1 Tekwesha ukupanga utulubi, nangu ukwimika icintu conse ukuba icakupashanya nangu ukupanga lilbwe ukuba ilya mushilo, kabili tekwesha ukwimika ilibwe ilyabaswa bwino mu calo cenu nokulalifukamina, ninebo Yahweh Lesa wenu. 2 Kabili mulesunga amasabata yandi nokucindika incende yandi iyamushilo . Ninebo Yahweh. 3 Nga mwakulaendela mumafunde yandi nokukonka ifipope fyandi, 4 lyena nebo nkalamupela imfula panshita iyalinga; nomushili uwakwete ifisano, nefimuti fyamumabala fikaseka ifisabo ifisuma. 5 Ukusokola kwenu kuli nokukonkomesha mpaka ne nshita yakusombola, nokusombola kwenu kukafikafye namunshita yakubyala. Mukalalya imikate nokwikuta nokwikala umutende mu mayanda yenu mucalo cenu. 6 Nebo nkamupela umutende mucalo cenu; kabili mukalalala umutende ukwabula ico mukalatina, Nebo nkafumya inama shonse ishabipa mucalo cenu, kabili tamwakabe ukwipayana mucalo cenu. 7 Mwebo mukalatamfya abalwani benu. Kabili mukalabepaya nokubacimfya. 8 Abali basano muli mwebo bakalatamfya abali umwanda umo, nabali umwanda umo bakalatamfya abali imyanda ikumi limo; abalwani benu bakaba ukutali na mwebo mukutina ukubepaya. 9 Nebo nkalolesha pali mwebo kabili nkamipela ubufyashi ukuti mukafule; nebo nkasunga icipangano kuli mwebo. 10 Mukalalya ifyakulya mwasungile inshita iitali mukalafumya ifyakulya mwasungile mumatala pamulandu wakushako incende yakubikako ifyandakai. 11 Nebo elyo nkabika icukulwa candi pakati kenu mwebo, kabili nshakamitendwe mwebo. 12 Nebo nkalaenda pamo namwebo nga Lesa wenu, namwebo mukaba abantu bandi. 13 Ninebo Yahweh Lesa wenu, uwamifumishe mucalo ca Egupito, pakuti mwiba abasha babo. Ninebo naputwile ifikakilo fyabusha kuli mwebo pakuti muleyendelafye abaololoka. 14 Nomba nga cakuti tamumfwile kuli nebo, nokukana umfwila amafunde yandi, 15 nga mwakana ifipope fyandi nokusula amafunde yandi, nakabili mwakaana ukumfwila amafunde yandi, lelo mwaonaula icipangano candi- 16 mwebo ngamwaicita ifintu, lyena nanebo nkacita ici kuli mwebo: nkamiponesha amafya pali mwebo, amalwele ayampepo ayakulenga amensso yenu ukonaika mpaka nefwa yenu. Mukalabyala imbuto lelo mukalaicushafye, pantu abalwani benu ebakalya ifisabo. 17 Nkalolesha icinso candi pali mwebo, kabili mukabulwa amaka pabalwani benu. Abantu abamipata ebakalamiteka, mukalabutuka, ilyo takuli ulemipepeka mwebo. 18 Nga cakuti napanuma yakucita ifi fyonse tamumfwile kuli nebo, lyena nkamipanika pabubifi bwenu imiku ukucila cine lubali. 19 Nebo nkamipwisha ifibumba fyenu namaka yenu. Kabili nkalenga umulu ukuba kwati cela ne calo ukuba ngo mukuba. 20 Amaka mukalabomfya mumilimo yakaba yakuicushafye, pantu impanga tayakalefumya ubusomboshi, nefimuti fyamumpanga tafyakalefumya ifisabo. 21 Nga mwakana ukwendela pamo nanebo nkatwalilila ukukana umfwa kuli mwebo, nebo nkalundapo amafya pali mwebo imiku cine lubali, ukulingana nokubifya kwenu. 22 Nebo nkatuma inama ishakalipa pali mwebo, isho ishikamisendela abana benu, ukonaula ifitekwa, nokumilenga ukuba abanono mumpendwa pakuti imisebo ikabule abakwendamo. 23 Nelyo line ifi fyonse tafilengele mwebo ukungufwila nokwendela pamo nanebo, 24 lyena nanebo wine nkamipilibukila nanebo nemwine nkamipanika imiku cine lubali pamulandu wabubifi bwenu. 