¹ Yahweh alandile kuli Mose na Aaroni, alandile ati, ² "Nga umo alafimba nangu akwata utupusu twafuluma pamubuli nangu pankanda yakwe palasebeka ifilepala kufibashi, ifyapala ubulwele bwapankanda ubwambukila, afwile ukuletwa kuli shimapepo Aaroni, nangufye kuli umo uwa mubana abaume abali niba shimapepo. ³ Shimapepo ali nokupima bwino ubu bulwele ubuli pankanda yamubili. Ngaasanga ukuti ubupipi ubuli pancende apali ubululwe buli ubwabuta, nakabili ngaamona ukuti nabupitilila pankanda, ninshi bulwele bwakwambukila. Panuma shimapepo apwa ukupima uyo muntu, ali nokubilisha ukuti uyu muntu nakowela. ⁴ Nga cakuti pankanda apalesebeka pabuuta, na ukumoneka kwa cilonda takupitilile pankanda, no bupipi ubulipo tabuli ubwabuta, shimapepo ali no kutalusha uyu muntu umulwele kubabiye panshiku cine lubali. ⁵ Panuma yanshiku cine lubali, shimapepo ali nokumupima kabili mukumumona ngacakuti ubulwele bulifye umo bwabela nangu nabulundako, nga cakuti buleya bulelundulukila pankanda. Nga tacili ifyo, shimapepo ali nokutalusha uyo muntu nakabili panshiku cine lubali. ⁶ Shimapepo ali nokupima uyo muntu nakabili panuma yanshiku cine lubali ukumona ngacakuti ubulwele bulifye filya fine tabulelundulukilako pankanda. Ngatacilundulwike, shimapepo ali nokubilisha uyo muntu ukuti nasanguluka. Fipusufye. Afwile awasha insalu shakwe, nomba aba uwasanguluka. ⁷ Lelo ngacakuti ifipusu fyasanduluka panuma shimapepo nalanda kumuntu uyo ati nasanguluka, nakabili uyo muntu ali nokulangwa kuli shimapepo. ⁸ Shimapepo ali nokumupima bwino bwino nakabili ukumona nga cakuti ifipusu nga filetwalilila ukusanduluka. Nga cakuti filesanduluka, shimapepo ali nokubilisha uyo muntu ukuti nakowela. Ubulwele bwakwe bulambukila. ⁹ Ngo muntu umo alwala ubulwele ubwambukila ubwankanda, ali nokutwalwa kuli shimapepo. ¹⁰ Shimapepo nao ali nokupima bwino bwino ngaasanga ati paanganda apafimbile napabuuta, na tubupipi ngana tubuuta, nokumoneka pali icilonda apafimbile. ¹¹ Awe ngacakuti alifyo, ububulwele bwankanda ubushiputuka, nashimapepo ali nokubilisha uyo muntu ukuti nakowela. Talingile ukufumyapo uyo muntu, pantu ena alikowele kale. ¹² Awe nga cakuti ubulwele bwakumana umubili onse ukutampila kumutwe ukufika kumakasa, shimapepo ali nokuceceta nakabili. ¹³ Shimapepo ali nokumupima nakabili ukumona ngacakuti ubulwele nabukumana umubili onse. Nga cili ifyo, shimapepo ali nokubilikisha uyo muntu ukutila nasanguluka kubulwele. Nga cakuti nayaluka iyabuuta, ninshi uyo nasanguluka. ¹⁴ Lelo nga icilonda capuka pamubili wamuntu, ninshi uyo muntu nakowela. ¹⁵ Shimapepo ilyo amona icilonda capuka pamubili ali nokubilisha ukuti uyo muntu nakowela pamulandu wafilonda fili pamubili fyamukowesha. Kabili bulwele ubwambukila. ¹⁶ Lelo ici cilonda icibishi nga cayaluka cabuuta, uyo muntu ali nokuya kuli shimapepo nakabili. ¹⁷ Elyo shimapepo ali nokupima bwino bwino ngamona ukuti umubili nawaluka wabuuta. Nakabili shimapepo ali nokubilisha ukuti uyo muntu ali uwasanguluka. ¹⁸ Ngacakutila umuntu umo icipute capuka pamubili wakwe nokupola capola, ¹⁹ elyo apo pancende pali icipute palemoneka apabuuta nokufimba ngapafimba, nokubutuluka pabutuluka, uyo muntu ali nokuya kuli shimapepo. ²⁰ Shimapepo ali nokuya pima bwino ukumona ngaasanga ukuti ubulwele bwalingila kale mumubili, nobupipi nabo bulemoneka ubwabuuta. Nga cili ifyo, lyena shimapepo ali nokubilisha uyo muntu ati