¹ Muotele shihemo kalo muhime ipiwa yo mupepo, shinako yo upolofita. ² Mukonda oyu amba ku lulimi kamba na anu unone na Nuambi. Mukonda kwithsa oyu muyuva mukonda a amba yo kukana kutunda ku mupepo. ³ Unone oyu polofita a amba kwa anu kuwa umba, kuwa ambela liywi, kalo no kualoelisha. ⁴ Oyu amba ku lulimi a umba yo shinda, unone oyu polofita aomba chechi. ⁵ Ne nafota eci mwaheno na mu amba ku malimi. Unone shianga kupita apa, nafota eci nga mwa ku polofite. Oyu polofita mukulu kupita oyu amba ku lulimi (Hime apa kukala muka kututulula eci chechi thzi wane ku umbiwa). ⁶ Unone, apange, kumona nakeya kukwenu kuamba ku malimi, ngepi nakuwana shipiwa kukwenu? Kani wana, hime apa ni amba kukwenu no kuhokola, nji kulimuka, nji upolofita, nji kulongethsa. ⁷ Mofoci apa shinu sho kukana kuyoya shaleta liywi shianga ngoma nji shinguvu nga kumona ka ileta maywi okushia, ngepi munu atwesha ku limuka eci elyo liywi lya shinguvu nji lya ngoma? ⁸ Mukonda kumona tolombita thza leta liywi lyo kukana kuyuvahala shiwa, ngepi munu a twesha ku limuka eci aliloishele kuthza kumvo? ⁹ Mofoci eci kukwenu no lulimi. Kumona mwaleta muambelo oku kana kuyuvahala, ngepi eyi mwa kuamba mu mupepo. ¹⁰ Mo ili ikuta yo kulishiya-shiya muno mu kaye, kalo kwithsa sho kukana kuwana eli sha keile. ¹¹ Unone kumona kani limuka shikuta eli shakeile kenge naku kala muka kuenda ku muambelo, kalo muka kuamba kenge akukala muka kuenda ku kwange. ¹² Ne eci yamwe. Eci eli muna otela kufota ipiwa yo mupepo, mufote yo ingi eyi yi umba chechi eci muwane nene. ¹³ Ne oyu amba ko lulimi a lombela eci atweshe ku tutulula. ¹⁴ Mukonda nga na lombela ko lulimi, mupepo wange wa lombela, unone mayalo ange kapaka oshuka. ¹⁵ Ngepi eli nikwama? Kenge na kulombela no mupepo wange, unone kenge kalona ku lombela no mupepo wange, kalo kenge kalo na kwimba no mayalo ange. ¹⁶ Shianga kengeyo, nga wa shangala Nyambi no mupepo, ngepi waya ali kunyonga amba "Amen" kumona wa piwa sho kukandelela nga kalimuka eyo o amba? ¹⁷ Mukonda owe shemwa wa shangala shiwa, unone muenjoye ko mumbu. ¹⁸ Na shamgala Nyambi mu kuamba ko malimi nene kumipita mwahe. ¹⁹ Unone mu chechi kenge na kuamba maywi mutanu no kuyuvishisha kwange eci ni wane ku fundisha wa mweya, kupita maywi o ita makumi likumi omu malimi. ²⁰ Apange, mwakala anuke mu mayalo enu. Unone, ko yo yimango, mukale eci anuke. Uno mu mayalo mukale akulu. ²¹ Mu mulao kuna n'oliwa, "Ko akwelume o malima oenda kalo ko milomo thzo akwa kuenda kenge na ku amba kowa anu. Shianga panotuli ka kuniyuva." kwa amba Fumu. ²² Ne honi, malimi shimonisha, kali kwa ka kutawa, unone kwa aka ku kana ku tawa. Unone upolofita po shimonisha, kali kwa aka kukana ku tawa, unone kwa aka kutawa. ²³ Kumona, nehoni, chechi thzo thzihe thza keya pofoci kalo wahe amba mu malimi, kalo waya ana kana kulimuka kalo no waya ana kana kutawa akeya mukaci, ka kuamba eci mwa thzaluka? ²⁴ Unone nga mwahe namu polofita kalo munu oku kana kutawa nji munu oku ku limuka na engena mukaci, kenge aku tawa koyi ana yuvu yo yihe a na yuvu yoyihe. Kenge aku atuliwa koyi ina ambiwa yoihe. ²⁵ Yiya ana thzindi yo kumucima wenji kenge ya kuholoka. ku ma maneneno, kenge nga akuwa ko lupala lwenji kalo ku lombela Nyambi. Kenge aku amba eci Nyambi yo shemwa mwali mukaci kenu. ²⁶ Ine yihatako, apange? Apa mukeya pofoci, munu no munu oli no lisamu(limbo), kufundisha, kuhokola, lulimi, nji kututuluka yo malimi. Mukwame yo yihe eci muumbe chechi. ²⁷ Kumona yumweya amba mu lulimi, ku ambe eli nji shianga ahatu, munu no munu ahukele, kalo ne yumweya atutulula ina ambiwa. ²⁸ Unone kumona kwithsa oku tutulula, munu no munu atu twale mu chechi. Mushiye munu no munu aliambele yo shinda kalo no kwa Nyambi wenji. ²⁹ Mushiye mapolofita eli nji ahatu kuamba, kalo mushiye wa mweya kutenda no kuatula koyi yi na ambiwa. ³⁰ Unone nga koili eyi ahokola oyu na kala, mushiye omatatekelo eci atu twale. ³¹ Mukonda muhe kukwenu a polofite yofoci yo foci eci munu no munu alifundishe kalo wahe afundishiwe. ³² Mokonda mipepo thzo apolofita thza vusiwa ku mapolofita. ³³ Mukonda Nyambi kali Nyambi okulwa, unone okuliyala olyo mulao mu machechi o ana Nyambi. ³⁴ Ambuyama otutwale mu ma chechi. Mukonda kapiwile okolo o kuamba. Unone a lipake kushi, eci mulao eli amba. ³⁵ Kumona ko shili shimweya eshi afota ko nyanyami kuli fundisha, epule anu woo ku liumbo. Mukonda mbuyama ka loilile kuamba mu chechi. ³⁶ Apa muvuso wa nyambi wa tunda kukwenu? Yamwe pohuma na liwana? ³⁷ Kumona yu mweya anekela yo shinda kukala mupolofita nji muka mupepo, alimuke eci enu ni min'olela ya kutumina Fumu. ³⁸ Unone kumona yumweya ka nangula eyi, mu shiye anangula. ³⁹ Nehoni, andengenu, muhime nene upolofita, kalo mwa kwangisha yu mweya ku amba mumalimi. ⁴⁰ Unone mushiye inu ikwamiwe shiwa mu mulao.