¹ Kalo ame, andengenu, kanani amba nenu eci anu omupepo, unone hime nani ambanenu kanu onyama eci tumbututu kwa kilesite. ² Nanimilele ko maliwe, kali kelya yo ikolo, mukonda kana muitweshe, no pano tuli kamuitweshe. ³ Mukonda mushiyoya munyama. Omo mbamba kulilwisha kuli mukaci kenu, kamuyoyile kuthza konyama, kalo kamuyoyile kuthza ko mu ayoyela anu? ⁴ Apo yumweya ambaci, "Na shupwela Apolosi," kamupitulile nanu kawaye? ⁵ Apolosi nelye? Paulusi nelye? Angamba oyu munalitawa kukwenji, eci mwene Fumu eli anaele ekwama kwa munu no munu. ⁶ Nani kunu Apolosi naihupaela, unone Nyambi yonaikulisha. ⁷ Uno honi mukwa kukuna na mukwa kuhupaela ka kwashile. Unone oyuli no kwathsi po Nyambi oyu naikulisha. ⁸ No mukwa kukuna no mukwa kuhupaela mofoci, munu no munu ahola ko kuthza ko muana kwamena. ⁹ Atwepo tuna liwana mukukwamena Nyambi. Amwepo mwa shiwa sha Nyambi, muumbo wa Nyambi. ¹⁰ Ko shihemo sha Nyambi nani piwa on'ulungu oshokulu oku umba, nani shishi muumbo amweya nan uumbu. Unone munu no munu amamele eli aumba. ¹¹ Kwithsa munu okushisha muumbo ku shiya oyu na fundela, oyopo, Jesu kilesite. ¹² Ngeci po munu aye po umba apopa muumbo kokulikwashisha golide, shilivela, mawe oawa, etondo, kangungu, nji nengele, ¹³ ekwama yenji henge ya kumonahala muliyuwa lyo kumona enu na kwama munu no munu. Henge ya kuelekiwa ko mulilo. Mulilo woliyo wa kweleka enu ana kwama munu no munu. ¹⁴ Ngeci eshi ma umbu munu apo pa muumbo po ashopa shishiala, henge akutambula muyambo; ¹⁵ Unone ngeci po ekwama yo munu po ipya ku mulilo, henge akuyawa, unone aye shinda henge akuyoyishiwa, eci wa kupanduka ku mulilo. ¹⁶ Kamulimukile eci mwa tempele thza Nyambi kalo mupepo wa Nyambi wayoya kukwenu? ¹⁷ Munu yo muhe akwipisha tempele thza Nyambi, Nyambi henge akumwipisha oyo munu, Tempele thza Nyambi po thzikenu, namwe mukale owakenu. ¹⁸ Munu katele alyangele shinda. Ngecipo munu mukaci kenu ayala ci oli no nyanyami olelo, mumu shiye akale "Shitomba" eci wangu anyanyame. ¹⁹ Inene onyanyami okano keya po otomba kwa Nyambi. Eci eli kuna n'oliwa, "A kwata anyanyami ko kuli kwashisha kunyanyama ko." ²⁰ Kalo kunan'oliwa ci, "Fumu ona limuka ci maayalo onyanyami kao kwashishile." ²¹ Mukonda weyi, katele yumweya alishangalele anu. Enu yoihe yenu, ²² akale Paulusi, nji Apolosi, nji Pitolosi, nji kano kaye, nji mwoyo, nji kufa, nji enu yolelo, nji enu ya kukeya. Enu yoihe yenu, ²³ kalo amwepo mwa kilesite, no kilesite po Nyambi.