nakowela. Ubo bulwele ubwambukila, ngacakuti bwasalanganga pancende apali icipute. ²¹ Lelo ngacabweba ati shimapepo apima asanga ukuti tapali ubupipi bwabuuta, kabili icilonda naceluka, lyena shimapepo ali nokumufumyapo panshiku cine lubali. ²² Nomba ngacakuti ubulwele bulelundako mu nkanda, shimapepo ali nokubilisha uyo muntu ukuti nakowela. Ninshi bulwele bwambukila. ²³ Icilonda ngata cilundulwike nokukumana umubili onse, ninshi cibalafye cacipute, na shimapepo ali nokubilisha ukuti uyo muntu nasanguluka. ²⁴ Ngacakuti umuntu umo apya umulilo elyo apo apya pakashikilila nokubutulukila nokutukuma, ²⁵ lyena shimapepo ali nokupima ukumona ngacakuti ubupupi nabusanguka ubwabuuta, nakabili icilonda nganacikashika ukupula pankanda . Nga cili ifyo, ninshi bulwele ubwambukila. Ebufumine pantu acipya, nashimapepo ali nokubilisha uyo muntu ukuti nakowela kubulwele ubwambukila. ²⁶ Nomba shimapepo ngapima asanga ukuti pacilonda tapali ubupipi ubwabuuta, necilonda tacili mucishikile cili icaseluka, lyena shimapepo ali nokusunga uyo muntu panshiku cine lubali. ²⁷ Kabili shimapepo ali nokupima panuma yanshiku cine lubali. Ngafya twalilila ukusanduluka pankanda, lyena shimapepo ali nokubilisha uyo muntu ukuti nakowela. Ububulwele bulwele bwambukila. ²⁸ Lelo kwena icilonda ngacilifye umo cabela elyo cili icaleluka, kabili apacipya palifye tapafimbile, lyena shimapepo ali nokubilisha uyo muntu ukuti nasanguluka, ico akwete cibalafye cacilonda icakupya kumulilo. ²⁹ Nga cakutila umwaume nangu umwanakashi ali nobulwele ubwambukila kumutwe nangula kukalefulefu. ³⁰ Shimapepo ali nokupima uyo muntu nga uulwele ubulwele bwalwambu ukumona cilonda nga nacishika ukupita pankanda, nga cakuti palemoneka apa kashikila, apatumapipi-pipi. Nga pali ifyo, lyena shimapepo ali nokubilisha uyo muntu ukuti nakowela. Ici ciseseya, bulwele ubwambukila ubwafibashi kumutwe nangu kukalefulefu. ³¹ Lelo nga shimapepo apima amona ukuti icilonda nacilepuka nokupula pankanda, namapipi yafika epo yali, lyena shimapepo ali nokubika uyo muntu eka panshiku cine lubali. ³² Napa bushiku bwalenga cine lubali shimapepoali nokupima uyo muntu ukumona ngacakuti ubulwele bulelundako. Nga cakuti tapali ubupipi ubwakashikilila, necilonda tacikulile pa nkanda, ³³ lyena uyo mulwele bali nokumubeya, lelo shimapepo ali nokusunga uyo mulwele eka panshiku na shimbi cine lubali. ³⁴ Kabili panuma yanshiku cine lubali shimapepo ali nokupima ubulwele ukumona ngacakuti nabuleka ukulundulukila pankanda. Nga casangwa ukuti cilemoneka ukushika ukucila pankanda, shimapepo ali nokubilikisha uyo muntu ukuti nasanguluka. Uyo muntu ali nokuwasha insalu shakwe, lyena ali uwasanguluka. ³⁵ Nomba nga cakuti icilonda ngacalunduluka ilyo shimapepo nalanda kuli uyo muntu ukuti nasanguluka, ³⁶ ninshi shimapepo ali nokupima uyo muntu nakabili. Nga cakuti ubulwele bwalundulukila pankanda, shimapepo tali namukubika amano kukumona imishishi iyakashikilila. Uyu muntu ali uwakowela. ³⁷ Lelo nga shimapepo amona icilonda caleka ukulunduluka namishishi shafita shakula pali ilya ncende, ninshi ubulwelel nabupola. Uyu muntu nasanguluka, lyena shimapepo ali nokubilikasaha ukuti uyo muntu nasanguluka. ³⁸ Ngo mwaume nangu umwanakashi akwata ubulwele bwafisongo pankanda yakwe, ³⁹ Shimapepo ali nokupima bwino uyo muntu ngasanga ukutila ifisongo filemoneka ifyabuuta, ifyo ninshi fipusufye ifyatulike pankanda. Uyo