¹ Yahweh alandile kuli Mose palupili lwa Sinai, alandile ati, ² "Landa ku bantu abamu Israeli utile kuli bena, 'ilyo mukengile mu calo ico ndepeela kuli mwebo, lyena icalo conse cifwile ukusunga isabata lyakwa Yahweh. ³ Pamyaka mutanda mukalebyala amabala yenu, namu myaka mutanda nebo emo mukaletombwela amabala yenu nokusombola ifisabo fyenu. ⁴ Lelo mumwaka walenga cine lubali, icalo conse cifwile ukutuusha mumwaka uwe Sabata, Isabata lyakwa Yahweh. Tekwesha ukubyala amabala yenu nangu ukutombwela ifisabo. ⁵ Tekwesha ukusombola icintu conse icikaimenenafye icine, nangu ukusombola imyangashi iyo tammwatombwelele. Pantu ukaba mwaka wakutuusha impanga. ⁶ Conse icaimenena mu mabala yenu mu mwaka wakutuusha uwe sabata ecikaba icakulya cenu bonse. Mwebo, mwe babomfi abaume na banakashi, nakubabomfi bamallipilo nakubeni abo mwikala nabo mukakolonganike ifyakulya, ⁷ kabili nakufitekwa fyenu naku nama shamumpanga shikalalya ifikafuma muli iyi mpanga. ⁸ Mukalependa amasabata cine lubali aya myaka, emukutila, imiku cine lubali imyaka cine lubali, pakutila mube amasabata cine lubali mumwaka, yakalingane ne myaka amakumi na pabula. ⁹ Lyena ubushiku bwalenga ikumi mu mwenshi walenga cine lubali mukalishe ipenga mpanga yonse. Napa bushiku bwakufutilapo ifyabubifi napo pene mukalelisha ipenga mpangafye yonse mu calo cenu. ¹⁰ Mukalemona umwaka yalenga amakumi yasano wakwa Yahweh kabili mukalebila ukulubuka kwamuntu onse mucalo conse. Ukaba umwaka wabuntungwa kuli mwebo, umo ifipe no musha bafwile ukubwelela kulupwa lwabo. ¹¹ Umwaka walenga amakumi yasano ukaleba mwaka wa buntungungwa kuli mwebo. Tekwesha ukubyala nangu ukusombola ifyaimenene ifine. Ukulya ifyaimenene ifine fyeka, nangu ukusaba ku myangashi musha tombwelele. ¹² Mwaka wa buntungwa, uwaba uwamushilo kuli mwebo, mufwile ukulya ifisabo ifikaimenena ifine ukufuma mumabala yenu. ¹³ Muli uyu wine umwaka uwakusefya umuntu onse nefipe akabwekelemo kumyabo. ¹⁴ Ngacakuti washitisha impanga kumwina mupalamano nangu washita impanga ukufuma kumwina mupalamano, tekwesha ukuyumfwa nangu ukufyengana. ¹⁵ Nga washita impanga kumwina mupalamano, uli nokupeenda imyaka ne fisabo wasombolamo mpaka namukusefya kwakonkapo. Nomwina mupalamano wakushitishe impanga ali nokukonkamo ifyo fine. ¹⁶ Nga cakuti imyaka yashalako ingi ukufika namukusefya kwakonkapo ufwile ukulundapo umutengo wa mpanga, nomba imwaka nga inono ukufika mukusefya kwa konkapo lyena ali nokucefyako umutengo, pantu impendwa yabusomboshi ubo impanga ilefumya ilekonka nemyaka pantanshi yakusefya kwa konkapo. No mwina mupalamano wakushitishe impanga nao ali nokukonka ifyo fine. ¹⁷ Tekwesha ukuyumfwa nangu ukulufyanya umunobe; cilingile ukukwata akatina kuli Lesa, ninebo Yahweh Lesa wenu. ¹⁸ Eico