¹ Eni vaku heva va Ngalata! Yiya ua haka chithingo halyove? Vya kele mu mesho eni ngechiye ngue muva kulikile Yesu Kilistu mumbunga ku chiti cha kulindakana. ² Echi chikecho chuma chimo lika chi nji thetela ku li longetha kulyeni: Mua tambula Mpundhi mu vipanga vya majui a lishiko ndi mu ku tava viye vyo muovuile? ³ Eni muvalayi? Omo muna shangumuka na Mpundhi ya kuyela, ngocho mu ka manetha lalo na ntcitu ndi? ⁴ Muna yandela vyuma vya vingi mu ngocho ndi_chili vene mu ngocho ndi? ⁵ Uye a hana Mpundhi ya kuyela kulyeni na kupanga vikomoketho mukati keni kuma ngueni muomu lya majui a lishiko, ndi kuvua mu kutcelela? ⁶ Ngue vene Avilahama ''ua tavele Kalunga keho va mu tandelele muka vuchili,'' ⁷ mungila yiye vene, uvueniko, honi, ngueni voshe vaka ku tcelela vakevo vana va Avilahama. ⁸ Mathona, mu ku mona Kalunga a ka thambuetha vaka Vifuti mu kutcelela, va vambuluile mudthimbu ua vungulu laya kuli Avilahama, ''Mulyove vifuti vyoshe vi ka vedhuka.'' ⁹ Keho ngocho, vaka kutcelela vana vedhuka hamo na Avilahama, lyala ua ku kutcilyela. ¹⁰ Voshe va themenena ku vipanga vya majui a lishiko vali muintci lya chithingo; ngue mu va vi thona nguavo, ''Ua kuthinga uoshe uye ka kele mu vyuma vyoshe vi va thona mu mukanda ua lishiko, na ku vi panga.'' ¹¹ Ngocho muna vyuvu ngueni na umo uahi a ka thambua kumesho a Kalunga ku majui a lishiko, muomu '' vantu va kuyela va kovokela mu kutcelela.'' ¹² Vuno lishiko keti a ku tcelela, vuno, '' Muntu uye a panga-panga vipanga vya majui a lishiko ovokele vene muli akeo. ¹³ Kilistu ua tuohyelele ku chithingo cha majui a lishiko, omo ua kele chithingo omo yetu, muomu vana thono, '' Chithingo chikala kuli uoshe uye ali kulika kuchiti''- ¹⁴ Linga kuvedhuka cha Avilahama hamo chikenja kuli vaka Vifuti muli Kilistu Yesu, linga vaye vaka kutcelela tukatha kutambula kukulahetha kua Mpundhi. ¹⁵ Vamuna nana, nji kuanya ngue vya vuntu. Nambe ngocho nga muntu a haka litavathano ku majui alishiko, na umo uahi a ka litunditha muku dhimangana nambe kuvandakana ko. ¹⁶ Ngechi kuli Avilahama vavi kuanyene vya litavathano na kumbuto yendi. Keti nguavo, "ku vimbuto vyendi" ku tumbula va vengi, vuno kuli umo lika," na ku mbuto yove," yiya Kilistu. ¹⁷ Ngechi vinji handeka vino, majui a lishiko, liye lyedhile kunima ya myaka 430, ku vathele ku dhimangana ku lyuvuathano liye lya hakeleho laya Kalunga. ¹⁸ Na vusuana vu kenja na majui alishiko, hakeho kuvu kenja ha lyuvuathano. Vuno Kalunga na hana Avilahama mavokovoko lutcelelo. ¹⁹ Vika, keho, chakele chitaka mbunge cha lishiko? Vachi vandakanene ko muomu lya milonga noho ku mbuto ya Avilahama uye a kenja kuli yikeye lyuvuathano vali tungile. Lijui lya lishiko va lihakele mundhili ya tungelu mukukala livoko lya muka kua mbulula. ²⁰ Mualolo muka kua mbulula ahandeka muakama kutuvakana muntu umo. Vuno Kalunga yikeye umolika. ²¹ Ngocho eli likelyo lishiko livindika lyuvuathano lya Kalunga? Keti mukemo! Muomu nga lishiko liye lyatha ku hana muono, nambe ku vuaha linedhile ku lishiko. ²² Vuno mathona ana shoko nkala vyoshe vyuma kuintci lya milonga ngocho lyuvuathano lya lutcelelo muli Yesu Kilistu vaka lihana kuli voshe vaye vatcelela. ²³ Mualolo kulutue ku tcelela kuinje, etu vatu kutile muintci lya lishiko, vatu shokele noho lutcelelo luka yomboloka. ²⁴ Ngocho vene keho lishiko lya kele lya kutu takametha noho Kilistu, ngocho linga tuka kale vumbangi vua lutcelelo. ²⁵ Vuno mualolo ngechiye ku tcelela ku nenja, ku tuethi lalo muintci lya ku tu takametha. ²⁶ Muomu eni muva voshe vana va Kalunga ku hitila mu ku tcelela muli Kilistu Yesu. ²⁷ Muomu ngue vavengi vamo veni vaye mua limbuitikile muli Kilistu yeni vavenya mua dhalele hamo na Kilistu. ²⁸ Kuye ku kua kele nambe ka Yunda ndi ka Ngelengu, kuye ku kua kele nambe ngamba ndi ku vutuka, muomu yeni voshe mu va molika kuye ku kua kele nambe lyala ndi mukentu, uahi ko, muomu eni vamo voshe mu vamolika muli Yesu Kilistu. ²⁹ Keho nga yeni mu vaka Kilistu yeni mbuto ya Avilahama, na vasuana ku shuama ku lyuvuathano