¹ Yahweh alandile kuli Mose, ati, ² "Eba ulukuta lonse nakubantu abamu Israele, ulande kuli bena, 'Mwebo muleba abamushilo, pantu nebo ne Yahweh Lesa wenu ndiwamushilo. ³ Onsefye afwile ukulacindika nyina pamo nawishi, kabili nokusunanga Isabata lyandi. Ninebo Yahweh Lesa wenu. ⁴ Tekwesha nangu panono ukufuma kuli nebo, nokuyapanga mwebene utulubi utwapangwa nefyela. Ninebo Yahweh Lesa wenu. ⁵ Ilyo muli mukutwala ilambo ilya kwikatana na Yahweh, mulingile ukutwala bwino pakuti liibe ilya suminishiwa. ⁶ Mufwile ukulya mubushikku bwine lyatuulilwapo, nangu ubushiku bwakonkapo, ⁷ nangu fimo fyashalapo ukufika napabushiku bwalenga shitatu, ifyo ninshi fyakubulafye nokoca. Lelo cakuti fyalima fyonse mubushiku bwalenga shitatu, ifyo fintu fyakowela; fyena tafyasuminishiwa, ⁸ eico onse uwalyako ali nokupelwa umulandu pantu asula icamushilo kuli Yahweh, na uyo muntu wakutamfyafye mubantu bandi. ⁹ Ilyo lyonse mulesombola ifilyo mumabala yenu, tekwesha ukupwisha ukusombola monse namumbali yebala lyenu, nangufye ukusolola tonse mwibala lyenu. ¹⁰ Tekwesha ukuya mwibala lya myangashi, nokusaba ifisabo fyamyangashi ifyashele nangu ifyaponene mwibala. Ifi fyose mufwile ukulekala abalanda nabeni. Ninebo Yahweh Lesa wenu. ¹¹ Mwilaiba. Mwilabepa. Mwilacenjeshanya. ¹² Mwilalapa mwishina lyandi umulapo wabufi nokusebanya ishina ilyakwa Lesa wenu. Ninebo Yahweh. ¹³ Wilacitikisha umwina mupalamono obe nangu ukumwibila. Wilasunga amalipilo yamuntu uwakubombela ubushiku bonse ukufika ulucelo. ¹⁴ Wilalapisha nkama amatwi nangu ukubika icakuipumamo kuntanshi yampofu. Mulingile, ukuba nakatiina kuli Lesa obe. Ninebo Yahweh. ¹⁵ Wilaba nalufyengo mubupingushi. Wilawililila kulubali lumo ukucitikisha umupina nokwimya umukankala, nangu ukulanga ubusuma kuli umbi pamulandu wabucindami. Lelo ubupingushi bobe kubena mupalamano bube ubwalingana. ¹⁶ Wilaenda mubantu nokusabankanya ifyabufi, lelo fwailisha bwino pakucingilila ubumi bwamwina mupalamano. Ninebo Yahweh. ¹⁷ Wilapata munonko mumitima obe. Naulinga ukwebaula munonko pacine pakuti bonse mwiwila mukubifya kuno kwine. ¹⁸ Wilalandila pacintu conse icabipa nangufye ukutwalilila ulupato kubantu bobe, nomba mulingile ukulatemwa abena mupalamano ngefyo mwaitemwa mwebene. Ninebo Yahweh. ¹⁹ Mulesunga amafunde yandi. Mwilalenga ifitekwa fibili ifyamitundu iyapusana ukutamfyamya. Tekwesha ukubyala imbuto imitundu ibili mwibala limo. Tekwesha ukufwala insalu yapangwa nemitundu ibili iyapusana. ²⁰ Uyo onse uwalala nomukashana uucili umusha uyo balaya ukupa, lelo uyu mukashana talati alubulwe pakuti abe uwakaele, ali nokupanikwa. ²¹ Lelo talingile ukupingwilwa ukwipaya pantu talaba uwakaele. Lelo umwaume ali nokuleta ubupe bwakwelelwa kuli Yahweh pamwinshi wacilonganino icakukumaninapo- nasukusuku wamutuulo wapabubifi. ²² Elyo shimapepo ali nokubula sukusuku wamutulo wakufutilako uyo muntu pafya bubi acita kuli Yahweh, pabubi ubo acita. Elyo ifya bubifi acitile fili nokwelelwa. ²³ Nomba ilyo mukengila mucalo elyo mukalimba imitundu yafimuti ifya kulya, elyo muli nokumona ifisabo fikalafumako ngafyalileshiwa ukulyako. Pamyaka itatu ifisabo fikaba ifyaleshilo. Tamulingile ukulyako awe. ²⁴ Lelo mumyaka yalenga bune ifisabo fyonse fili nokuba ifyamushilo, ngo mutuulo wakutashishako Yahweh. ²⁵ Namumyaka yalenga busano lyena muli nokulyako ifisabo, na mukulolelako ifimuti ukuti fiseke ifisabo ifingi. Ninebo Yahweh Lesa wenu. ²⁶ Tekwesha ukulya inama icilimo nomulopa. ²⁷ Mwilaipusha imipashi palwabumi, nakabi mwila fwailisha ukupindulula abanenu palwa maka. Tekwesha ukulabeya mumbali yapelela imishishi mumbali yamutwe nangu ukuputula imyefu yenu. ²⁸ Tekwesha ukulakomaula umubili wa muntu wafwa nangula ukulilemba inembo pamubili yenu. Ninebo Yahweh. ²⁹ Tekwesha ukusebanya abana benu abanakashi mukubabika ukuba bansolola, pantu ngamwacita ifyo icalo cikesulamofye bansolola elyo nobubifi. ³⁰ Mulingile mulesunga no kucindika ubushiku bwe Sabata nencende yandi iya mushilo. Ninebo Yahweh. ³¹ Tekwesha ukuya kubantu ababuka nangu ababomba nemipashi. Nga ifyo mwalacita, ninshi bakamikowesha mwebo. Ninebo Lesa wenu. ³² Mufwile lyonse ukuicefya apali abakulu no kulanga umucinshi. No kukwata akatiina kuli Lesa. Ninebo Yahweh. ³³ Nga cakutila muleikala no mweni mualo cenu, tekwesha ukucita ifyabipa. ³⁴ Umweni untumuleikala naena aleba ngo muntu uyo mwafyalwa nao mucalo umo mwikala nao, muli nokumutemwa ngefyo namwebo mwaitemwa, pantu namwebo mwali abeni mucalo ca Egupito. Ninebo Yahweh ³⁵ Mwilacita ubucenjeshi ilyo mulepimina abanenu ifintu muntamfu, mukufulantuka namu bwingi. ³⁶ Bomfyeni ifipimo, ifyakupiminano, ifya Efa, nefya hini. Ninebo Yahweh Lesa wenu, uwamifumishe mu calo ca Egupito. ³⁷ Bakeni amfaunde yandi yonse ne fipope fyandi fyonse, nokuficita. Ninebo Yahwe."'