¹ Apo mwene, anu okuninga ita makumi no makumi ou aliwanine pofoci ci mane awopo alikunyaula, ayepo tatekela kuambela afundishiwi enji tango, ''Muyape mamene aafalisi, alyo likamba. ² Unone kwithsa shokuthsikiwa esho shakukana kumoniwa, kalo kwithsa esho shina holekiwa esho shakukana kulimukiwa. ³ Honi yoihe muaamba mu milema kenge yakuyuviwa mu mwethzi, kalo ei munayaaya mukaci ko maiyo kenge yakuambiwa peulu thzo ituwa yo maiyo. ⁴ Namba kukwenu, ambushange, mwayapa awo apaa elama, kalo munyima thzeyo kwithsa esho atwesha kukwama. ⁵ Unone kenge nimitongwela oyu muloela kuyapa. Muyape oyo ninga ci ou amana kupaa, oli no okolo okumikonjela mulihele. Ee, namitongwela ci,mumuyape. ⁶ Kali ndumbu mutanu thzauliwa tuwayawaya toshoonye twili? Uno honi kwithsa shanga kafoci kanavulamiwa mu meho a Nyambi. ⁷ Unone shanga huki thzo ku mitwi thzenu thzitaliwa thzohihe. Mwa. yapa. Mwahemiwa nene kupita ndumbu thzothzingi. ⁸ Namitongwela yomuhe oyu niamba pa meho o anu, Mwana Munu naye kenge akumuamba pa meho o man'eloi a Nyambi, ⁹ unone oyu nihamula pa meho o anu naye kenge akuhamuliwa pa meho o man'eloi a Nyambi. ¹⁰ Yomuhe oyu amba liywi lyo kulwisha Mwana Munu kenge akuwana kukwateliwa, unone koyu amba liywi kusheununa mupepo oukenu, kakawana kukwateliwa. ¹¹ Ou aileta mu masinagoge, kwa manduna, noku kwakakuendisha, mwalishoshomwa eli mukaamba kuliamwena, nji ei muloela kuamba, ¹² mukonda mupepo oukenu kenge wakumifundisha omo mushikati esho mwene, eshi muloela kuamba.'' ¹³ Yumweya kutunda mungi wa anu ayepo muambela ci, ''Mufundishi, otongwele mukulwange ci tuliele lufumo tunashwana.'' ¹⁴ Jesu ayepo muambela ci, ''Mukwelume elye nanipaka ci yame mukakuatula no mueli wenu?'' ¹⁵ Ayepo amba kukwo, ''Munone ci mwalihenge kukuhima nene lufumo, mukonda moyo o munu kukalile kwei anafumu.'' ¹⁶ Nehoni Jesu ayepo watongwela nguli, ci, Shilwa sho mukwelume okufuma kuma shapakile nene, ¹⁷ ne ayepo anekela aye shinda, ci, 'Ngepi nikwama kanili no shivaka mo kutulekela ilya yange?' ¹⁸ Ayepo amba, 'Eshi sholiyo nikwama. Kenge ni umbulula eshete shange no kuumba yoshokulu, ne moliyo nituleka uloto wange no imweya. ¹⁹ Kenge niambela moyo, ''Moyo. Oli no inu yoingi onalitulekela mu miaka thzothzingi. Oayuluke shuwa, olye, onwe, o loele.''' ²⁰ Unone Nyambi ayepo muambela ci, 'Shanga sho mukwelume, ushiku o lelo moyo watundishiwa kukoye, ne enu onaloisha kenge ikala yalye?' ²¹ Omo moliyo anakalela munu oyu litulekela lufumo lwenji ne kali no lufumo kwa Nyambi.'' ²² Jesu ayepo ambela afundishiwi enji, ''Honine namiambela, mwabilaela yo moyo wenu, ei mulya; nji kuvilaela elama yenu, ci shine muvata. ²³ Mukonda moyo wapita ilya, kalo elama yapita evata. ²⁴ Mumone man'walala, kalimangile nji kuyanga. Kali no ishete, unone Nyambi aalela. Amwe muli noutokwa nene kupita enyunyi! ²⁵ Elye kukwenu mukuvilaela oyu twesha kuekethza kuule o moyo wenji? ²⁶ Honi ngeci kamutwesha kukwama enu yoshoonye kengeya, ine muvilaelela pei imweya? ²⁷ Mumone mayangayanga- omu akulela. Kavindi wanda, nji kuluka eto. Unone namiambela, shanga Solomoni mukutethzima kwenji kanavata eci lyofoci kwei. ²⁸ Ngeci Nyambi avateka muhonyi ou uli mushilwa, ou uninga ci lelo kouli, peunja wakonjeliwa mu mulilo, honi amwene kenge akwanga kumivateka, amwe akashitawo shoshionye! ²⁹ Lelo mwafota ei mulya nei munwa, ne mwavilaela. ³⁰ Mukonda matunga oahe o mukaye afota ei enu, ne Tata wenu alimuka ci mwaifota. ³¹ Unone mufote ofumu (futisho) wenji, ne eyo yoihe