¹ Honi nafota kumilimukisha, andengenu, evangeli naniamba kukwenu, eli namutambula napa munemana, ² kalo eli muyoishiwa kukwalyo, ngeci munatanalisha ku liywi nanimifundisha, shime ngeci kuma namutawa yo tumbako. ³ Mukonda nanipa kukwenu shinu sho matatekelo sho shikulu nene esho name kalo nanitambula, eci Kilesite kuma nafela shivi shenu kuthza ko man'olo omu ambela, ⁴ ci amuvumbekile, kalo wapindukile mu liyuwa lyomushihatu kuthza komu ambela man'olo. ⁵ Kilsete wa monahalile kwa Kefasi, noku olikumi na eli; ⁶ Nehoni wamonahalile kwa akakulitawa o kupitelela ita mutanu mu shikati shofoci. Ongi wo nopano tuamba ashiyoya, unone wamweya anakalala. ⁷ Nehoni ayepo monahala kwa Jakovo, honi ayepo monahala kwa apositola wahe. ⁸ Kumamaneneno, ayepo monahahala kukwange, ame ninelekiwa eci kambu kokuna kukola. ⁹ Mukonda yame omutunwelo kwa apositola wahe. Kaniloelile kuishiwa muapositola mukonda nani nyanfisha keleke thza Nyambi. ¹⁰ Unone ko shihemo sha Nyambi yame esho nili yame, kalo shihemo shenji kukwange kali sha tumbako. Unohoni, nanikwama nene kupita wahe. Unone kali yame, unone shihemo sha Nyamnbi esho shili nange. ¹¹ Honine shanga nji yame nji awo, ne twafundisha ne kalo munatawa. ¹² Honi ngeci Kilesite ambiwa eci onapinduka ku afu, ngepi wamweya kukwenu amba ci kwithsa kupinduka kwa afu? ¹³ Unone ngeci kwithsa kupinduka kwa afu, nehoni shanga Kilesite kapitundukile; ¹⁴ ne ngeci Kilesite kapindukile, nehoni ei tufundisha ya tumbako, no shitawo shenu nasho sha tumbako. ¹⁵ kalo, twawaniwa ci twa mapaki a Nyambi o n'anda, mukonda natupaka eci Nyambi napindula Kilesite kutunda kwa afu. Unone kanamupindula, ngeci shemwa akakufa kapinduliwa. ¹⁶ Mukonda ngeci akakufa kapinduliwa, shanga Kilesite kanapinduliwa; ¹⁷ ne ngeci Kilesite kanapinduliwa, shitawo shenu sha tumbako ne mushili mu shivi shenu. ¹⁸ Honine awa ana lala kwa Kilesite nawo anafeelela. ¹⁹ Nehoni ngeci oliyo moyo tunakulupela kwa Kilesite, apo anu wahe tuna vindama. ²⁰ Unone honi Keilesite onapinduliwa kwa afu eci akale mutamuno o waya ana lala. ²¹ Mukonda kufa kuma kwekeile ko munu, kalo no kupindu kwa afu kunakeya ko munu. ²² Muoknda eci kwa Adama wahe afa, honi kalo kwa Kelesite wahe kenge ayoishiwa. ²³ Unone munu no munu ko kutuminiwa kwenji: Kilesite, aye mutamuno, ne honi awo ali kwa Kilesite kange akuyoishiwa pa kwiya kwenji. ²⁴ Nehoni kenge kwa kukala mahulelo, ou akupa muvuthso kwa Nyambi Tata, apa akumana ofumu ouhe no okolo ouhe. ²⁵ Mukonda kenge akuvuthsa kupitela apa akupaka akwethzimbo yenji mushi thzo ilyatelo yo maulu yenji. ²⁶ Mukashithzimbo o mamaneneno kuipishiwa po lifu. ²⁷ Mukonda ''onapaka enu yoihe mushi o ilyatelo yo maulu enji.'' Unone apa kuambiwa ci ''onapaka enu yoihe,'' kunamonahala popakenu ci ei kaivandakanine noyu napaka enu yoihe mushi thzenji. ²⁸ Enu yoihe ou ipakawa mushi thzenji, nehoni Mwana aye kenge apakiwa mushi thzo yu napaka enu yoihe mushi thzenji, ne ci Nyambi akale yomuhe muinu yoihe. ²⁹ Kumona kali kengeyo waya anakolovethziwa kwakakufa ine akukwama? Ngeci aka kufa kapinduka ine ei awa kolovethzela awo? ³⁰ Ine kalo tukalela mukalu shikati shoshihe? ³¹ Nafa ku liyuwa ku liyuwa! Eipo yoliyo nilishangala kukwenu, eyo nili nayo kwa Kilesite Jesu Fumu wetu. ³² Ine