¹ Honi ko iamba namun'olo: ''Kwaloela ci mukwelume akwata mbuyama.'' ² Unone mukonda okuyapa kuelekiwa ko uhule, mukwelume no mukwelume akale no munu wenji, kalo mbuyama no mbuyama akale no munu wenji. ³ Mukwelume ape munu wenji yo muluwo yo ku ulili, no mbuyama naye akwame kengeyo kwa munu wenji. ⁴ Mbuyama kali no okolo o kuendisha elama yenji, mukwelume yoliyo li no okolo o kuendisha elama ya munu wenji. Mofoci, no mukwelume kali no okolo pa elama yenji, mbuyama yoliyo li no okolo pa elama ya munu wenji. ⁵ Mwaliyumena, shine ngeci munaliyuvu kukwama kengeyo mushika shimweya. Mukwame kengeyo komulombela. Nehoni mukeye pofoci kalo, ci Satani lelo amieleka mukonda okukana kulituleka kwenu. ⁶ Unone na amba ei enu kuwenu kumiotopishela mulao kali kumituminina. ⁷ Nga mwaheno mwaninga eci yame. Unone munu no munu oli no shipiwa shenji kutunda kwa Nyambi. Yumweya shipwa sho kengeya, yumweya kalo shipiwa shasho. ⁸ Kwakakuna kuyeka no kuyekiwa no mafakathzi kunaloo ci alikalele kwanakana kuyeka no kuyekiwa, eci yame. ⁹ Unone ngeci katwesha kulituleka, ayeke. Mukonda kunaloo ci ayeke kupita kupaiwa ko ihima. ¹⁰ Honi kwakakuyeka namituminina kengeya- kali yame, unone Fumu yoliyo mituminina- mbuyama lelo alitepa na munu wenji. ¹¹ (unone ngeci alitepa na munu wenji, akale kengeyo kunakana kuyekiwa ngeci kali kengeyo alihushe na munu wenji), kalo mukwelume alukulula munu wenji. ¹² Unone kwa anu wahe na amba- yame, kali Fumu- ci ngeci mukakulitawa oli no mbuyama okukana kulitawa, ne ahima kukala nenji, lelo amulukulula. ¹³ Ngeci mbuyama o kulitawa oli no mukwelume o kukana kulitawa, ne ahima kukala nenji lelo amukana. ¹⁴ Mukonda mukwelume okukana kulitawa akenishiwa ko munu wenji o kulitawa, kalo mbuyama okukana kulitawa akenishiwa ko munu wenji o kulitawa. Ngeci nga kali kengeyo anenu nga kenge akala o kukana kukena, unone ana kenishiwa. ¹⁵ Unone ngeci mukakuna kulitawa po thza, omushiye athze, mukakulitawa o mukwelume nji o mnuyama kanungiwa ko iamba yo kengeyo. Nyambi onatuishi ci tukale mu kuliyala. ¹⁶ Mukonda ngepi nga olimuka, mbuyama, ci kenge okwamena munu woye? nji, mukwelume, ngepi olimuka ci kenge okwame munu woye? ¹⁷ Shanga kengeyo, eci eli Fumu omu anapela munu no munu, munu no munu aende omu anamuishela Nyambi. Ou oliyo mulao wange mu makeleke oahe. ¹⁸ Kwali oyu nathzi ku mukanda ou namuishwa ci mulitawe? Lelo aeleka kulimonahalisha eci kathzile ku mukanda. Kwali oyu nakana kuthza ku mukanda ou namuishiwa ku shitawo? Lelo atwaliwa ku mukanda. ¹⁹ Mukonda kali kuthza ku mukanda nji kukana kuthza ku mukanda eshi shikwathsa. Eshi shikwathsa po kukwama milao thza Nyambi. ²⁰ Munu yomuhe akale omu akalelile Nyambi ou amuishile ci alitawe. ²¹ Kuma mwakalile apika Nyambi ou amiishile? Lelo mwaitwalela maano. Unone ngeci mwatwesha kutunda mu upika, mukwame kengeyo. ²² Mukonda munu naishiwa kwa Fumu kuli mupika yoliyo munu o kuliyala wa Fumu. Mofoci, no munu oyu naishiwa ci alitawe kuli munu o kuliyala yoliyo mupika a Jesu. ²³ Munauliwa ko muulo, honi mwapiluka apika a anu. ²⁴ Apange, momuhe mumukalelo namukala ou namu ishiwa, munu no munu akale na Nyambi mumukalelo oo. ²⁵ Honi eci ku maungu, kanili no mulao utunda kwa Fumu. Unone napa maayalo ange mukuninga ci no munu oyu, ko shihemo sha Fumu, nasepahala. ²⁶ Honine, na anekela ci mukonda o ukalu ukeya, namona ci kunaloo munu kukalela omu anakalela. ²⁷ Onalipaka kwa mbuyama? Lelo wafota kulukulula. Ngeci koli no mbuyama oku onalipaka, lelo wafota mbuyama. ²⁸ Unone ngeci wayeka, kokwamine shivi, ne ngeci liungu ayeka, kakwamine shivi. Unone awo ayeka kenge akala no ukalu oungi o nyama, nafota ci amwe mwakala no ukalu o kengeyo. ²⁹ Unone na amba ei, apange: Shikati shipi. Kutunnda pano kuthza kuposho, awa ali na ambuyama akale eci kali na mbuyama. ³⁰ Awa alila aninge eci kalili, nawa ananyanyuka aninge eci kanyanyukile, nawa aula aninge eci kwithsa eshi ali nasho, ³¹ awa alikwathsisha kano kaye aninge eci kalikwathsisha kano kaye. Mukonda kano kaye omukanakalela kapwa. ³² Nafota ci mukale mukuliyala. Mukwelume oyu nakana kuyeka atwala maano ku enu ya Fumu, mo kumukwamena eci aloele. ³³ Unone mukwelume nayeka atwala maano ku enu yo kaye, mokukwamena munu wenji eci aloele- ³⁴ analishii. Mbuyama nakana kuyekiwa nji liungu atwala maano ku enu ya Fumu, mokukalela okukena mu elama no mumupepo. Unone mbuyama nayekiwa atwala maano ku enu yo kaye mo kukawmena munu wenji eci aloele. ³⁵ Namba ei ci nimikwathse, kali ci niwane po kumikwatela. Na amba ei iloela, ci mukwamene Fumu kokupila eshi shimi ipisha. ³⁶ Unone ngeci kwali oyu anekela ci kakwama shuwana liungu lyenji -ngeci onapitelela miaka thzo kuyekiwa kukwamahale kengeyo- akwame ei afota. Kakwamine shivi. Ayekiwe. ³⁷ Unone ngeci onatanala mumucima wenji, kakwanga kalo atwesha kulituleka, kalo ngeci onahimi mu mucima wenji kukwama kengeyo, kutuleka liungu lyenji, kenge akwama shuwana. ³⁸ Honi oyu yekisha liungu lyenji akwama shuwana, ne oyu hangula kukana kuyekisha liungu lyenji kenge akwama shuwana nene. ³⁹ Mbuyama onanungeleliwa kwa munu wenji ou ashiyoya. Unone ngeci munu wenji po fa, atwesha kuyekiwa ku mukwelume yomuhe ahima, unone akale kwa Fumu. ⁴⁰ Unohoni mumumoneno wange kenge akala okuloela nene ngeci akale omu anakalele. Ne na anekela ci name nili no mupepo wa Nyambi.