¹ Ngocho vene ange ndungo muli muene njimikandelela nguange muende ngue muvana mithana vami thanene cho. ² Na kuli kehetha choshe na ku konkama choshe nantcintca ya ngodhi liyandeleni hakati keni umo na mukuavo na chidhango. ³ Dhangameni mukunyunga vumo vua Mpundhi Yakuyela halishitiko lya chivovo. ⁴ Kuli muvila umo lika na Mpundhi, ngue lalo muva na mithana mulu tcelelo lumo lika mu ku kuthana cheni. ⁵ Muene umo lika kutcelela chomolika kumbitika chimo lika . ⁶ Kalunga umo lika yikeye Yishe ya voshe vali helu lya voshe vali hakati kavoshe nambe vili muli vyoshe na ku vyoshe. ⁷ Vuno kavumbi vana kahana kuli yetu muntu ku muntu, ngue kuchitheteko cha vuana vua Kilistu. ⁸ Ngocho nguendi: mua londele muilu ua tualele vandungo ua hanene vuana ku vantu. ⁹ Vika chiyomboloka echi ''Ua londele,'' keti chikecho chika nga keti ku tumbula nga chiye yikeye uashulukile lalo kuintci lya hantci. ¹⁰ Uye uashulukile yikeye lalo uye ualondele kuilu lya melu oshe, linga ashulithe vyuma vyoshe. ¹¹ Keho yikeye ua hakele vamo vakale vaPolofeto, vamo vaPolofeto vamo vaka kuambulula,mudhimbu ua vungulu vamo tunyungi, vamo valongithi. ¹² Mukutantu luitha vaka ku yela, muku panga vipanga muku tungitha muvila ua Kilistu. ¹³ Noho etu voshe tuhete ku vumo vua kutcelela, na ku dhivuka muna Kalunga noho nambe vantu vakukola tuhete kuchitheteko cha chitco cha kushula cha Kilistu. ¹⁴ Kati pue lalo vanike vakuhungu muka noku noku nakupekumuka nampunthi yoshe yaviye vivalongetha naku kuitha tjavantu, mukuthangama thangameni nakushevuitha. ¹⁵ Vunoni mukuhandeka vutjili na tjilemo tukoleni muviuma vioshe muli ikeye Kilistu ikeye mutue. ¹⁶ Kuli ikeye muvila uoshe ualitokakana muatjili ua kundama kumo namanungu oshe ahana ko, kutjisheteko tjavipanga via vilio via uo muvila uli kulitha nakulitungitha mu tjilemo. ¹⁷ Ngocho vene njihandeka echi na ku chitumbula vuka leho muli Muene nguange keti muende ngue vaka vifuti muvutha vua vimbunge vyavo. ¹⁸ Mu vana dhivala kumana avo vana lihanguna ko ku muono ua Kalunga movachili kudhimba muomu ku kaluua kuvimbunge vyavo. ¹⁹ Vakevo kova kele na shuama vana lihana kumasungu akuvihya, mu kupanga matshiko oshe na chipululu. ²⁰ Vuno eni Kilistu uoshe ka mua lilongethele ngachiye. ²¹ Nga muna muvu, keho nga vana milongetha muli yikeye omo vungulu vuli muli Yesu. ²² Ngechiye shululeni muntu uye ua laya na chifua cha muono ua laya, uye ua kuvihya na mashungu akukuitha. ²³ Keho kaleni vantu vavaha muchi mbembethi cha vimbunge vyeni. ²⁴ Dhaleni muntu uye ua muha, yivana panga na chifua cha Kalunga muvu vuaha na ku yela cha vungulu. ²⁵ Ngocho vene etheleni vishaki handekeni vuchili muntu na mukuavo muomu tuna kala vilyo vya muvila umo lika. ²⁶ Handukeni vuno keti mupange vya kuviha litangua keti litoke na vukalu vueni. ²⁷ Satana keti mu muthile muhela. ²⁸ Uye ua puanjele keti apuanje lalo vuno muachili apange na mavoko endi viye vya chili, ngocho aka haneko uye naviyeneka. ²⁹ Lijui lyakuviha keti lituhuke mutunua tueni, ku vanga lijui lyachili mukukoletha ou na liyeneka. Linga lihane muachili kulya va lito lilila. ³⁰ Keti muvavalethe Mpundhi ya Kalunga yikeye chimuetho cheni na kulitangua lya kuovoka. ³¹ Nyanya yoshe, navukalu, namatoto, namu yoyo, navishaki , vitunde hakati keni koshe. ³² Vuno kaleni umo namukuavo vaka vimbunge vya chili vaka chikeketima lyecheleni umo namukuavo ngue Kalunga lalo muana myechela milonga yeni muli Kilistu.