¹ Keho munima ya myaka likumi na yiuana nja yile lalo ku Yelusalema na Mbalambasa, kumo na Titu. ² Nja yile ko muomu Kalunga ua nji lekele linga tuye ko na ku kava leka mudhimbu uye unjambuluile hakati ka vaka vifuti. Nja ka vi lekele ku vantu va kele ngue vaka kuli hametha mu vushueke, kulingila keti nji shatuke_nambe konja shatukile_mu ngocho. ³ Vuno nambe Titu, ou ua kele nange na yikeye lalo ka Ngelengu, ku va mu thininikile ku lovoka. ⁴ Vamunayina yetu vedhile muvushueke mu kua kuli taletha mu tua vutuka ku kala muli KilistuYesu. Va thetelele linga va tu tengulule vindungo, ⁵ vuno ku tua tavele kuva shuama nambe kamandende, linga vungulu vua mudhimbu ua chili ukale mulyeni. ⁶ Vuno vaye va kele ngue vaka kulihametha (muoshe mu va kele kulyange na vimo vyahi, Kalunga ka kele na kahangu)_ovo, va nji kuanya nguange va kele ngue vaka kulihametha nevi vyova tavele ko vyahi ku lyange. ⁷ Vuno mungila yeka, va vi muene nguavo ange va nji tcelela kuambulula vinkanda vya vingulu ku va ka kuyeneka ku lovoka, ngue mu va tcelelele Petulu kuambulula vinkanda vya vingulu ku va ka ku lovoka. ⁸ Muomu Kalunga, ou ua pangethele Petulu mu vipanga vya vupostolu ku vaka ku lovoka, ua nji pangethele nange kuli va ka Vifuti. ⁹ Va Tiango, na Sefase, na Youano, vaye va va tcimanethele nguavo vingundhi, va muene vuana vuange, keho va tu tambuile na li voko lya chilyo nange na Mbalambasa linga tupange hamo lika navo. Va tavele linga yetu tuye kuli vaka Vifuti keho vakevo linga vaye kuli vaka ku lovoka. ¹⁰ Va lombele lika ku vuluka vihutu, vikevyo vene vya kele mu muono uange. ¹¹ Vuno Sefase uedhile ku Antioka, nja mu vyanene kumesho endi nguange ua pangele vya ku viha. ¹² Muomu te nolo kanda va mala vamo va tunde kuli Tiango, Sefase ua shangumukile kulya kumo na vaka Vifuti. Vuno mu va ku hetele ava va mala ua li kelele na ku shondoloka ku vaka Vifuti. Muomu ua kele na lyova lya vaye vaka ku lovoka. ¹³ Na vaYundeya va kuavo voshe lalo va lingile chivembulu kumo nendi. Nambe Mbalambasa nendi va mu lingithile a pange chivembulu. ¹⁴ Vuno mu nja muene nguange mana avo keti ua vungulu vua mudhimbu ua chili, Nja kuanyene na Sefase kumesho avo voshe nguange, ''Ambe u Kayundeya vuno una li fu ngue mu ka Vifuti keti ngue Kayundeya, vati u thininika vaka Vifuti va kale ngue va Yundeya?'' ¹⁵ Etu vavenya tu vaYundeya ha chithemua keti ngue va ka Vifuti va kamilonga; ¹⁶ vuno tuna dhivuka nguetu na umo uahi a thambuela ku vipanga vya lishiko vuno a thambuela mu ku tcelela muli Kilistu Yesu. Netu tua tcelela muli Kilistu Yesu linga tu thambue mu ku tcelela muli Kilistu Yesu keti ngue mu vipanga vya lishiko. Muomu mu vipanga vya lishiko na ntcitu na yimo yahi yi va ka thambuetha. ¹⁷ Vuno nga, muntcimbu tu chi thetela ku thambua muli Kilistu, netu vavenya lalo tu kale va ka ku viha, chili vene Kilistu a tavethela mulonga ndi? Kuahi! ¹⁸ Muomu nga nji tungulula viye vi nja lundumuine, nji leketha ngue nange mu ka kupokola mashiko. ¹⁹ Muomu mu lishiko nja tcile mu lishiko, linga njovoke kuli Kalunga. ²⁰ Keti yange lalo njili na muono, vuno Kilistu a li mulyange. Muono ou u njovoka nauo mu ntcitu njovoka nauo mu ku tcelela muli Muna Kalunga, ou ua nji yonguele na ku li hana vavenya muomu lyange. ²¹ Kunji li handunuka na Ngodhi ya Kalunga, muomu ambe nga vungulu vua kele ku majui a lishiko, keho Yesu ua tcile ngocho!