muleumfwila ifipope fyandi, ukusunga amafunde yandi nokuyakonka yonse. Lyena elyo mukekala umutende mu calo. ¹⁹ No mushili wabamo ukalatwala ifisabo ifisuma, mukalalya nokwikuta kabili mukalaikala umutende mu calo. ²⁰ Limo kuti mwatila, "Bushe tukalya finshi mumwaka cine lubali? Moneni, nga tatubyele nokusombola ifisabo." ²¹ Nebo nkakonkomesha amapalo ukwisa pali mwebo pamyaka mutanda, pakuti mukasombole ifisabo ifingi pamyaka itatu. ²² Mukabyala ifisabo mumwaka walenga cine konse konse no kukonkanyapofye ukulya ifyafuma mumwaka wafumako ifyo mwasunga. Mpaka ukusombola ifisabo fyamumwaka walenga pabula fyasombolwa, mukalalya ifyo mwasombwele mumwaka wafumako. ²³ Kabili tekwesha ukushitisha impanga ukuba iya umbi lyonse, pantu iyi mpanga yandi. Imwe mulifye abene abasuminishiwa ikwikalamofye. ²⁴ Impanga iyo mwapeelwa ngecikwatwa cenu; mufwile ukuipekanya ngo mulupwa ifyakulubula impanga yenu. ²⁵ Ngacakuti umwina Israele munenu umo umupina elyo ashitisha impanga yakwe pamulandu waico, lyena uwa mulupwa uupaleme afwile aisa lubula iyi mpanga. ²⁶ Nga cakutila nalimo takwetepo nelyo umo uwakumwafwilisha mukulubula iyi mpanga, ²⁷ lelo umwine eka nga aisaba necuma icakuti aililubwilepo umwine, ali nokupeenda imyaka iyo impanga yali nokushala ku washitile nokupeela indalama ishashele ukupela umuntu uwashitile. Ninshi impanga yabwelela kuwali umwine. ²⁸ Lelo ngatakwete indalama shakulubwilamo impanga ku mwine, yena impanga ili nokubelelela kuli ulya wine uwaishitile mpaka ukufika umwaka wakusefya. Mumwaka wakusefya, impanga ili nokubwelela kumuntu uwashitishe, no wali umwine akabwelele mumpanga yakwe. ²⁹ Nga cakuti umuntu ashitisha ing'anda iyaba mulupango mukati kamusumba. Ali nokukwata insambu yakubwesha mu mwakafye umo uutuuntulu ukufuma apo ashitishishe. Mu mumwakafye uutuntulu ali ne nsambu ishakubwesha. ³⁰ Nga cakuti iyo ng'anda tailubwilwe mukati kamwaka uutuntulu, lyena iyo ng'anda iyaba mu lupango mumusumba ili nokubafye yauyo wine uwashitile elyo no lupwa lwakwe. Taili nakubwela nangu nimubushiku bwa kusefya. ³¹ Nomba amayanda ayabafye mumishi ayashakwata impango ishashinguluka yena yabafye nga mabala yamu mpanga. Yena kuti yabweshiwa, yena kuti yabweshiwa pabushiku bwakusefya kwa mwaka. ³² Eico, abena Levi nabakwata insambu ishakuluubula amayanda mu misumba yabo yonse iyo bapeelwa. ³³ Eico kanshi icuma camwina Levi cena calisuminishiwa ukucibwesha kuwashitishe, nangu ning'anda iyashitishiwe iyaba mumusumba ili nokubweshiwa mumwaka uwakusefya, ku mayanda ayaba mumusumba uwa bena Levi ngefipe mubantu abena Israele. ³⁴ Lelo impanga isha shungula imisumba teshakushitisha pantu shena fipe fyabo abena Levi. ³⁵ Ngacakuti umwina mupalamano aba umupina, kabili afilwa ukusunga umwine, mwafweni