¹ Andengenu ou nanikeye kukwenu, kanani likwashisha maywi oshokalu nji onyanyami apa nani mifundisha oshemwa wa Nyambi nauliholeka apa nani miambela opaki kwei ya Nyambi. ² Mukonda o maayalo ange poci nalimuka shimweya mukaci kenu hime Jesu pohuma, oyu natufela pa mbinda. ³ Nani kala nenu kokupila okolo, no wowa, no kututuma nene. ⁴ Kalo liywi lyange no kutongola kwange kana kala maywi okumitawisha ko nyanyami. Unone, namitawisha kokoloo mupepo, ⁵ eci kulitawa kwenu kwakala ko nyanyami omunu, unone kokolo wa Nyambi. ⁶ Honi twambanga ko nyanyami mukaci kawa na kolopa mukulitawa, unone kali onyanyami okano kaye njiwa endishi oshino shikati, awapwa. ⁷ Pano honi, twa ambanga onyanyami wa Nyambi oshemwa una liholeka, onyanyami wa Nyambi nauholekiwela anu awa tangile kokutethzima kwetu. ⁸ Kwithsa kwa endishi opano tuli, oyu naiyuvishisha, nga hime nayuvishisha nga kanamba pa mbinda Fumu o kutethzima. ⁹ Unone kuna n'oliwa ci, "Kwithsa lithziho linamono, kwithsa litwi lina yuvu, ko kwithsa mucima omunu wa limukile eyi Nyambi naloishela awa namuhimi"- ¹⁰ Unone Nyambi naitulimukisha ko mupepo. Inene mupepo wa kufotishisha enu yoihe shinga eyi inaliholeka nene ya Nyambi. ¹¹ Elye na nalimuka maayalo omunu hime mupepo wenji aye shinda? Kengeyo, kwithsa oyu nalimuka othzingi wenu ya Nyambi hime mupepo wa Nyambi. ¹² Unone katutambula mupepo okano kaye unone mupepo outunda kwa Nyambi eci tulimuke nawa enu eyi anatupa kenge Nyambi. ¹³ Twa amba eyi enu kommaywi kali ko kuli fundisha ko nyanyami omunu, unone ko mupepo, kutongola enu yo mupepo kwanu omupepo. ¹⁴ Munu okupila mupepo oukenu tomba atambula enu yo mupepo wa Nyambi, inene otomba kukwenji. Tomba aiyuvishisha mukonda ya kuyuvishisha ko mupepo. ¹⁵ Oyuli no mupepo atwesha kuatula enu yoihe, unone aye kwithsa oyu nga twesha kumuatula. ¹⁶ "Elye oyunga twesha kulimuka maano a Fumu, eci atweshe kumushiuhila?" Unone atwe twa limuka maano a kilesite.