kenge akuimipakelako. ³² wayapa, owe mulaka oshoonye, mukonda Tata wenu onemanena kumipa ofumu (futisho) wenji. ³³ Muulishe lufumo lwenu ne mupe ehutu. mulikwamena ishimbelo yo mali ei ikana kuyatauka- lufumo kuwilu olu lukana kupwa, kokupila ethzi awa ahenyanako, kokupila menje ethzi ziipisha. ³⁴ Mukonda oku kuli lufumo lwenu, no micima thzenu koliyo thzakukala nathzo. ³⁵ Muliange miya mu mambunda enu, ne malampi enu ayuume, ³⁶ kalo muninge eci anu anatatelela n'athsile o ou akahuka ku mukiti o maluwo, ci honi ou akeya no kunangongota, wanguwangu amuyanjululele. ³⁷ Ali no fiyauthzi angamba awo nawana n'athsile kwanatatelela ou akeya. Yoshemwa namiambela, kenge aanga evata yenji yoile mumbunda no mwiya no kuwa ambela ci aikale ku methsa, ne aye kenge awakwamena yokulya. ³⁸ Ngeci n'athsile ayepo keya pakaci ko ushiku nji malungasiku, ne anawawana kwanalioishela, ali no fiyauthzi awo angamba. ³⁹ Unone mulimuke ei, ci shinda sha njiyo nga alimukanga shikati akeya mwithzi, nga katawethzangile njiyo thzenji ci thziyukuliwe. ⁴⁰ Muliloishele namwe, mukonda kamulimuka shikati akeya Mwana Munu. ⁴¹ Pitolosi po amba, ''Fumu, ethzi nguli wathzitongwela yatwe pohuma, nji wathzitongwela anu wahe?'' ⁴² Fumu ayepo amba, ''Nehoni elye mukakumona akakukwama oyu akupaka fumu wenji kuendisha angamba enji ci awapange ilya yo pashikati shiloela? ⁴³ Oli no fiyauthzi oyo ngamba nawana fumu wenji kukwama eyo ou akeya. ⁴⁴ Yoshemwa namiambela ci kenge amupaka kuendisha lufumo lwenji. ⁴⁵ Unone ngeci oyo ngamba po amba mu mucima wenji, 'Fumu wange onathzihama kuhukaka,' no kutateka kufula angamba owa kwelume nawa owa mbuyama no kulya no kunwa ne ayepo penda, ⁴⁶ fumu oyo ngamba kenge akeya pa liyuwa anakana kutatelela no pa shikati akana kulimuka ne kenge namucinauna ipathsipathsi no kumupa shivaka kwao okukana kusepahala. ⁴⁷ Oyo ngamba, nalimuka ei ahima fumu wenji ne kaloishile no kukwama omu ahimena fumu wenji, kenge afuliwa nene. Unone oyu nakana kulimuka ayepo ipisha, ne kaloelile kufuliwa, kenge afuliwa muku anekela. ⁴⁸ Unone oyu yomuhe napiwa yoingi kenge kufotiwa yoingi kukwenji, noyu nashiyeliwa yoingi, kenge akuipuliwa nene. ⁴⁹ Ninakeya kunakuhela mulilo pa kaye, nafota nene ci nga unayu kale. ⁵⁰ Unone nili no kolovethzo ethzo thzifotahala ci nikolovethziwe, kalo kaniloelile shime ou thzikwamahala! ⁵¹ Mwa anekela ci kuma ninaleta kuliyala pakaye? Kwahi, namiambela, unone ci anu alihande. ⁵² Mukonda kutunda pano kuthza kuposho munjiyo omu kuli anu mutanu kenge alihanda- anu ahatu kualukela eli, no anu eli kualukela ahatu. ⁵³ Kenge akulihanda, tata wa munu kualukela mwanenji o mukwelume no mwana omukwelume kualukela tata wenji, mama wa munu kualukela mwanenji o mbuyama no mwana o mbuyama kualukela mama wenji, munu na ngumwenyenji kenge alialukela.'' ⁵⁴ Jesu kalo kuma ambelile mbunga, ''Ou mumona livui ko liyeluka kun wiko popo mwene mwaamba ci, 'Maloshi akeya,' ne yakwamahala. ⁵⁵ Kalo mupepo ou upepa kutunda kumboela,' mwamba ci, 'kenge kuenya,' ne yakwamahala. ⁵⁶ Amwe akalikamba, mwalimuka yo pashi no kuwilu omu inakalele, unone ine mukana kulimukela shikati apa muendela? ⁵⁷ Ine mukana kuhangula yoiwa kukwenu? ⁵⁸ Mukonda ou olitwala kwa mukakuatula noyu kuthzekisha, komuli mulikun'wa olililele koyu kuthzekisha ci mumane iamba ci akutwala kwa mukakuatula ne ci mukakuatula aktwala ku mapokola, ci mapokola akupake mu kamenga. ⁵⁹ Nakutongwela, kowa kutundamo shime ou omana kukula mali okumanenena ku mulandu.