¹ Yekela wonkhe umphefumulo ulalele kulabasesikhundleni lesisetulu, ngoba kute emandla embuso langaveli kuNkulunkulu. Tiphatsimandla letikhona tikhetfwe nguNkulunkulu. ² Ngako loyo lowalako umbuso umelana nalokumiswe nguNkulunkulu; futsi labo labamelana nawo batawutfola kwehlulelwa . ³ Ngobe babusi abesabeki emisebentini lemihle, kepha emisebentini lemibi. Uyafisa yini kungasabi loyo losiphatsimandla? Yenta lokuhle, utawutfola kudvumiswa . ⁴ Ngobe usisebenti saNkulunkulu kuwe salokuhle. Kepha uma wenta lokubi, yiba nekwesaba; ngobe akayiphatsi inkemba ngaphandle kwesizatfu. Ngobe usisebenti saNkulunkulu, umphindziseleli welulaka kuloyo lowenta lokubi. ⁵ Ngako kufanele uhloniphe, hhayi ngenca yelulaka nje kuphela, kepha ngenca yanembeza. ⁶ Ngenca yaloku ubhadala umtselo futsi. Ngobe tiphatsimandla tisebenti taNkulunkulu, letiya kulentfo le njalo njalo. ⁷ Bhadala kuwonkhe muntfu lokukweledako kubo: umtselo kulofanelwe ngumtselo ,inkhokhelo kulofanelwe kukhokhelwa, kwesaba kulofanele kwesatjwa, nihloniphe lofanele kuhlonishwa. ⁸ Ungakweledi muntfu lutfo, ngaphandle kwekutsi nitsandzane. Ngobe loyo lotsandza makhelwane wakhe uwugcwalisile umtsetfo. ⁹ Lemiyalo, ''Ungaphingi, ungabulali, ungebi,ungafisi, ''noma sengumuphi ke lomunye umyalo uhlanganiswe ngulomusho lotsi, ''Tsandza makhelwane wakho njengoba utitsandza wena.'' ¹⁰ Lutsandvo alukwenti lokubi kumakhelwane. Ngako, lutsandvo kugcwaliseka kwemtsetfo. ¹¹ Ngenca yaloku, uyasati sikhatsi, kutsi vele sesikhatsi sekutsi uvuke ekulaleni. Kwanyalo insindziso yetfu seyisondzele kunangalesa sikhatsi sisakholwa kwekucala. ¹² Busuku sebuyaphela, imini seyisondzele. Ngako asibeke eceleni imisebenti yebumunyama, sihlome tikhali tekukhanya. ¹³ Asihambe ngalokufanele, njengasemini, hhayi ngemadzili ekudzakwa noma ngekudzakwa; futsi asingahambi ngekuphinga nangebugwadla, futsi hhayi ngekucabana nangemona. ¹⁴ Kepha fakani iNkhosi Jesu Khristu, ninganakekeli kutsi lesimo senu semtimba lesonakele, ningasenelisa kanjani ngetinkhanuko taso.