¹ Yahweh alandile kuli Mose, ati, " ² Konkomesha abantu abamu Israele pakuti balete amafuta kuli webo ayo bafumya ku Miolifi ayakubomfya mumalampi, pakuti ulubuto luletwalilia ukwaka. ³ Kunse yacisalu cakucingako kumbokoshi yacipangano mucilonganino cakukumaninamo, Aaroni ali nokulamona, ukufuma icungulo ukufika ulucelo, amalampi yali nokulayaka pantanshi yakwa Yahweh. Ili lifunde muli nokulikonka mu bantu munkulo shenu. ⁴ Shimapepo mukalamba ali nokumona ukuti amalampi yaleyaka pacinso cakwa Yahweh, amalampi nefyakutekapo amalampi ifya golide. ⁵ Buula ubunga ubwapelwa bwino upangemo imikate ikumi limo na iibili. Cila mukate ulebomfya utwapekumi tubili kucipimo ca Efa kuli kamo. ⁶ Iyi mikate mukalebika mumisango ibili, mutanda mumusango umo, pamulu wetebulo ilisuma ilyapangilwa na golide pacinso cakwa Yahweh. ⁷ Pamukate onse ulebikamo ifyacena cisuma mumbali mukwimininako umutuulo. Kabili mukwimininako umutuulo uwakoca. ⁸ Shimapepo mukalamba ali nokubika uyu mukate pantanshi yakwa Yahweh pabushiku bwe sabata pantanshi yabantu abamu Israele, mukuba icipangano icamuyayaya. ⁹ Ifi fyonse fili mukuba mutuulo wakwa Aaroni nabana bakwe, kabili bali nokufilila muncende iyamushilo, cili nokuba ifi pafiputulwa fyamutuulo bapeelwa kuli Yahweh ukuba ifyakosa." ¹⁰ Nomba kwali umwana umwaume nyina mwina Israeli, wishi nao ali mwina Egupiti, aile mubantu abamu Israele. Uyu mwana umwaume uwa mumwanakashi wamu Israele aile mukulwa nomwaume umwina Israele mukati kankambi. ¹¹ Elyo umwana mwaume uwa mwanakashi umwina Israele afupwile Yahweh nokumutipa, eico abantu bamuletele kuli Mose. Ishina lyakwa nyina ni Shelomiti, umwana mwanakashi uwakwa Dibidi, uwamulupwa lwakwa Dani. ¹² Elyo bamubikile mukulindwa mpaka bakomfwe ifyo Yahweh akabeba ifyakucita. ¹³ Elyo Yahweh alandile kuli Mose, ati, " ¹⁴ Fumyeni uyo muntu wasalwile Lesa kunse yankambi. Kabili onse uwaumfwileko kumusalula atambike amaboko yakwe pamutwe wakwe, nokuleka nomba ibumba lyonse bamutobe amabwe. ¹⁵ Elyo ulondolole webe nabena Israele ukulanda ati, 'Umuntu onse uwatuka Lesa wakwe alifye nokupelwa umulandu. ¹⁶ Umuntu onse uwasaalula ishina lyakwa Yahweh afwilefye ukuipaiwa. Ne cintu bwingi mucishinka bamutobele amabwe, nangu abefyo umwina fyalo nangu uwamubena Israele. Nga cakuti umo asalula ishina lyakwa Yahweh, afwile ukwipaiwa. ¹⁷ Uuli onse uwaipaya umuntu mubiye, nao wine bafwile ukumwipaya. ¹⁸ Uyo onse uwaipaya icitekwa camubiye, afwile ukumupelelamo cimbi, umweo pa mweo. ¹⁹ Uuli onse ngacakuti acena umwina mupalamano, ifyo fine acita kumubiye efyo nao bafwile ukumucita. ²⁰ Ifupa pefupa, ilinso pelinso, ilino pelino. Ifyo fine umusango acenenemo umubiye efyo naena wine bali nokumucena. ²¹ Uyo onse uwaipaya icitekwa camubiye afwile ukupelelamo cimbi, naonse uwaipaya umuntu nao wine afwile afwa. ²² Ala tufwilefye ukukwata ifunde limoline kumwina fyalo nomwina Israele wine, ninebo Yahweh Lesa wenu."' ²³ Eico Mose landa kubantu abamu Israele, nabasende umuntu ukumutwala kunse yankambi, uyo uusalwile Yahweh. Bamutobele amabwe. Abantu abamu Israele bacitile Yahweh ifyo akonkomeshe Mose.