¹ Liyuwa limweya Jesu kuma alombelile mushivaka shimweya. Ou amanine, yumweya kwa afundishiwi enji po muambela ci, ''Fumu otufundishe kulombela eci eli Joani nafundisha afundishiwi enji.'' ² Jesu po waambela ci, ''Ou mulombela muambe ci, 'Tata, lithzina lyoe lyolikenu lilemekiwe. Ufumu woye wiye(futisho thzoye thziye). ³ Otupe eshima yetu yo liyuwa no liyuwa. ⁴ Otutetele ku milandu thzetu, eci eli tunatetelanga ku milandu thzakakutuipishela. Llelo watuingenisha mu ieleka.''' ⁵ Jesu po waambela ci, ''Elye kukwenu oyuli no mbushenji, ne ayepo thzaku kwenji pakaci ko ushiku, no kukamuambela ci, 'Mbusha, onipeko mikasha thzihatu thzo ishima, ⁶ mbushange onanikumena kutunda mumuendo, ne kanili nei yokumupa ci alye'? ⁷ Honine oyo li mukaci ayepo mutawa no kuamba ci, 'Wanilungelela. Kushelo kunayanjeliwa kale, kalo anange, name, tunalala. Kanitwesha ci nipinduke nanikupe ishima.' ⁸ Namitongwela ci, shanga ci kapinduka kunamupa ci mukonda ci mbushenji, unone mukonda okukwatelela kulomba, kenge apinduka thzothzihd mikasha thzo ishima ofota. ⁹ Namitongwela ci, mulombe, ne kenge mupiwa; mufote, ne kenge muwana; mungongote, ne kenge muyanjululeliwa. ¹⁰ Mukonda munu yomuhe lomba apiwa; no munu yomuhe fota awana; no munu yomuhe ngongota ayanjululeliwa. ¹¹ Yupi tata wamunu mukaci kenu, ngeci mwanenji amulomba ishima aye amupa liwe? ¹² Nji ou amulomba ethsi aye amupa liyoka? Nji ou amulomba liyaki, aye amupa nge? ¹³ Honine, ngeci amwe anu owamango mwalimuka kupa anenu inu yoiwa, honi tata wenu o kuwilu kenge akwanga ngepi kupa mupepo oukenu kwawa amulomba?'' ¹⁴ Honi Jesu kuma natundisha mupepo oumango o uamba. Mupepo oumango ouwatundile, oyo mukwelume wakanangile kuamba ayepo amba, ne anu kuma akomokile. ¹⁵ Unone anu wamweya awopo amba ci, ''Atundisha mipepo thzothzimango ko okolo wa Beeluzebule mukakuendisha mipepo thzothzimango.'' ¹⁶ Wamweya awopo amueleka no kumuambela ci awamonishe shimonisha shitunda kuwilu. ¹⁷ Unone Jesu walimukile maayalo o ne ayepo waambela ci, ''Muvuso ouhe ou unalitepe kulilwisha owo muvuso kenge upwa, no njiyo ethzi thzinalitwepe ethzo njiyo kenge thziwa. ¹⁸ Ngeci Satani onalitepe yofoci, muvuso wenji kenge ukolopa ngepi? ¹⁹ Ngeci natundisha mipepo thzothzimango ko Beeluzebule, hono anu enu awo athzitundisha ko okolo walye? Mukonda wei, kenge akupiluka akakumiatula. ²⁰ Unone ngeci natundisha mipepo thzothzimango ko munwe wa Nyambi, nehoni ofumu wa (Futisho thza) Nyambi unakeya kukwenu. ²¹ Mukwelume omukolo oyu li no ilwisho anyunga njiyo thzenji, itenga yenji yakala shuwana, ²² unone mukwelume omukolo kumupita ou akeya anamutwesha, anamunyanga ilwisho yenji ei nakulupela no kushimba lufumo lwenji. ²³ Oyu kana kuniimanena anilwisha, noyu kana kuliwana nange alihanda. ²⁴ Mupepo oumango kounatundu ku munu, wathza muivaka mokupila meyu kufota pokukala. Ou ukapila, waamba ci, 'Nihuke ku njiyo thzange okunitunda.' ²⁵ Apa uhuka, kukawana thizya njiyo thzina fiyeliwa no kuloishiwa shuwana. ²⁶ Nehoni wathza kukashimba mipepo thzimweya thzo mutanu na thzili thzothzimango kupita awo thzakeya kunakala. Nehoni muikalelo oyo munu waninga oumango kupita pa mutatekelo.'' ²⁷ Akokpo kukwamahala ci, ou ambile ei enu , mbuyama yumweya ayepo kuwa no kumuambela ci, ''Lili no fiyauthzi lila lyakuelekile no mele akuyamwishile.'' ²⁸ Unone ayepo amba ci, ''Unohoni, ali no fiyauthzi awa ayuva liywi lya Nyambi no kulituleka.'' ²⁹ Mbunga ou thzabulile, Jesu