¹ Paulu, ka Apostolu_ keti ka Apostolu ua ku vantu nambe ua ku chidhango cha muntu, vuno hali Yesu Kilistu na Yishe Kalunga, uye ua mu hinduile kukudtha_ ² na va munayina vetu vo njili navo, ku vimbunga vya vikungulukilo vya ku Ngalata: ³ Ngodhi kulyeni na chivovo cha Tata Kalunga na Muene Yesu Kilistu, ⁴ uye ua li hanene vavenya ku milonga yetu linga a tuovole ku ntcimbu yino ya kuvihya, ngue ku chidhango cha Tata Kalunga, ⁵ vungulu vu kale kuli yikeye ku myaka na myaka. Ame. ⁶ Ange nji na komoka kumona yeni muna tenguluka vuathi-vuathi kutunda kuli uye ua mi thanene mu ngodhi ya Kilistu. Njina komoka muomu muna tengulukila ku vinkanda vyeka, ⁷ keti hamo kuli vikuavo vyeka, vuno kuli vantu vamo va mitanganetha va thetela ku tengulula vinkanda vya Kilistu. ⁸ Vuno nambe nga yetu nambe kangelu ua muilu tu myambuluila vinkanda vyeka ku tunditha ko viye vi tua myambuililile, a kale ua kuthinga. ⁹ Ngue mo tuna handeka laya, nambe ngechi nji handeka lalo, ''Nga umo a myambuluila vinkanda vyeka ku tunditha ko viye vi muovuile, a kale ua kuthinga.'' ¹⁰ Muomu ange kunji thetela vantu linga va nji shangale ndi Kalunga? Kuma nji thetela ku toketha vantu ku vimbunge ndi? Ambe nolo nji toketha vantu ku vimbunge, keti nji ngamba ya Kilistu. ¹¹ Muomu nji thetela mu dhivuke, va vuthamba vuange, ngueni mudhimbu uachili uonjambuilile keti ua vantu. ¹² Kunja vi uanene ku muntu na umo uahi, nambe ku nji longetha vyo. Vuno, Yesu Kilistu ua nji yomboluela vyo. ¹³ Muovuile vipanga viye vi nja pangele mu Yundeya, muye mu nja yandethele mbunga ya Kalunga ku tuvakanena na ku yi viyitha. ¹⁴ Navua navua nja thingimikile Kalunga ua mu Yundeya ku tuvakana chingi cha vaye va nja li kele navo chitco. Muye mukemo mu nja kele na vukalu vua kama ku vaye ku va shuamene ka kulu ka vakuku vange. ¹⁵ Vuno Kalunga, mua nji tundithile ku limo lya vanana, na kunji thana na ngodhi yendi, ¹⁶ ua nji yombuelele Munendi, linga nji muambuluile hakati ka vaka vifuti, ku nja li kuanyethele nambe na ntcitu ndi na maninga. ¹⁷ Ku nja yile ku Yelusalema kulyavaye va kele va apostolu kulutue lyange. Vuno, njayile ku Alaviya keho nja ka hilukile lalo ku Ndamasiku. ¹⁸ Keho munima ya myaka yitatu nja yile ku Yelusalema mu ku ka meneka Sefase keho nja ka kele nendi myaka likumi na yitanu. ¹⁹ Vuno konja ka muene ko kapostolu mukuavo lalo mpano Tiango lika, munayina ya Muene. ²⁰ Mulyevi vinji mi thonena, nji mi leka vuino kumesho a Kalunga nguange ku nja mi kuithile. ²¹ Keho nja yile ku vifuti vya Silya na Silisia. ²² Kuva ka nji dhivukile ku vantu va mu Yundeya vaye va kala muli Kilistu. ²³ Vuno vovuile lika mu va handeka nguavo, ''Lyala uye ua tu yandethele ngechi youambulula lutcelelo luye lua viyithile laya.'' ²⁴ Keho va shangalele Kalunga muomu yange.