¹ Paulusi, oyu aneshi Jesu Kilesite eci akale muapositola kokuhima kwa Nyambi, na mwapetu Sositene, ² kun'olela chechi thza Nyambi thzo mukolinte, awa neshiwa eci akale okulitawa kwa kilesite Jesu kalo aneshiwa ci akale anu owa kenu, mofoci nawa ali mukaye ko kahe awa neshiwa mulithzina lia Fumu wetu Jesu Kilesite, oyu Fumu wo natwe. ³ Shihemo no kuliyala kukale nenu kutunda kwa Nyambi Tata wetu no kukwa Fumu Jesu Kilesite. ⁴ Ko shikati shoshihe na kandelelanga kwa Nyambi kenu mukonda ko shihemo sha Nyambi namipa Jesu Kilesite. ⁵ Namifumisha muinu yoihe, mwiambaula yohihe no kulimuka okumulinako kokuhe, ⁶ eci opaki wa Jesu Kilesite nautanalishiwa eci wa shemwa mukaci kenu. ⁷ Unone kamupilile mbuyo thzo mupepo pano mutateela kumonahalishiwa kwa Fumu wetu Jesu Kilesite. ⁸ Yoliyo wakuleta ci kulitawa kwenu kutanale kukuma ku mahulelelo, eci mwakushomololiwa muliwa lia Fumu wetu Jesu Kilesite. ⁹ Nyambi akulupeliwa, oyu namishi ci muyoye ko kuliwana na mwanenji, Jesu Kilesite Fumu wetu. ¹⁰ Honi namilomba, apange, kolithzina lia Fumu wetu Jesu Kilesite, eci mwahe mulitawe, eci kalo mwakala kulihandahanda mukaci kenu. Namilomba muliwane pofoci mukale no maayalo ofoci no mwianekela yofoci. ¹¹ Nanitongwela yenu, andengenu,anu oku Koloe eci mouli muyoyo mukaci kenu. ¹² Eyi nifota kumiambela po ei: Yumweya kukwenu a ambi ci, ''Amepo wange Paulusi,'' nji ''Amepo wange Apollosi,'' nji ''Amepo Pitolosi,'' nji ''Amepo Kilesite.'' ¹³ Kilesite ne nalihanda? Paulusi ne hime amifela pa mbinda? Hime amikolobetza mulithzina lya Paulusi? ¹⁴ Nakandelela kwa Nyambi ci kanani kolovethza munu kukwenu hime Kilisipasi na Gayusi. ¹⁵ Hinga hengeyo okuisha shanga yofoci oyu amba ci nanimukolovethza mulithzina lyange. ¹⁶ (Nanikolovethza nakwa njiyo thza Sitefani. Kutunda apo,kani limukile eci nani koloveyhza amweya.) ¹⁷ Inene Jesu kananitumu eci nikolovethze unone ci nifundishe evangeli_ kali kuamba konyanyami, eci kufa kwa Kilesite katele kupile okolo. ¹⁸ Mukonda hiamba kuthza ko mbinda kwakenge kowa nayongo. Unone mukaci kowa nayohishiwa, po okolo wa Nyambi. ¹⁹ Mukonda kuna n'oliwa ci, ''Henge na kumana onyanyami wa nyanyami. Henge nakukwangisha kuyuvishihsa kwa nyanyami.'' ²⁰ Kupi ali munu omu munyanyami? Kupi ali oyu wa lifundisha? Ne Nyambi kapilulile onyanyami okano kaye kuu kwama utomba? ²¹ Unone kano kaye ko nyanyami wako naka kwanga kulimuka Nyambi, Nyambi na nyanyuka nene kukyoisha awa nalitawa mwifundisha yo tomba tufundisha. ²² Majuda afota ombangi koimonahalisha kalo Magelike afota onyanyami. ²³ Unone atwe twa fundishaKilesite oyu na ambiwa pa mbinda, efundissha ikun'ukisha Majuda no kumonahala eci ya u tomba kwa anu kenge. ²⁴ Unone kwawa eshi Nyambi,mofoci no Majuda no Magelike, twafundisha Kilesite eci yoliyo okolo no nyanyami wa Nyambi. ²⁵ Inene otomba wa Nyambi po unyanyami kupita onyanyami wa anu, kalono no va wa Nyambi ukolo kupita okolo wa anu. ²⁶ Ngamutanekele elye namwishi, apetu. Kali mwahe na munyanyama kuthza ko nyama kali mwahe namukala no okolo. Kali mwahe namukala ana mafumu. ²⁷ Unone Nyambi nangula atomba eci ayenishi awa anyanyami. Nyambi nahangula ava muno mukaye eci aenishe owa kolo. ²⁸ Nyambi nahangula awa alikushi nawa anamoniwa ci kakwashile shimweya muno mukaye. Ona hangula mwene enu inaanekeliwa eci kaikwashile shimweya, eci alete pokupila shinu enu inamoniwa eci iwawa. ²⁹ Hime nakwama ei ci amonishe eci kwithsa munu oyu nga loela kulishangalela aye. ³⁰ Mukonda kei anakwama Nyambi, honi muli mwa Kilesite Jesu, oyu napiluka onyanyami wetu kutanda kwa Nyambi. Ona tukwama anu oawawa, o wakenu, no kuputululiwa. ³¹ Mukonda, eci eli kuna n'oliwa, ''Mushiye awa analishangala, alishangalele Fumu.''