¹ Ngocho vene kaleni vakua kutambuluitha Kalunga, ngue vana vange vanja yongola. ² Lalo endeni mu chivovo ngue Kilistu mua tuyonguele hakeho ua lihanene vavenya muomu lyetu, nkombelo yayingulu naku lihana kuli Kalunga. ³ Vuno keti kukale vithinganyeka vya vupangala na madhilo oshe, nambe kuliveyela ndi chipululu ha kati keni, muomu evi kuvya kele ko ku vantu kuyela vaKalunga. ⁴ Keti kukale madhilo, keti kukale vihandeka vya shuama nambe kuhandeka vya sanda, evi vyoshe vya ku viha. Vuno hana pande kukala kushangala. ⁵ Muna dhivuka chili vene naumo uahi nambe muka vukuidhi, ua madhilo, nambe muka chipululu yikeye mu kaku lemetha mahamba ka kakala na vusuana mu vumuene vua Kilistu na Kalunga. ⁶ Keti muitave na umo uahi ami shongangeye na vinguli vya mavoko-voko, muomu ku viuma evi vukalu vua Kalunga vukenja kuvaka lithino. ⁷ Ngocho vene keti muli vandakane navo. ⁸ Muomu muakele mumuthithi , ngechi muli mumutanya muli Kalunga. Endeni ngue vana vamutanya. ⁹ (Muomu vushuka vua mutanya uli na vuchili vuoshe , na kuvuaha cha chili.) ¹⁰ Na kulilongetha vika viaku ya Kalunga kumbunge. ¹¹ Keti mu livandakane na vushuka vua muthithi, vuno va vyaneni. ¹² Muomu shuama nambe kutumbula vipanga vyove kupanga mukushueketha. ¹³ Vuno vyuma vyoshe vana viyombolola kumutanya, navikevyo uatha ku vimona. ¹⁴ Muomu ku vyoshe vi yomboloka mumutanya, ngocho a handeka nguendi, "Hinduka, ove mukua kundanda, shituka kukutca, na Kilistu aku tuile cheke. ¹⁵ Tala vuino vati mo uenda keti ngue va lilayi vunoni muka kudhangama. ¹⁶ Lyohiele ntcimbu muomu matangua ana vihya. ¹⁷ Ngocho vene keti mukale malayi vuno uvueni vana yongola Kalunga. ¹⁸ Kati mupende vinyu, viye vili na vuhuka vuno lishulitheni na Mpundhi ya kuyela. ¹⁹ Handekeni umo na mukuavo ni visamo na mamadhina akulemetha na madhina aha Mpundhi, yimbeni naku shangala Kalunga na vimbunge vyeni vyoshe, ²⁰ ntcimbu yoshe haneni shangaleni ku nkala evi, mulidhina lya Muene Yesu Kilistu kuli Kalunga Tata, ²¹ lihaneni umo namukuavo na lyova lya Kilistu. ²² Vakentu lihaneni ku vamala veni ngue kuli Kalunga. ²³ Muomu lyala yikeye mutue ua mukentu, ngue Kilistu naua napu mutue ua ngeleka, yikeye vene muovole ua muvila. ²⁴ Ngocho vene ngeleka yili hana kuli Kilistu, lalo vakentu neni lihaneni ku vamala veni kunkala vyoshe. ²⁵ Eni vamala yongoleni vakentu veni, ngue Kilistu mua yongola chiku ngulukilo na ku lihanene yendi vavenya omo yikeyo. ²⁶ Linga a lelethe, na ku mitoketha mu ku mikusha namema amathona, ²⁷ linga akale hangeleka kuliyendi vavenya na vungulu kayeneke chipenga na munkonya, nkala vipanga ovyo, vuno lileletheni na kuvyukilila. ²⁸ Mungila yiye vene vamala yongoleni vakentu veni vavenya yikeyo mivila yeni. Nkala ou ua yongola mukentu uendi ua liyongola endi vavenya. ²⁹ Uahi ua dhinda muvila uendi vavenya, vuno au lithe na ku ulela, ³⁰ ngue omo Kilistu lalo mua lelele mbunga yendi. ³¹ Muomu tuna kala lyala a katha yishe na viyina, na ku livandakana na mukentu uendi keho voshe vavali vaka kala muvila umolika. ³² Ovu vuchili vuaku shueketha - vuno nji handeka vya Kilistu nevi vya chikungulukilo. ³³ Nambe ngocho, nkala ou a yongole mukentu uendi vavenya lalo, keho mukentu a thingimike lyala lyendi.