¹ Ko shipiwa sho mupepo, apange, kanifotile ci, mukane kulimuka. ² Muna limuka ci ou namukala muumango, hime namuendishiwa ko athzimu okukana kuamba, momuhe omu namuendishiwela kukwo. ³ Nehoni nafota ci mulimuke ci kwithsa munu oyu amba ko mupepo wa Nyambi oyu twesha kuamba ci, ''Jesu onakutiwa.'' Kwithsa oyu twesha kuamba ci, ''Jesu po Fumu,'' hime ko mupepo oukenu. ⁴ Honine kuli ipiwa yo kulishiya-shiya, unone mupepo po ofoci. ⁵ Kuli kulishiya-shiya mu ekwama , unone Fumu po yofoci; ⁶ kalo kuli ekwama yo kulishiya-shiya, unone Nyambi yofoci yoliyo kwama mu enu yoihe. ⁷ Nehoni munun no munu onapiwa kulimonahalisha ko mupepo ci anu wahe awane okwathsi. ⁸ Mukonda munu yumweya onapiwa ko mupepo liywi lyo unyanyami, ne yumweya onapiwa liywi lyo kulimuka ko mupepo ofoci. ⁹ Yumweya apiwa shitawo ko mupe o kulipitula ne yumweya shipiwa sho kupolisha ko mupepo ofoci. ¹⁰ Yumweya apiwa sipiwa sho ekwama ikomokisha, ne yumweya kupolofita. Yumweya onapiwa kutwesha kulimuka mipepo, yumweya kuamba mu malimi o kilishiya -shiya, ne yumweya apiwa kutwesha kutoloka ei iambiwa mu malimi oku lishiya-shiya. ¹¹ Yoihe ei ekwama yo mupepo ofoci pohuma, ou upa ipiwa ku munu no munu, komu ahangulela. ¹² Mukonda eci eli elama yofoci ili no enu yoingi kalo enu yoihe ya elma yofoci, moliyo anakalela no Kilesite. ¹³ Mukonda ko mupepo ofoci twaheno tuna kolovethziwa mu elama yofoci, shanga ci mwa Majuda nji mwa Magerike, shanga ci o mupika nji o muka kuliyala, kalo twaheno tunanu ku mupepo ofoci. ¹⁴ Mukonda elama kali shinu shofoci, unone yoingi. ¹⁵ Ngeci liulu lya amba ci, ''Amona kali no lyoko, kanili ku elama,'' nalyo lya ku elama shanga kengeyo. ¹⁶ Kalo ngeci litwi lya amba ci, ''Mukonda kali no lithziho, kanili ku elama,'' nalyo lya ku elama shanga kengeyo. ¹⁷ Nga elama yoihe po lithziho, kupi okunga kutunda maano oku kuyuva? Nga elama yoihe po litwi, kupi nga kukala ku nuka ko enu. ¹⁸ Unone Nyambi onapaka enu yoihe, shinu no shinu, onashipaka mu elama omu ahimena. ¹⁹ Yoihe nga shinu shofoci, oku nga ikala elama honi kupi? ²⁰ Nehoni enu po ingi, unone elama yofoci pohuma. ²¹ Lithziho kalitwesha kuambela lyoko ci, ''Kanikufotile.'' Shanga mutwi kautwesha kuambela maulu ci, ''Kanikufotile.'' ²² Unone enu yo elama ei imonahala kupila okolo yoliyo ifotahala nene, ²³ kalo enu yo elama ei tu anekela ci kailemekiwa, yoliyo tulemeka nene, kalo enu tuyuvela honyi yoliyo ailemekiwa nene. ²⁴ Honi enu yetu ei imonahala kaifotile shimweya. Uno honi, Nyambi onavandakana elama no kupa lilema lyoshokulu ku enu inaipili. ²⁵ Naningi kengeyo ci katele kukale kulihanda mu elama, unone ci shinu no shinu shimamele shingenjasho ou shikala no ukalu. ²⁶ Ne shinu shofoci ou shikola, enu yoihe yakola; nji shinu shofoci ou shilemekiwa, enu yoihe ya nyanyuka. ²⁷ Honi yamwe mwa elama ya Kilesite kalo mwa enu yo elama yenji. ²⁸ Ne Nyambi onatatekela kupaka apositola mu keleke, omushili apolofita, omushihatu aka kufundisha, ne onapaka awa akwama ikomokisha, nawa akwama ekwama yo kuendisha, nawa ali no malimi o kulishiya-shiya. ²⁹ Ei ne wahe apositola? Ei ne wahe apolofita? Ei ne wahe aka kufundisha? Ei ne wahe akwamanga ikomokisha? ³⁰ Ei ne wahe ali no shipiwa sho kupolisha? Ei ne wahe ambanga mu malimi o kulishiya-shiya? Ei ne wahe atwesha kutoloka malimi o kulishiya-shiya? ³¹ Mufote nene ipiwa yo ikulu. Ne honi kenge nimimonisha likun'wa lyo liwa.