¹ Mukale aka kunitamenena, weci ame apa ninakala muka kutamenena Kilesite. ² Honi namishangala mukonda mwani anekela mu enu yoihe. Namishangala mukonda mwakwata no kumamela ifundisha yange omu ninami fundishela yo. ³ Honi nafota ci mulimuke ci Kilesite yoliyo mutwi o mukwelume yomuhe, ci mukwelume yoliyo mutwi o mbuyama, kalo ci Nyambi yoliyo mutwi wa Kilesite. ⁴ Mukwelume yomuhe oyu lombela nji kupolofita kunathsiki mutwi wenji ashaula mutwi wenji. ⁵ Unone mbuyama yomuhe oyu lombela nji kupolofita kunakana kuthsika mutwi wenji ashaula mutwi wenji. ⁶ Muoknda kwalipitula eci mutwi wenji unateuliwa. Ngeci mbuyama kasiki mutwi wenji atetele huki thzenji kukala thzothzipi. Ngeci kakutawa ci mbuyama ateule ku muwti wenji nji kutetela huki thzenji, alithsike shimweya ku mutwi wenji. ⁷ Mukonda mukwelume kaloelile kuthsika mutwi wenji, inene aye yoliyo shihanga no kutethzima kwa Nyambi. Unone mbuyama yoliyo kutethzima kwa mukwelume. ⁸ Mukonda mukwelume kamukwamine kutunda pa mbuyama. unone mbuyama yoliyo akwamine kutunda pa mukwelume. ⁹ Mukonda kuwelume kamuumbile ci wa mbuyama. Unone, mbuyama yoliyo aumbile ci wa mukwelume. ¹⁰ Eshi sholiyo shileta ci mbuyama aloela kukala no shinu kumutwi kumonisha ci aendishiwa, mukonda o man'eloi. ¹¹ Shanga kengeyo, kwa Fumu, mbuyama kali imanenine kutunda kwa mukwelume, shaanga mukwelume naye kali imanenine kutunda kwa mbuyama. ¹² Mukonda eci eli mbuyama atunda kwa mukwelume, no mukwelume naye atunda kwa mbuyama. Ne enu yoihe yatunda kwa Nyambi. ¹³ Muatule amwe mwashinda: Kunaloo ci mbuyama alombele kwa Nyambi mutwi wenji kounakana kuthsikiwa? ¹⁴ Kali shanga wikalo wamifundisha ci ngeci mukwelume oli no huki thzothzile, ali shaula shinda? ¹⁵ Kali shanga wikalo wamifundisha ci ngeci mbuyama oli no huki thzothzile, kutethzima kwenji? Mukonda huki thzenji thzinapiwa kukwenji eci shokulithsika. ¹⁶ Unone ngeci kwali oyu fota kukanan pei, katuli no mukwameno umweya, shanga makeleke a Nyambi kali no mukwameno umweya. ¹⁷ Unone pei nimitongwela, kanimishangala, Mukonda ou muliwana pofoci, kali ci mwaloisha unone mwaipisha. ¹⁸ Mukonda mukutateka, nayuva ci ou munaliwanaga mu keleke, kwakalanga kukana kuliyuva mukaci kenu, kalo kumweya natwesha kutawa. ¹⁹ Mukonda kwaloela kukala kukana kuliyuva mukaci kenu ci, awa ali no niti alimukiwe mukaci kenu. ²⁰ Mukonda ou munaliwananga, kali ci mwalyanga mulalelo wa Fumu. ²¹ Ou munalyanga, munu ku munu alya ilya yenji angenjenji kwashime kulya ilya yo. Yumweya onafu njala, yumweya onapende. ²² Kamuli no manjiyo mo kulyela no kunwena? Mwa shaula keleke thza Nyambi no kuenisha awa anapili shimweya? Ine niamba kukwenu? Nimishangale nji? Kanimishangala pei! ²³ Mukonda natambulile kwa Fumu eyo ninamipa name, ci Fumu Jesu, mu ushiku ou amupitekile, kuma ashimbile ishima. ²⁴ Ou amanine kulombela waingomaunine no kuamba ci, ''Ei elama yange, mushimbe mulye. Mukwame kengeyo kuni anekela.'' ²⁵ Mumukwameno ofoci washimbile nganja munyima thzo mulalelo, ne ayepo amba ci, ''Ethzi nganja woliyo umbusha oupe mu unyinga wange. Mukwame kengeyo popahe apo munwena, kuni anekela.'' ²⁶ Mukonda shikati no shikati eshi mulya ishima no kunwa omu munganja, mwa amba lifu lya fumu kukakuma apa akuyela. ²⁷ Honine, yomuhe, oyu lya ishima ya Fumu no kunwa mu nganja thza Fumu mukukana kuloela kenge akala no mulandu o ilama no unyinga wa Fumu. ²⁸ Munu alithzingule tango yofoci, mbeci alye ishima no kunwa mu nganja. ²⁹ Mukonda oyu lya no kunwa ko kupila kulimuka elama alya no kunwa katulo thzenji. ³⁰ Eshi sholiyo shileta ci owangi mukaci kenu afokola no ku kola kola kalo wamweya kukwenu anafu. ³¹ Unone ngeci twalithzingula twashinda, katwa kuatuliwa. ³² Unone ngeci twa atuliwa ko Fumu, tunakanishiwa, ci twa kuatuliwa pofoci no kano kaye. ³³ Honine, apange, ou muliwana pofoci kulya, mulitatelele. ³⁴ Ngeci kwali nafu njala, alye kunjiyo thzenji, ci kuliwana kwenu kwamiwanisha katulo. Ne pa enu imweya na mun'olo, kenge nanimitoingwela apa nikeya.