¹ Nji handeka nguange suana, muomu nkala ntcimbu yikeye ua mundende, yikeye kali tundindithile ko ku vundungo, nambe yikeye va venya ua vyoshe. ² Vuno yendi a li mu mavoko a vaka ku takametha noho ku litangua lya mu hakela ho yishe. ³ Ngocho lalo, muye mu tua kele tu vanike, va tu puithile vindungo va viye vi tua shangumukile hano hantci. ⁴ Vuno muye ya hetele mo ntcimbu, Kalunga ua tumine Munendi, ua kuthema ku mukentu, ua ku themukila mu mashiko ⁵ ngocho linga a kovole voshe vali muintci lya lishiko, linga netu tu uane ku pua ngue vana vendi. ⁶ Muomu yeni mu vana, Kalunga na tumu Mpundhi ya Mona mu vimbunge vyetu, uye a tambakana nguendi, "Abba, Tata." ⁷ Keho ku ua kele lalo ndungo, vuno u muna, keho nga u mona, keho yove lalo suana ku hitila muli Kalunga. ⁸ Vuno ntcimbu yiye, muye yeni ku mua dhivukile Kalunga, va mi puithile vindungo kuli vaye, ku ndhili yavo, keti muyombo. ⁹ Vuno mualolo unenja ku dhivuka Kalunga, vati lalo muatha kutengulukila kunima na ku vipanga vya ku viha vi mua shangumukile na vyo? Mu thetele lalo ku tengulukila ku vundungo vuoshe lalo? ¹⁰ Mu ka tatela matangua na vingonde vya vihya na vi ntcimbu na myaka! ¹¹ Njili na lyova lyeni nguange hamo nja mipangela ngocho. ¹² Njina mikandelela, vamuna-nana, kaleni ngue yange, muomu yange lalo njina kala ngue yeni. Ku mua nji viyithilile. ¹³ Vuno munadhivuka ngueni muomu lya vuvedhi vua muvila nja mya mbuluilile mudhimbu ua chili ntcimbu ya kulivanga. ¹⁴ Nambe mu va myetheka muvila uange, kumua nji thembuluile ndi munji vyane. Vuno mua nji tambuile ngue kangelo ua Kalunga, ngue yange Kilistu Yesu vavenya. ¹⁵ Keho vivedhukitho vyeni vino? Muomu ange nji mihana vukaleho ngechiye, nga vya kola, nga mua chokovuele mo mesho eni vavenya na kunji hana. ¹⁶ Keho ngechi, njina kala muka chidhindo cheni muomu nji mi leka vu chili? ¹⁷ Vakevo vali na kuyongola na ndhili na kumi tuvakana, vuno kuvethi na vutumbe vua chili. Va kuyongola nandhili va mi shokele hanja linga mudhangame muku va tonda. ¹⁸ Nkala hoshe chachili kuyongola nandhili vutumbe vua chili, nambe nga konjakele neni. ¹⁹ Vana vange vavandende, njuvua lalo kayando ka kuvavala kua kumi thema noho Yesu na kolo muli yeni. ²⁰ Njina yonguele kukala hamo neni ngechi naku tengulula lijui, muomu njili navitanga neni. ²¹ Njilekeni, eni muli veyela ku kala muintci lya majui a lishiko, ko muekuvua majui a lishiko ndi? ²² Muomu vanathono ngechiye Avilahama ua kele na vana vendi vavali vavamala, umo ua muthemene na ndungo ua mukentu keho umo na mukentu ua kuvutuka ua kuyeneka kuambata. ²³ Umo ua themukile ku mukentu ua ndungo ha ntcitu, vuno mukuavo ua themukile ku mukentu ua kuvutuka ha litavathano. ²⁴ Vipanga evi vya kala ngue vithimuitiya, muomu ava vakentu vana pu matavathano avali. Eli limo lya ku mukinya ua Sinai lya themene vana va ku vundungo. Yikeye Hangala. ²⁵ Ngechi Hangala nakala mukinya ua Sinai mu Alavia, na yikeye nemanena ho Yelusalema ya mualolo, muomu ali mu vundungo na vana vendi. ²⁶ Vuno Yelusalema yili muilu yikeyo yina vutuka, nendi lalo yina uetu. ²⁷ Muomu vana thono, "Liyango, kuli umo ua ku yeneka kuthema; lila na kutambakana liyango, ove uyeneka kuyanda mukuvavala mu kuthema kambututu; muomu vanike va uye ali mungocho vavengi kutuvakana va uye ali na lyala." ²⁸ Vuno yeni vamunanana, vakevo vanike va litavathano, ngue Yisake. ²⁹ Kuntcimbu yiye uye yiva themene ku ntcimbu ua yandethele uye yiva themene ku Mpundhi. Vina fu ngue mualolo. ³⁰ Vuno vika a kuanya mathona? "Sheka mukentu ua ndungo na mona. Muomu muna ndungo ua mukentu ka kahingi vu suana kumo na muna mukentu ua kuvutuka. ³¹ Ngocho vene, va munanana vavamala, etu keti tuvana va mukentu ua ndungo, vuno ua mukentu ua kuvutuka.