ayepo tateka kuamba ci, ''Eshi shikuta shili no omango manene. Shafota shimonisha, shanga ci kwithsa shimonisha eshi shakupiwa kuko shime shimonisha sha Jonasi. ³⁰ Mukonda eci eli Jonasi akalile shimonisha kwa anu oku Neninve, no Mwana Munu naye kenge akala shimonisha kweshi shikuta. ³¹ Fumu o mbuyama oku mboela kenge akuimana pa katulo na anu weshi shikuta ci awatule, mukonda anatundu ku hula thzo kaye kunayuva onyanyami wa Salumoni, no kunamona, munu omukulu kupita Salumoni oyu li kuno. ³² Anu oku Nenive kenge akuimana pa katulo neshi shikuta ya anu ne kenge akushiatula, mukonda awo ahumbile ko kufundisha kwa Jonasi, no kumona, munu omukulu kupita Jonasi oyu li kuno. ³³ Kwithsa munu, o kumana kuyumisha lampi, athzipaka mshivaka shinaholama nji athzipake mukatanda, unone athzipaka po kumonahala, ci awa aingena amone mwethzi. ³⁴ Lithziho lyoe thzoliyo lampi thzo elama. Lithziho lyoye ngeci lyamona shuwana, elama yoye yoihe yakala mu mwethzi. Unone ngeci lithziho lyoe kalimono elama yoye yakala mu milema. ³⁵ Honine, mumone ci mwethzi uli kukwenu kali milema. ³⁶ Ngeci ilama yoye yoihe ili mu mwethzi kokupila shilama shanga shofoci eshi shili mu milema, nehoni elama yoye kenge ilipitula eci lampi ethzi thzimunyeka mwethzi wathzo pa elama yoye. ³⁷ Ou amanine kuamba, mufalisis yumweya ayepo mulomba ci akalye nenji kunjiyo thzenji, honi Jesu ayepo thza kukengena no kukala. ³⁸ Mufalisi kuma akomokile ci Jesu katangile kulihupa mbeci alye mulalelo. ³⁹ Unone Fumu ayepo muambela ci, ''Honine, amwe afalisi mwahupanga manganja no malonga enu peulu, unone mukaci kenu kuli kulya manene no omango. ⁴⁰ Amwe anu okupila maano! Oyu wakwamine peulu kali yoliyo wakwamine no mukaci? ⁴¹ Mupe ehutu ei ili mukaci, ne honi enu yenu yoihe kenge ikena. ⁴² Unone kuvindama po kwenu amwe afalisi, mukonda mwa mwatela shofoci kwei yo likumi ku minta, no ku miloho thzothzihe mulinathzo, unone mwasheununa katulo no shihemo sha Nyambi. Kulishuwana kukwama shuwana no kuhima Nyambi, kokupila kukwanga kukwama shimweya kalo. ⁴³ Kuvindama kwenu amwe afalisi, mukonda mwahima itulo yoikulu mu masinagoge no mu misika. ⁴⁴ Kuvindama kwenu, mukonda mwalipitula eci mambumbo akana kumonahala apo alytangela anu kokukana kulimuka.'' ⁴⁵ Yumweya oyu limuka manene yo mulao ayepo muambela ci, ''Mufundishi, eyo omba matuka no kwetuku. ⁴⁶ Jesu ayepo amba ci, ''Kuvindama kwenu amwe akakufundisha mulao! Mukonda mwashimbisha anu mipango thzothzikalu kuthzishimba, unone amwe kamuthzikwata no minwe thzenu. ⁴⁷ Kuvindama kwenu, mukonda mwakwamena mapolofita mambumbo, ne akwasan'ulu enu woliyo awapaile. ⁴⁸ Honi amwe mwa mapaki kalo munatawa ekwama ya akwasan'ulu enu, mukonda awo kuma awpaile shemwa kalo amwe mwawakwamena mambumbo. ⁴⁹ Mukonda wei, onyanyami wa Nyambi wambile ci, 'Kenge nituma apolofita na apositola, ne kenge akawanyandisha no kupaa wamweya.' ⁵⁰ Manyinga o apolofita a namwaala kutunda ku matatekelo o kaye kenge akufoteliwa mu mitwi thzo eshi shikuta, ⁵¹ kutunda ku manyinga a Abele kukeya ku manyinga a Zakaria, oyu napaiwa pakaci ko aletare no tempele. Eee namitongwela ci, kenge akufoteliwa kweshi shikuta. ⁵² Kuvindama kwenu amwe akakulimuka mulao, mukonda amwe munashimbi shinotolo sho kulimka mulao; amwe kamuingenine mukaci kenu kalo mwakwangisha awa afota kuingena.'' ⁵³ Jesu ou atundile ko, an'oli na afalisi awopo amukananisha muinu yoingi, ⁵⁴ ci awne po kumukwatela kutunda pa maywi enji.