¹ Yahweh aebele Mose, ati, ² "Aya emafunde yakukonka pamuntu uwalwala pabushiku bwakuwamishiwa. Ilyo aleletwa kuli shimapepo. ³ Shimapepo ali nokuya kunse yankambi nokuya pima uyo muntu uli nobulwele bwafibashi ukumona ngacakuti napola. ⁴ Shimapepo ali nokukonkomesha umulwele uyo uwawamishiwa ukuleta ifintu fibili ifyamweo, ifyoni fibili ifyasanguluka, icimuti cakeda, nakasalu, elyo tumisambo twa hisopo. ⁵ Elyo shimapepo ali nokukonkomesha uyo muntu ukuti epaile cimo pambale yebumba umuli amenshi ayasuma. ⁶ Shimapepo ali nokusenda ici coni icituntulu icashelepo ne cimuti cakeda, akasalu akakashika notumisambo twa hisopo, nokubika ifintu fyonse, pamo neconi icituntulu, ukubika fyonse mumulopa waconi icaipilwa mumenshi ayasuma. ⁷ Elyo shimapepo akane amenshi pamuntu uulesangululwa kubulwele imiku cinelubali, nakabili shimapepo ali nokubilisha uyo muntu ngowasanguluka. Lyena shimapepo ali nokulekelako iconi icamweo ukuya mumpanga. ⁸ Umuntu uulesangululwa ali nokuwasha insalu, ali nokubeya imishishi, nokusamba umwine mumenshi, elyo alaba uwasanguluka. Panuma yaifyo ali nokwingila munkambi, lelo ali nokwikala kunse yacilonganino panshiku cine lubali. ⁹ Pabushiku bwalenga cine lubali uyo muntu afwile ukumubeya umushishi onse kumutwe, nokubeya imyefu yonse ne nkopyo. Ali nokubeya imishishifye yonse, afwile awasha insalu elyo nokusamba asamba, lyena ninshi aba uwasanguluka. ¹⁰ Pabushiku bwalenga cine konse konse uyo muntu alingile ukuleta utwana twa mpanga tubili utulume utwabula akalema, elyo nakakota kamo akamwaka umo kabula akalema, elyo nafitatu ifyepekumi efa umofye bunga ubwapeleka bwino ubwasankana namafuta ngecabupe, nebotolo limo ilya mafuta. ¹¹ Shimapepo uusangile ukuti uyo muntu nasanguluka ali nokumwimininako ena, pamo nefintu aletele, panshita yakwa Yahweh pamwinshi lyacilonganino lyakukumaninapo. ¹² Elyo shimapepo ali nokubulapo akana kampanga kamo akalume aka mutulo wakufuta pafyabubifi, nebotolo limo ilya mafuta; elyo nokuyatuula pantanshi yakwa Yahweh ngecabupe. ¹³ Shimapepo ali nokwipaila akana kampanga akalume pancende apo bepaila inama shamutuulo wakwelelwa pabubi elyo nomutuulo wakoca, pancende yamushilo, uyu mutuulo wapafya kwelelwa ukumine shimapepo, wakufuta pafyabubifi; kabili fintu ifyamushilo saana. ¹⁴ Shimapepo ali nokubuulapo umulopa umo uufumine kufyamutulo wakufuta pafya bubifi nokumusuba kukalebelebe kakukutwi kwa kukulyo kwa muntu uwasangululwa, nakucisansala cakukuboko kwakulyo, elyo nakucikondo icikulu ica ku lukasa lwaku kulyo. ¹⁵ Kabili shimapepo ali nokubulamo amafuta mwibotolo nokubika lwakukuboko kwakwe ukwa kukuso, ¹⁶ elyo shimapepo akatubike umunwe wakwe wakukuboko kwa kukulyo mumafuta ayali kukuboko kwa kukuso, nokukana amafuta yamo ukubomfya umunwe imiku cine lubali pantanshi yakwa Yahweh. ¹⁷ Shimapepo ali nokubulapo amafuta yamo pashele palupi lwakwe nokusuba kukalebelebe ka kukutwi kwa kukulyo ukwa uyo muntu uulesangululwa, napa cisansala cakuboko kwa