kalo niwana kutunda mumumoneno wa anu, ngeci nanilu no ikondwama ku Efese, ngeci awa anafu kakupinduka? ''Tulyenu no kunwa, mukonda peunja twafa.'' ³³ Lelo mwa angeliwa: ''Likonthzi lyo limango lya episha mukalelo ouwa.'' ³⁴ Mulishoshomwe! Mukale mwaka kupila omango! Mwakwatelela kukwama shivi. Mukonda wamweya kukwenu kalimuka Nyambi. Na amba ei eci mufe honyi. ³⁵ Unone wamweya kenge akuamba ci, ''Awa anafu ngepi eli akupinduka, kalo kenge akukeya no elama yo ngepi?'' ³⁶ Owe shanga! Esho onakunu kasha kumena shime ou shifa. ³⁷ Eshi okuna kali yoliyo elama ya kukala ko, unone mbuto thza kuima. Nahimi ngwa mbuto thzo uloto nji thzimweya. ³⁸ Unone Nyambi kenge akuthzimpa elama eyo anahangula, kalo mbuto no mbuto athzipa elama yathzo. ³⁹ Kali ci nyama thzothzihe thza lipitula. Uno honi, kuli nyama thzofoci kwa anu, kalo nyama thzimweya ku iyama, kalo nyama thzimweya ku inyunyi, thzimweya ku ethsi. ⁴⁰ Kalo koili elama yo kuwilu no elama yo pashi. Unone kutethzima ko elama yo kuwilu kunali imanena kalo kutethzima ko elama yonpashi kwako. ⁴¹ Kutethzima ko liyuwa kofoci kalo no kutethzima ko ngonda kwako, kalo kutethzima kumweya ko matumngwethzi. Mukonda litungwethzi lyofoci linalishii no litungwethzi limweya kukutethzima. ⁴² Honi moliyo kuankalela no kupinduka kwa afu. Ei inakuniwa ya ola, ne ei ipinduka kaya kuola. ⁴³ Yakuniwa ko inyengwisha; yapinduka mukutethzima. Yakuniwa kokupila okolo; yapinduka mu okolo. ⁴⁴ Yakuniwa mu elama yo nyama, yapinduka mu elama yo mupepo. Ngeci koili elama yo nyama, koili kalo elama yo mupepo. ⁴⁵ Ne kalo kunan'oliwa, ''Munu omutatekelo Adama ayepo piluka munu o mupepo o kuyoya.'' Adama okuhula nakala mupepo upa moyo. ⁴⁶ Unone mupepo kali woliyo watangile kukeya, unone nyama thzoliyo thzatangile, ne honi mupepo mbeci ukeye. ⁴⁷ Munu o mutatekelo wa pashi, waombiwile pa likungu. Munu omushili atunda kuwilu. ⁴⁸ Eli ali munu waombiwile pa likungu moliyo anakalela wahe awo anaumbiwa pa likungu, kalo eci eli ali munu o kuwilu, moliyo anaklela anu wahe o kuwilu. ⁴⁹ Eci eli tuna elekiwa mu kulipitula no munu o likungu, kenge twakulipitula no munu o kuwilu. ⁵⁰ Honi ei yoliyo niamba, andengenu, ci nyama no onyinga kaitwesha kushwana muvuthso wa Nyambi. Shanga ei iola kaitwesha kushwana ei ikana kwola. ⁵¹ Mumone! Namiambela ei naiholekiwa: Katwa kulala twaheno, unone twaheno kenge twa kupiluka. ⁵² Kenge twa kupiluka mu shikati shofoci, mu kulikopa ko lithziho, pa tolombita thzo kumanenena. Mukonda tolombita kenge thza kuamba, ne waya anafu kenge akupinduka ko kukana kwola, ne kenge akupiluka. ⁵³ Mukonda ei elama i ola kenge yakuvata elama yo kukana kwola, kalo ei elama yo ifa kenge yakuvata elama yokukana kufa. ⁵⁴ Unone ei elama i ola ou yakuvata elama ei ikana kwola, kalo ei elama ifa ou shakuvata ela ikana kufa ne kenge kwa kuambiwa ei inan'oliwa, ''Kufa kunaminiwa kukutwesha.'' ⁵⁵ Kufa kutwesha koe kupi kuli? Kufa kuhuma koe kupi kuli?'' ⁵⁶ Kuhuma ko kufa po shivi, kalo okolo o shivi po mulao. ⁵⁷ Unone tukandelele kwa Nyambi, oyu natupa kutwesha ko Fumu wetu Jesu Kilesite! ⁵⁸ Nehoni, apange, mukolope kalo mwalinyenga nyenga. Mushikati shoshihe mutanalishe mu shikwama sha Fumu, mukonda mwalimuka ci shikwama shenu kwa Fumu kali sha mukenge.