¹ Yahweh aebele Mose na Aaroni, ati, ² "Ebeni abantu Israele, nokulanda kuli bena ati, 'umwaume onse kumubili wakwe ngakulepompa, ninshi uyo nakowela. ³ Ena ali uwakowela pamulandu wakupompa nangufye umubili wakwe utwalilile nangu uleke ena ali uwakowela. ⁴ Pa busanshi ponse alalapo pali nokuba apakowela, napali conse aikalapo naco cili icakowela. ⁵ Naonse uwikata kubusanshi bwakwe ali nokuwasha insalu shakwe nokusamba umubili onse mumenshi, nokuba uwakowela pakafye ukufika icungulo. ⁶ Kabili uyo onse uwaikala apo uyu muntu uulepompa acikakala, nao wine afwile awasha insalu shakwe nokusamba umubili onse mumenshi. Kabili ali nokuba uwakowela mpaka ukufika icungulo. ⁷ Umuntu onse uwakala kuli uyo muntu uo umubili wakwe ulepompa afwile awasha insalu shakwe nokusamba umubili onse mumenshi, ali nokuba uwakowela ukufika necungulo. ⁸ Ngacakuti umuntu uyo umubili wakwe ulepomba asakila umuntu uwasanguluka amate, lyena uyo muntu ali nokuwasha insalu shakwe nokusamba pamubili mumenshi, ali nokuba uwakowela mpaka ukufika icungulo. ⁹ Ne cintu conse ico uyo muntu aikatako pabulendo naco cine ninshi cakowela. ¹⁰ Uyu onse uwaikala pali ico uyo muntu acikalapo aba uwakowela mpaka icungulo, noyo onse uwapita icintu ico ali nokuwasha insalu nokusamba pamubili mumenshi; ali nokuba uwakowela ukufikafye necungulo. ¹¹ Uyo onse uo umubili uulepompa nga aikata umuntu ukwabula ukusamba kuminwe yakwe namenshi, umuntu uyo aikata afwile ukuwasha insalu elyo nokusamba umubili onse mumenshi, kabili ali nokuba uwakowela mpaka ukufika icungulo. ¹² Nenongo yeloba iyaikatwako noyo muntu uo umubili wakwe ulepompa ifwile yatobwa, necipe conse icapangilwe necimuti cifwile casambwa mumenshi. ¹³ Ngacakuti umuntu uyo umubili ulepompa asanguluka, ali nokulolela panshiku cine lubali epakusanguluka; lyena ali nokuwasha insalu nokusamba umubili wakwe kumenshi ayalepita ninshi uyo muntu asanguluka. ¹⁴ Napabushiku bwalenga cine konse konse uyo muntu afwile abuula utupele tubili notwana twankunda nokwisa pa cinso cakwa Yahweh pamwinshi wacilonganino cakukumaninapo; nokufipela kuli shimapepo. ¹⁵ Shimapepo naena alino kufitula, cimo ngo mutulo wa pafyabubifi na cimbi ngomutulo uwakoca, iyi enshila shimapepo ali nokusangulwilamo uyo umuntu kuli Yahweh pa mulandu wakupompa kwa mubuli wakwe. ¹⁶ Umuntu onse umwaume nga apemena panshi, afwile asamba umubili onse na menshi, ninshi nakowela ukufika icungulo. ¹⁷ Icintu conse icansalu nangu icampapa ico uyo muntu apemenapo cifwile ukuwamishiwa na menshi, kabili cili nokuba icakowela mpa ukufika icungulo. ¹⁸ Kabili ngacakuti umwaume nga alala pamo no mwanakashi nokupema apema, bonse babili bali nokusamba amenshi; baba abakowela mpaka ukufika icungulo. ¹⁹ Umwanakashi ngaaba kumwenshi, ukukowela kwakwe kuli nokuba inshiku cine lubali, kabili noyo onse uwamwikata ali nokuba uwakowela mpaka icungulo. ²⁰ Icintu conse ico alalapo lintu ali kumwenshi naco cine cakowela; naconse ico aikatapo naco cine cakowela. ²¹ Uyo onse uwaikata kubusanshi bwakwe afwile ukuwasha insalu shakwe nokusamba kumwine mumenshi; uyo muntu nakowela ukufika icungulo. ²² Noyo onse uwaikata kucintu ico ekelepo afwile awasha insalu elyo nokusamba umubili wakwe mumenshi; uyo muntu nakowela mpaka ukufika icungulo. ²³ Nangu cibefye busanshi nelyo icintu conse ico ekelepo, nga muntu aikatako, uyo muntu ninshi ali uwakowela mpaka ukufika icungulo. ²⁴ Ngamwaume alala noyo mwanakashi, nefyakowela ifilefuma fyamukumya, uyo muntu aba uwakowela panshiku cine lubali, no busanshi bonse ubo alelepo ninshi bwakowela. ²⁵ Umukashana ngalafuma umulopa panshiku ishingi panshita ashili kumwenshi, nangu ukupompa ngakwapitilila ilyo aba kumwenshi, ali nokuba uwakowela munshiku isho, filya fine aba munshiku shakumwenshi. Uyo mwanakashi ali uwakowela. ²⁶ Nobusanshi bonse alalapo ilyo umulopa ucili uletwalilila ukufuma cimo no busanshi bwalalapo umuwanakashi ali kumwenshi, necintu conse ico aikalapo cili icakowela, ninshi cakowela ngafilya fine ciba ngali kumwenshi. ²⁷ Umuntu onse uwaikata kuli ifyo ali uwakowela; ali nokuwasha insalu elyo nokusamba umwine mumenshi, kabili ali nokuba uwakowela mpaka icungulo. ²⁸ Nomba ilyo uyu mwanakashi asanguluka kukufuma kwamulopa, ali nokulolela panshiku cine lubali, napanuma elyo ali nokuba uwasanguluka. ²⁹ Pabushiku bwalenga cine konse konse uyo mwanakashi ali nokusenda inkunda shibili notwana twafipele tubili nokutwala kuli shimapepo pamwinshi wacilonganino icakukumaninapo. ³⁰ Shimapepo ali nokutuulapo akoni kamo ngo mutuulo wakufuta pabubi elyo nakambi ngo mutulo wakoca, na muli iyo nshila emwakufutilako uyo mwanakashi kuli Yahweh pamulandu wakukowela kwa kufuma umulopa. ³¹ Kanshi muli nokulekanya abantu abene Israele ukufuma kubantu kukukowela kwabo, mukukowesha incende yamushilo, umo twaikala nabo. ³² Ifi efya kucingilila umuntu uli onse uyo umubili wakwe ulepompa, ku mwaume onse uwapemena panshi ninshi uyo muntu nakowela, ³³ kumwanakashi uli ku mwenshi, kabili onse ulepompa, cibe mwaume nangu mwanakashi, noyo onse umwaume uwalala nomwanakashi uwakowela.