kukulyo, nakucikondo cikulu ku lukasa lwakukulyo. ¹⁸ Aya mafuta ali nokubika pamulu wamulopa wa mutuulo wakufuta pafyabubifi. Amafuta yonse ayashala pa lupi lwakwa shimapepo, yali nokubikwa pamutwe wa uulesangululwa, ici ecilenga ukuwikishanya pakati kamuntu uulesangululwa na Yahweh. ¹⁹ Elyo kabili shimapepo nokuleka umutulo wakwelelwa pabubifi uyo wakwimininako pakuti abe uwasanguluka ku fyamukowesha, napanuma shimapepo ali nokwipaya ico cabupe icakoca. ²⁰ Shimapepo ali nakutula umutuulo wakoca no mutuulo wabunga pantanshi. Shimapepo akatumikilai pali uyo muntu, uyo muntu ninshi aba uuwasanguluka. ²¹ Eico, nga cakuti uyo muntu mupina tekuti akwanishe ukupela ilambo, ninshi ali nokuletafye akana kampanga kamo akalume ngo mutuulo wakufuta pafyabubifi nokutambika, kukuba icaku muwamya umwine, necekumi ica efa uwabunga ubusuma ubwasankanamo namafuta ngo mutuulo, nebotolo limo ilya mafuta, ²² pamo ne nkunda shibili notwana twafipele tubili, ifyo engakwatapo; iconi cimo cakufuta pabubifi nacimbi cabupe bwakoca. ²³ Pabushiku bwalenga cine konse konse uyo muntu wawamishiwe alingile aleta ifyo fintu kuli shimapepo, ali nokubuula umwana wa mpanga wamutuulo, nebotolo limo ilya mafuta ya Olifi, nokufimisha mumulu kucinso cakwa Yahweh. ²⁴ Shimapepo ali nokubuula umwana wampanga wamutuulo, nebotolo limo ilya mafuta ya Olife, nokufimisha mumulu kucinso cakwa Yahweh. ²⁵ Shimapepo ali nokwipaya akana kampanga ngo mutulo wapafya bubifi nokubulako umulopa umo nokusuba kukalebelebe kakukutwi kwa kukulyo ukwa muntu uuli mukusanguluka, elyo nakucinkumwa cakukuboko kwa kukulyo, nakucikondo cikulu icakulukasa lwa kukulyo. ²⁶ Elyo kabili shimapepo abike amafuta pa cisansa cakukuboko kwakukuso, ²⁷ elyo atunke umunwe wakukulyo mumafuta yalikukuboko kwakuso nokukana imiku cine lubali pantanshi yakwa Yahweh. ²⁸ Shimapepo ali nakubula amafuta ayashala muminwe nokusuba kukalebelebe kakukutwi akakukulyo kuli uyo muntu uli mukusanguluka, nakucinkumwa cakucisansa cakukulyo, nakucikondo cikulu icakukuso lwa kukulyo, elyo napancende imoine pacibikwa amulopa wamutuulo wakufuta pafyabubifi. ²⁹ Shimapepo ali nokubula amafuta ayashala muminwe nokubika pamutwe waulesangululwa, pakumufutilako kuli Yahweh."' ³⁰ Uyo muntu alinokupela inkunda imo nakana kacipele, ifyo uyo muntu engakosha ukukwata- ³¹ cimo mutuulo wapabubifi na cimbi mutuulo wakosa, pamo pene necamutuulo wa cabuunga. Iyi enshila shimapepo ali nokufutilako uulesanguluka pa cinso cakwa Yahweh. ³² Kanshi aya emafunde yakukonka ku muntu onse uwalwala ubulwele ubwambukila ubwankanda ubwafibashi, nga takwete mutuulo uwakuti bamusangulwilepo." ³³ Yahweh aebele Mose na Aaroni, ati. ³⁴ "Ilyo mukengila mucalo cakenani ico nebo namupele ukuba icenu, kabili nganabika ukufuma ukulunduluka mung'anda yenu, ³⁵ umwine wa ng'anda iyi ali nokweba shimapepo. Alingile ukulanda ati, 'nebo nimbona ifilemoneka kwati fibashi mu ng'anda yandi.' ³⁶ Shimapepo ilyo talati aye kukumona ifyo iyi