¹ Kanihimine ci mukane kulimuka, apange, ci atata wetu wahe kuma akalile mushi thzo livui kalo wahe kuma ayavukile liwate. ² Wahe kuma akolovethziwile ko Mushe mu livui no muliwate, ³ kalo wahe kuma alile shilya shofoci sho mupepo. ⁴ Wahe kuma anwine meyu o ofoci o mupepo. Mukonda kuma anwine meyu atundile mu liwe lyo mupepo eli lyawa shupwelile, ne elyo liwe neli Kilesite. ⁵ Unone ungi wo Nyambi kanawa kata, ne ivimbi yo kuma nailihanda mu lihalaupa. ⁶ Honi ei enu mamoneno kukwetu, ci twa kwama enu yoimango eci awo eli akwamine enu yoimango. ⁷ Lelo mwalombela athzimu o kulikwamena, eci eli akalile wamweya kukwo. Eci eli kuna n'oliwa ci, ''Anu kuma akongomanine pashi kulya no kunwa, kalo no kukatuka kupepa.'' ⁸ Lelo twakwama ohule, eci owangi kukwo eli akwamine. Muliyuwa lyofoci anu okukuma pa makumi o maukmi eli nomakumi ahatu o ita kuma afile mukonda wo ohule. ⁹ Hianga Kilesite lelo twamueleka, eci eli amuelekile ungi wo ne kuma apaiwile ko mayoka. ¹⁰ Kalo mwavilaela, eci eli akwamine ungi wo ne kuma apaiwile ko lin'eloi llyo kupaa. ¹¹ Honi ei kuma yakwamahalile kukwo eci ikale mamoneno kukwetu. Kuma nain'oliwa kutongwela yatwe- atwe tunakeyeliwa ko mahulelo o kaye. ¹² Honine, yomuhe oyu anekela ci onemana amamele ci kau. ¹³ Kwithsa ieleko(miliko) inamikeyela ei inakananga kukeya kwa anu wahe. Unone Nyambi a sepahala. Katwesha kumishiyelela ci muingene mu ieleka ei mukana kutwesha. Ko ieleko eyo kalo kenge amipa mokutwesha kutundelamo, ci mutweshe kuli tanalisha mo. ¹⁴ Honine, ahemiwa ange, mutunde ku kulombela athzimu okulikwamena. ¹⁵ Na amba kukwenu eci anu awa ayuvishihsa, honi muatule ei niamba. ¹⁶ Nganja thzo fiyauthzi ethzi tufiyaula, eine kali woliyo unyinga wa Kilesite? Ishima ei tukuyaula, kali yoliyo ela ya Kilesite? ¹⁷ Mukonda kuli ishima yofoci pohuma, atwe twaangi twa elama yofoci. Twa lya ku ishima yofoci twaheno pofoci. ¹⁸ Mumone Isilaele ko kuthza ko nyama. Awa alya nupu kali awa anakalanga ku aletare? ¹⁹ Nehoni ine niamba? Ci muthzimu o kulikwamena shinu? nji ilya ina nyembuliwa ku athzimu shinu? ²⁰ Unone na amba yo enu ei anyembula, ci apa ei enu ku mipepo thzothzimango kali kwa Nyambi. Kanifotile ci mukwame no mipepo thzothzimango! ²¹ Kamutwesha kunwa mu nganja thza Fumu no mu nganja thzo mipepo thzothzimango. Kamutwesha kulya ku methsa thza Fumu no ku methsa thzo mipepo thzothzimango. ²² Nji twashawethza Fumu ci ayuve shipululu? Twa akolo kumupita? ²³ ''Enu yoihe inatawethziwa,'' unone kali enu nyoihe ei ikwathsa. ''Enu yoihe inatawethziwa,'' unone kali enu yoihe ei ikwama shuwana munu. ²⁴ Kwithsa munu oyu loela kufota yoiwa kukwenji pohuma. Unone munu no munu afote yoiwa kwawa anatungu no. ²⁵ Mulye enu yoihe ei iulishiwa mu musika kokukana kuipula iipula yo kuhima. ²⁶ Mukonda ''kaye ka Fumu , nei ilimo yoihe.'' ²⁷ Ngeci munu okukana kulitawa ayepo nakuisha ci okalye nenji, ne wahima kuthza nenji, olye yoihe akakupa kokukana kuipula ipula yo kuhima. ²⁸ Unone ngeci munu ayepo kuambela ci, ''Ei ananyembuliwa athzimu,'' lelo mwailya, mukonda o yu namilimukisha no mukonda o kuhima- ²⁹ kuhima kwa munu yumweya, na amba ci, kali koye. Mukonda kuliyala kwange ine nga kuatuleliwa ko kuhima kwa mungenjange? ³⁰ Ngeci nalya shilya ko nihima, ine ninyathzeliwa pashinu eshi ninskandelela? ³¹ Honine, hianga ou mulya nji kunwa, nji enu yoihe ei mukwama, mukwame enu yoihe ci Nyambi ashangaliwe. ³² Mwanyathziwa kwa Majuda no ku Magerike no ku keleke thza Nyambi. ³³ Eci eli nieleka kukwama shuwana anu wahe mu enu yoihe. Kanifotile ci niwane okwathsi, unone ci anu owangi awne okwathsi. Nakwama ei ci ayoyishiwe.