi thzenji thziangululiwe lyo Sabata?'' ¹⁷ Ou ambile ei enu , awa amukananine kuma ayenine, unone mbunga thzothzihe kuma anyanyukile ku enu yoihe yoiwa ei akwamine. ¹⁸ Nehoni Jesu ayepo amba, ''Ofumu(futisho) wa Nyamni walipitula no ine, kalo ine nitwesha kuanekethza nao? ¹⁹ Walipitula weci mbuto thzo mathsitete ethzo munu ashimbile no kuthzikonjela mushilwa shenji, ne athzopo thzimena no kukula kuninga shitondo shohsikulu, ne inyunyi yo muwilu aypo ikwama italatala kumitai thzasho.'' ²⁰ Kalo ayepo amba, ''Kuine nga nianekethza ofumu(futisho) wa Nyambi? ²¹ Walipitula weci mamene ashimbile mbuyama no kuavandakana no ipimo ihatu yo ushunga kukumena apo wakwanine mushunga wouhe.'' ²² Ne Jesu ayepo enda mu mambongi no mu maumbo, kufundisha nokukwama likun'wa lyenji lyoku Jelusalema. ²³ Munu yumweya ayepo muambela ci, ''Fumu, eine anu oshonye lika akuyoishiwa?'' Honi ayepo muambela ci, ²⁴ ''Mulitanalishe kuingena mushelo thzoshoonye, mukonda, namiambela, owangi kenge akufota ci aingene, unone kakutwesha kuingena. ²⁵ Shinda sha njiyo oshipinduka lika no kuyanjela ku shelo, co amwe kenge muimana pola ko mungongota pa shelo no kuamba, 'Fumu, Fumu, otutawethze tuingene.' ''Kenge akutawa no kumiambela ci, 'Kanimilimuka nji kupi mutunda.' ²⁶ ''Nehoni kenge mwakuamba, 'Twalile no kulya pa posho thzoe kalo kuma no fundishanga mu mambanja etu.' ²⁷ ''Unone kenge akutawa, 'Namiambela ci kanilimuka oku mutunda. Mutunde kukwange amwe mwakakukwama omango!' ²⁸ Kenge kwakukala kulila no kukweca maeo ou mwakumona Abrahama, Isaka, Jakobo no apolofita wahe mu ofumu(futisho) wa Nyambi, unone amwe komunakonjeliwa pola. ²⁹ Kenge akutunda ku upa, wiko, mutulo, no mboela, no kunakala ku methsa mu ofumu(Futisho) wa Nyambi. ³⁰ Mulimuke ei, awa oukukana kulemekiwa woliyo akutatekela, ne akakulemekiwa woliyo akukala kuhula.'' ³¹ Munyima thzeyo lika, Afalisi wamweya awopo akeya nokuna muambela, ''Othze otunde kuno mukonda Heroda afota kuku paa.'' ³² Jesu ayepo amba, ''Muthze mukambele oyo mbwawa, 'Mumone, natundisha mipepo thzothzimango no kupolisha lelo no peunja, ne pa liyuwa lyo mushihatu co ninakumu pa maanekelo ange.' ³³ Momuhe kukalela, kwaniloela ci nikwame lelo, peunja, neli lihatko mukonda kakutawa kupaela mupolofita pola thzo Jelusalema. ³⁴ Jelusalema, Jelusalema, mukakupaa apolofita no kupovaula awa anatumiwa kukoye. Eli ninahimi kuwameka anoye eci eli n'athzi shushwa anawanekanga anenji mu mando enji, unone konohimi ei. ³⁵ Omone, njiyo thzoye thzinashiiwa. Nakuambela, kowakunimona shime ou wakuambaci, 'Oli no fiyauthzi oyu keya mulithzina lya Fumu.'''