ng'anda ifufwime ali nokukonkomesha ukuti bafumyepo ifipe ifili ifyafufuma, pakuti peba nangu cimo mung'anda icakukowela. Panuma yaifi shimapepo ali nokuya moona iyo ng'anda. ³⁷ Ali nokumona bwino ifyo icibumba ca ng'anda cifufwime, nga amona icibumba cili icakatapa katapa nangu icakashika umo citobeke ukucita ifyocili mukuba kunse, ³⁸ nga cakuti ing'anda naifufuma, lyena shimapepo ali nokuya kuli iyo ng'anda nokuisaila panshiku cine lubali. ³⁹ Shimapepo ali nokubwekelako nakambi kung'anda iyo panuma yanshiku cine lubali ukuyamona ngacakuti ukufufuma kulelundulukila kucibumba caiyo ng'anda. ⁴⁰ Nga ekoali, shimapepo ali nokukonkomesha ukufumya amabwe ayafufuma nokuyaposa kunse yamusumba uko baposa ifyakowela fyonse. ⁴¹ Afwile ukumona ukuti icibumba conse ica mukati ka ng'anda capalwa, nafyonse ifimaloba ifyo bapalileko fyafumishiwa kunse yamusumba nokufiposa kunse uko baposa ifyakowela. ⁴² Elyo bali nokufumyapo yailya mambwe nokubikapo amabwe yambi pancende pafumishepo, balingile bashingule cipya cipya ing'anda. ⁴³ Ngacakuti ukufufuma takupwile muli iyi ng'anda panuma yakufumyako amabwe nokupala kwa cibumba elyo nokushingula iloba limbi, ⁴⁴ shimapepo ali nokuya mona nga cakuti in'ganda na ilundulukila nokufufuma kwa ng'anda. Ngacilifyo, ninshi ukufufuma kwa bonaushi nelyo ng'anda naikowela. ⁴⁵ Iyo ng'anda yakutobafye yawa. Amabwe, imbao, namaloba yonse yafwile ukusenda kunse yamusumba nokufiposa kuncende iyakowela. ⁴⁶ Mukulundapo, kanshi umuntu onse uwaingile muli iyo ng'anda ilyo cili iyasalwa ali nokukowela mpakafye ukufika inshita ya cungulo. ⁴⁷ Noyo onse uwalala muli iyo ng'anda ali nokuwasha insalu shakwe, nangula ukulilamo ifyakulya muli iyo ng'anda afwile ukuwasha insalu shakwe. ⁴⁸ Lelo shimapepo ngaingila muli iyo ng'anda ukumona ngacakuti ukufuma kulelunduluka muli iyo n'anda panuma yakushingulako, lyena, ngaukufuma nakupwa, ali nokubilisha, lyena nga ukufuma nakupwa, ali nokubilisha ukuti in'anda naisanguluka. ⁴⁹ Lyena shimapepo ali nokusenda utoni tubili utwa kuwamisha ing'anda, icimuti ca keda, akasalu. ⁵⁰ Shimapepo ali nokwipaila iconi kamo mulukomo lweloba umuli amenshi ayabuuta. ⁵¹ Ali nokubula icimuti ca keda, ne cahisopo, nakasalu akakashikila, neconi cimo icituntulu, nokufibika mumulopa wa coni icafwa, mumenshi aya buuta, nokukanina mu ng'anda imiku cine lubali. ⁵² Ali nokusanguluka ing'anda kumulopa na menshi aya buuta, nokuconi icamweo, nakucimuti ca keda, na hisopo, elyo nakasalu akakashikila. ⁵³ Nomba ali nokuleka iconi icamweo ukti ciye kunse yamusumba mumpanga. Na muli iyi nshila emo shimapepo ali nokufutilako iyo ng'anda, nayo ninshi yasanguluka. ⁵⁴ Kanshi aya emafunde ayakukonka palwa malwele yankanda ayambukila, ⁵⁵ napafiseseya, napakufufuma kwa nsalu elyo neng'anda, ⁵⁶ nangu ukulafimba, ifipusu, ⁵⁷ nangu ukusebeka pankanda, pakulangilila ukuti ici cintu nacikowela nangula nacisanguluka. Aya emafunde palwa malwele yankanda ayambukila ayafibashi elyo nokufufuma."