¹ Honi kwei yo kukolekela Nyambi ko anu okukena: eci eli nani ambela keleke thzo Galatia, namwe mukwame kengeyo. ² Liyuwa lyo mutatekelo mu sunda, munu no munu kukwenu apake kumbali shinu shimweya ne ashituleke kuthza koi munakwama shuwa. Mukwame kengeyo ci kwakala yo makoleko ou nikeya. ³ Ou nikuma, awa munahangula, kenge niwapa man'olo o kuwalimukisha ne kenge niwatuma ci atwale makoleko enu ku Jelusalema. ⁴ Ngeci loela ci name nithze, ne kenge athza nange. ⁵ Unone kenge nikeya kukwenu ou nipita mu Masedonia. Mukonda kenge nipita mu Masedonia. ⁶ Nahimi kenge nanikala nenu nji shanga kukala nenu kufu yomuhe, ci munikwathse mu muendo wange, kokuhe oku nithza. ⁷ Mukonda pano kanifotile kunamihungelisha pohuma no kuthza. Mukonda nakulupela kunakala nenu shikati shoshile, ngeci Fumu kenge atawethza. ⁸ Unone kenge niikala mu Efese kutwala pa Pentekota, ⁹ mukonda shelo shoshjokulu shina yanjulukela yame, ne aka kusholola angi. ¹⁰ Honi Timotea ou akeya, mumone ci akala nenu kokuna kuyapa, mukonda akwama shikwama sha Fumu, eci ame eli nikwama. ¹¹ Kwakala munu oyu mushaula. Mumukwathse mu muendo wenji kokuliyala, ci akeye kukwange. Mukonda namutatelela kukeya na apetu. ¹² Honi yo mwapetu Apolosi, nina muambela nene ci namihungelishe na apetu. Unone kanahimi ci nga akeya pano. Shanga kengeyo, kenge akeya shikati ou shikuma. ¹³ Mumamele, mu imane wangu mu shitawo, mukwame eci akwelume, mutanale. ¹⁴ Yoihe mukwama muikwame mu shihemo. ¹⁵ Mwalimuka aka njiyo thza Setefanasi, ci woliyo oshuka o mutatekelo o Akaya, kalo ci anakalela kukwamena anu a Nyambi owa kenu. Honi namiambela, andengenu, ¹⁶ mulipake kwa anu o kengeya no munu yomuhe oyu kwathsa muikwama netu. ¹⁷ Nina nyanyuka pa kukeya kwa Setefanasi, Futunato, na Akaiko. Ana twesha kukwama kokupila amwe. ¹⁸ Mukonda ana ayulukisha mupepo wange nou wenu. Nehoni, na kandelela kwa anu okengeya. ¹⁹ Makeleke oku Asia anamivumenena. Akila no Purisila amivumenena kwa Fumu, pofoci no keleke ethzi thzili mu njiyo thzo. ²⁰ Apetu wahe amivumenena. Mulivumenene ko kulicuveta ko kukenu. ²¹ Ame, Paulusi, nan'ola ei ko lyoko lyange. ²² Ngeci kwali munu oyu kana kuhima Fumu, kenge akutiwa. Fumu wetu, okeye! ²³ Shihemo sha Fumu Jesu shikale nenu. ²⁴ Shihemo shange shikale nenu mu lithzinza lya Jesu Kilesite.