¹ Omo moliyo atumonena munu, eci twa apika a Kilesite no atumiwa o enu shoshemwa inaholekiwa ya Nyambi. ² Honi mutumiwa aloela ci akale munu nakulupeliwa. ³ Unone yame po shinu shoshoonye eshi muniatula nasho shanga mukuta thza anu. Mukonda shanga yame shinda kaniliatula. ⁴ Kanilimuka mulandu nili nao, unone eyo kaimonisha ci ninakene nene. Oyu niatula po Fumu. ⁵ Honine mwa atula shinu shoshihe shikati koshishime kukuma, Fumu kushime kukeya. Kenge naleta inu inaliholeka yo milema mu mwethzi no kunahokola maayalo o mu mucima. Nehoni munu no munu kenge akatambula kushangaliwa kunda kwa Nyambi. ⁶ Honi, andengenu, nina likwathsisha ethzi milao kukwange no apolosi mukonda wenu, ci kutunda kukwetu mulifundishe ei utongola ou muambelo, ''Mwapitelela ei inan'oliwa.'' ⁷ Mukonda elye mona kulishiya kuli mukaci kenu na amweya? Shine muli nasho eshi namukana kutambula? Ngeci munashitambula, ine muliyuvishishela eci kanamushitambula? ⁸ Amwe ei namufoto munaiwana kale! Amwe munafumu kale! Munatateka kuendisha- ne atwe katuliko! shemwa, nga neli mwaendisha, nga neli twaendisha nenu. ⁹ Mukonda namona ci Nyambi onapaka atwe apositola popakenu ko kutupaka kuhula, ne eci anu awa anaatuleliwa kupaiwa. Tunapiluka o kushangaliwa ku kaye- ku mangeloi, no ku anu. ¹⁰ Twayanga mukonda wa Jesu, unone amwe po mwaka kunyanyama kwa Jesu. Atwe po twa aava, unone amwe po mwaakolo. Mwalemekiwa, unone atwe katulemekiwa. ¹¹ Kunakuma no pano pa shikati tunafu njala no linotwa, katuvata shuwana, twafuliwa, kalo katuli no manjiyo. ¹² Twakwama nene, kukwama no moko etu. Ou tuhekiwa, twafiyaula. Ou tunyandishiwa, twalitanalisha. ¹³ Ou tuhekiwa, Twa amba no shihemo. Tunapiluka manyalala o kaye no mathzilo nene ku enu yoihe, shanga nahingeno. ¹⁴ Kani n'olile ei enu kumiyuvisha honyi, unone kumilimukisha eci anange nihima nene. ¹⁵ Mukonda shanga ci muli no a mama wenu owangiwangi kwa Kilesite, kamuli na tata wenu. Mukonda ninapiluka tata wenu kwa Jesu ko evangeli. ¹⁶ Honi naiambela ci munitamenene. ¹⁷ Poliyo apo ninatumu Timotea kukwenu, mwanange oyu nihima o kulitawa kwa Funu. Kenge namivulukisha mikalelo thzange kwa Kilesite, eci eli niwafundisha kokuhe oku nili no mu keleke momuhe nili. ¹⁸ Honi wamweya ana likuhumusa, kukwama eci kana kukeya kukwenu. ¹⁹ Unone panopano nikeya kukwenu, ngeci Fumu ahima. Nehoni kana nilimuka pohuma maywi awo alikuhumusa, unone kenge nanimona okolo wo. ²⁰ Mukonda muvuthso wa Nyambi kali maywi pohuma unone ukolo. ²¹ Ine mufota? Nikeye kukwenu no shivanthzi nji no shihemo kalo no mupepo o kuluka?