¹ Tunayuvu ci mukaci kenu moulu uhule, uhule ou ninga ci shanga mahedeni kautawethza: Mukukwelume kukala na munu wa tata wenji. ² Mwalikuhumusa! Unohoni nga ka mulili, ci munu oyu nakwama kengeyo nga onatundishiwa mukaci kenu? ³ Mukonda shanga ci kaniliko mu elama, konili mumupepo. Nina atula kale oyu nakwama kengeyo, eci konanikala. ⁴ Ou muliwana mulithzina lya Fumu wetu Jesu ne nili nenu mumupepo, kalo no okolo wa Fumu wetu Jesu kouli, ⁵ mutwale oyu mukwelume kwa Satani ci kukaipishiwe mu nyama, ci mupepo wenji wakuyoishiwe pa liyuwa lya Fumu. ⁶ Kuliyuvishisha kali kuwa. Kamulimuka ci mamene oshoonye atundulukisha likende lyolihe? ⁷ Mulikenishe ku mamene okale ci mupiluke likende lyo lipe, kokupila mamene, eci eli muli shema. Mukonda Kilesite, mangu etu o paseka, onaningiwa shitavelo. ⁸ Honine tukwamenu mukiti, kali o mamene o kale, mamene okuyoya omango no omango. Unohoni, tukwame mukiti o makende okupila mamene o shihemo no shemwa. ⁹ Kuma nanimin'olela mulin'olo lyange ci mwaliwana nao anu o uhule. ¹⁰ Simbi natanga kutoya mahule o pano pa kaye, nji anu awa ahima lufumo, nji ethzi, nji aka kuhima athzimu, mukonda kutunda kukwo shime ou mutunda muno mu kaye. ¹¹ Unone honi namin'olela ci lelo mwaliwana no munu nyomuhe oyu ishiwa ci mwapetu unone ayoya mu uhule, nji wakuhima lufumo, nji wakuhima athzimu, nji ambanga omango, nji cakolwa, nji mwithzi. Lelo mwalya shanga kulya shilya no munu o kengeyo. ¹² Mukonda ngepi nga nilipaka mu kuatula awa ali pola thzo keleke? Unohoni, kali mwa atula awa ali mukeleke? ¹³ Unone Nyambi atula awa ali pola. ''Mutundishe munu o mumango mukaci kenu.''