25 Kabili nkaleta pali mwebo ulupanga lwacilandushi pamulandu wakonaula icipangano candi. Elyo nga mwabutukila mumisumba yenu, na nebo nkatumamo amalwele muli mwebo, elyo kabili nkamiposa mumumwe yabalwani benu. 26 Elyo nkaputula impendwa yafyakulya fyenu, banamayo abali ikumi limo bakalabomfya ibuku limo ukulapanga imikate, bakamipimina imikate, pakuti mukalelya ukwabula ukwikuta. 27 Nely line nga mwakana ukumfwa kuli nebo panuma yaifi fintu, Nokukonkonyapofye ukukana endela pamo nanebo, 28 lyena nanebo nkamyalukila mucipowe, kabili nkamipanika pa bubifi bwenu imiku cine lubali. 29 Kabili mukalalya imibili yabana benu abaume; kabili mukalalya imibili yabana benu abanakashi. 30 Nanebo ndinokonaula incende shenu ishapamulu, nkalowa ifibumba fyamalambo yenu, nkatulika ifitumbi pamulu watulubi twenu, nebo nkamisula mwebo. 31 Nebo nkapilibula imisumba yenu ukuba ifibolya kabili nkonaula ififulo fyenu ifyamushilo. Kabili nshakatale ukupokelela icena icanunkila bwino ukufuma kumituulo yenu. 32 Nebo nkonaula icalo cenu, icakutila abalwani benu bakalapapafye. 33 Nebo nkamulenga ukuba abasalangana mumitundu, kabili nkaleta pali mwebo ulupanga nokumipesha bonse. Necalo cenu cikashala icibolya, ne misumba yenu ikonaika. 34 Elyo lyena icalo cikashala cilesefya mumasabata imyaka yonse ilyo cikashala icatalalilwa mu calo cabalwani benu. Muli iyo nshita, icalo cikatusha nokusefya amasabata. 35 Cikulufye cashala icibolya, elyo cikatusha, pantu cikalatuusha munshiku shamasabata isho tacaletuusha, ilyo mwaleikalamo. 36 Bonse abakashalapo abali muli mwebo mucalo cabalwani benu, nkatuma umwenso mukati kamitima yenu pakuti nangu ciunda camabula ngomwela wapupa cikale mibutusha, mukaletinafye ngefyo mwingatina ulupanga, nokupona panshi, libe nangu tapali umipepeke. 37 Mukalainyantaulafye nokuipuntula kwati muli mukubutuka ulupanga, nangu cakuti tapali ulemipepeka. Tamwakakwate amaka yakwiminina nabalwani benu. 38 Mwebo muli nokulobelafye mukati kamitundu, nokushikwa mucalo cabalwani benu. 39 Pali mwebo abakapusunsukapo nabo bakaloba pamulandu wabubifi bwabo, mulya mwine mu calo cabalwani babo, napamulandu wakulundilako kwa bubifi bwabafyashi babo. 40 Lelo ngabalapila kububifi bwabo nakububifi bwabafyashi babo, nakupondoka uko bampondokele nebo, nakukukana endela pamo nanebo- 41 ifyalengele nebo pakutimbalukile nokubaposa mucalo cabalwani babo- ngacakuti abashasembululwa imitima baisa nokuicefya, nakabili basuminisha ukupanikwa pabubifi bwabo, 42 awe lyena nanebo kebukisha icipangano candi ico twapangene na Yakobo, icipangano candi ico twapangene na Isaki, neco twapangene na Abrahamu; pamo pene, nketa incende kukuyangwa. 43 Icalo cenu cili nokushala kuli mwebo, pakuti cikasekelele amasabata pantu cashala icibolya. Baka kandilwapo nokupelelwapo umulandu pantu abene bakana ukukonka ifipope fyandi elyo bakana nokusunga amafunde yandi. 44 Lelo panuma yaifi fyonse, ilyo bacili mucalo cabalwani babo, nebo nshakabalekeleshe, nangulafye ukubonaula umupwilapo ninshi naonaula icipangano twapangene nabo, apo ninebo Yahweh Lesa wabo. 45 Nomba pamulandu wabo nebo ndinokwibukisha icipangano twapangene nefikolwe fyabo, abo nafundile mucalo ca Egupito pa cinso camitundu, pakuti nebo mbe Lesa wabo. Ninebo Yahweh. 46 Kanshi aya emafunde, ifipope, kabili nefikomo ifyo Yahweh abikile pakati kakwe nabantu abamu Israele palupili lwa Sinai ukupitila muli Mose.