ngefyo mwafwa abeni nangu bambi abekala kunse ukufuma muli mwebo. ³⁶ Tekwesha ukupingula ukulundapo nangu ukulwisha ukukwata ishakulundapo kuli uyo muntu munshila iyo, lelo muleba nakatina kuli Lesa pakuti munonko atalilile ukwikala namwebo. ³⁷ Tekwesha uku mukongwesha kaloba ya ndalama pakuti ukwatilemo ishakulundapo, nangufye ukumushitisha ifyakulya pakuti upangilemo ishapamulu. ³⁸ Ninebo Yahweh Lesa wenu, uwamifumishe mu calo ca Egupito, pakuti nebo imipele icalo ca Kenani, nokuti nebo mbe Lesa wenu. ³⁹ Nga cakuti umo pabekala calo aba umupina no kuishitisha umwine kuli mwebo, tekwesha ukumulenga alebomba ngo musha. ⁴⁰ Mufwilefye ukumubomfwa ngo mubomfi uwa malipilo. Alifye nga umo uyo mwikala nao. Mukalaikala nao mpaka ukufika mumwaka wakusefya. ⁴¹ Ilyo ali nokuya ukufuma kuli mwebo, ena na bana bakwe bonse pamo, lyena akabwekelemo kulupwa nakuncende yakwa wishi. ⁴² Abo babomfi bandi abo nafumishe mu calo ca Egupito. Tabafwile kushitishiwa nga basha awe. ⁴³ Tekwesha ukubasunga buluku buluku, lelo mukwate akatina kuli Lesa wenu. ⁴⁴ Kubasha abaume nabanakashi, ukufuma ku mitundu iya mishinguluko mwebo, eko mwinga shita abasha. ⁴⁵ Kabili kuti mwashita abasha ukufuma kubena fyalo abo mwaikala nabena, abo ebo mwingaba nabo, abana abafyalilwa mu calo cenu. Abo bena bantu benu. ⁴⁶ Kabili kuli mwabashila, na kubana benu ngefyuma fyacishilamo nokubacita abasha mpaka nemfwa yabo, lelo tamufwile ukusunga buluku bukulu abena Israele banenu. ⁴⁷ Umwinafyalo nangu umweni mwikala naena nga aba umukankala, ngacakuti umunenu umwina Israele aba umupina no kuishitisha umwine ku mwinafyalo, nangu kuli umbi uwa mulupwa lwa mwinafyalo, ⁴⁸ panuma yamwina Israele munenu aishitisha, kuti aibwesha umwine, nelyo umo mu lupwa lwakwe kuti amuluubula. ⁴⁹ Kuti aba ninalume, nangu mwana nalume umwaume, uwinga mulubula ena, nangu umo uyo baikatama ukufuma mu lupwa. ⁵⁰ Nangu, umwine nga akwata ifyakuilubwilapo, kuti ailubula umwine, umwine no washitile bakapeende imyaka uwakusefyamo. Umutengo uwakulubwilwamo uli nokulinga na malipilo yamubomfi uwakutampa, ukukonka ne myaka ine iyo. ⁵¹ Nga cakuti imyaka yafula ukufika mumwaka wakusefya, alifye nokulinganya umutengo wakulubwilapo nemyaka yashalako pakuti alubulwe. ⁵² Nga cakuti kushelefye imyaka inono ukufika mumwaka wakusefyamo, taulafika, alingile nokulinganya umutengo ne mwaka ayashalako. ⁵³ Alingile ukusunga ngo mubomfi wamalipilo cila mwaka. Mushininkishe ukuti shikulu wakwe talemusunga buluku buluku. ⁵⁴ Nangu cingala ukuti uyo talubwilwe munshita shonse, ena ali nokusungwa mpaka pa bushiku bwakusefya, ena pamo nabana bakwe. ⁵⁵ Kuli nebo abantu aba mu Israele babomfi bandi. Babomfi bandi abo nebo nafumishe mu calo ca Egupito. Ninebo Yahweh Lesa wenu."'