muntu alisanguluka. ⁴⁰ Ngo muntu umushishi wapwa ukunukuka ukushinguluka umutwe, ashala nepala, ninshi untu wasanguluka. ⁴¹ Nga cakuti umushishi waseseka lwaku mpumi yamutwe, eko ipala lyabelafye, nalyo line uyo muntu nasanguluka. ⁴² Lelo ngacakuti uyo muntu pepala palemoneka icilonda icakashikila nangula ukubutulukila nangu nipa mpumi pene, ninshi ali nobulwele ubwambukila ubwa fibashi ebufumine. ⁴³ Shimapepo ali nokupima uyo muntu ukumona ngacakuti icilonda icifimbile mwipala lyamumutwe nangula pampumi cili icakashikilila nangu icabuutulukila, ngecabulwele ubwambukila ubwa nkanda. ⁴⁴ Ngafili ifyo, ninshi uyo muntu ali nobulwele ubwambukila noyo muntu ali uwakowela. Lyena shimapepo mucine ali nokubilikisha uyo muntu ukuti nakowela pamulandu wabulwele ubuli kumutwe. ⁴⁵ Umuntu uulwele ubu bulwele ubwambukila wena ali nokufwalafye insalu ishalepuka, imishishi yakwe mumutwe taili nakusakulwa, ali nokufimba pamenso napamona nokulapunda ati, 'Ushasangululwa, ushasangululwa.' ⁴⁶ Munshiku shonse uyu muntu ali nokuba uwakowela pantu ali uwakowela kubulwele ubulelunduluka, ali nokwikala eka. Ali nokwikalafye kunse yankanbi. ⁴⁷ Insalu ngacakuti shili ishakowela nokufuma, nangu shibe isha butonge nangu ishatelela, ⁴⁸ yonse insalu iyapikulwa nangu ibe iyabikwa nokutelela nangu yabutonge, nangu yampapa nangu yapangwa nimpapa- ⁴⁹ ngacakuti icisemba mucakufwala icakukowesha, nangu nimpapa, nangu cibala cileseba; cilingile calangwa kuli shimapepo. ⁵⁰ Shimapepo ali nokucimona nokumona ifyo cifumine; ali nokufitalusha ifyo ifyafuma panshita cine lubali. ⁵¹ Ali nokupima ifyo fyafuma panshita cine lubali. Nga amona ukuti ukufuma kucili kuletwalilila pacakufwala nangu pacapikulwa nangu icabilwa nangu icabeka, pampapa nangu conse ica pangwa ukufuma kupapa, awe ici bonaushi bwakufuma, na ici cipe cintu cakowela. ⁵² Shimapepo ali nokucocafye ico cakufwala, nangu conse icapombwa nangu icabilwa icabutonge ubwabeka, ipapa nangu icapangwa nepapa, naconse icabonaushi icafufuma casangwapo, pantu calete amalwele. Ico cipe cifwilefye cainaulwa. ⁵³ Nomba ngacakuti shimapepo apima ico cipeno kusanga ukuti ukufufuma takufumine kucakufwala nangu kuli conse icapikulwa nokubilwa ukufuma kubutonge, nangu nikupapa, ⁵⁴ shimapepo ali nokupela icipope icakuti ici cintu cili nokuwashiwa apo nacisangwa icakufufuma, nokusungwa ceka panshiku cine lubali. ⁵⁵ Panuma shimapepo ali nokupima ico cintu panuma yakuciwasha kukufufuma cakwete. Nga cakuti ukufufuma takwalwike imimonekele, nelyo tacilundulwike, cicili icakowela. Lyena ali nokucoca ico cipe, nangu cingaba cilifye kuncende imo. ⁵⁶ Lelo ilyo shimapepo apima ico cipe, asanga ukuti ukufuma kwafibashi takutwalilile panuma yakuwasha ico cipe, lyena ali nokulepula iyo nsalu pancende apafufwime nangu nipampapa, nangu cintu conse icapikulwa nangu icabililwe. ⁵⁷ Nomba ngacakweba ati ukufuma kwayamba nakabili pacakufwala, nangufye pacapombwa nangu icapikulwa, nelyo conse ica pangwa nepapa, ngacalundulikila, ⁵⁸ Muli nokoca ico cipe icafufuma. Icakufwala, insalu ishapikulwa neshabilwa ukufuma kubutonge nangu ishamishilwa, ipapa, nangu conse icapikulwa nangu icapangwa ku papa, fibe fintu fyasanguluka nangu fintu fyakowela. ⁵⁹ Kanshi aya emafunde pamulandu bwafibashi ukulosha wafyakufwala nga fyafufuma icabutonge nangu icatelela, nangu conse icapangwa kupapa, fibe fintu fyasanguluka nangu fintu ifyakowela.