¹ Muomu evi yange, Paulu njili muka kamenga ua Yesu Kilistu muli yeni vaka vifuti. ² Ange njina vitambula nguange ngechi mo munovu ange va njihana chipanga cha kavumbi ka Kalunga muomu lyeni. ³ Ange nji mi thonena ngue mu ku nji yomboluela vyo. Vuno vuchili vua kushueketha kuli hungu eli linji mithonena yeni. ⁴ Nga mu vitanda evi, nga muvi dhivuka nga mumona vuchili vua kushueketha muli Kilistu. ⁵ Mumemo amo vuchili kovua vudhivukile kuvana vavo. Vuno vavi yombolola ha mpundhi yakuyela ku vapostolu nava polofeto vava hanguilile ku vipanga vyendi. ⁶ Lihungu eli lya vungulu vuye nguavo vaka vifuti navo vasuana, navo lalo vamo vamuvila, navo vana vatceleletha muli Yesu Kilistu kuhitila mu mudhimbu ua chili. ⁷ Ange nji ngamba ua mudhimbu ua chili ua vuana vua Kalunga vua kavumbi ka hanene Kalunga kuhitila mu vipanga vya ndhili yendi. ⁸ Kuli yange-nambe movanji haka muntu ua ku kotokela kuvantu va Kalunga vakuyela. Kavumbi va nji hana ko. Muku ambuluila vaka vifuti viye kuva thetelele vupite vua Kilistu, ⁹ na ku neha cheke ku nkala uoshe mu vana viyongola na lihungu vali shuekele muli Kalunga uye ua pangele vyuma vyoshe. ¹⁰ Viyongola vavi pa gele kuhitila mu chikungulukilo linga vaka kusuana na vaka ndhili ya mihela ya muilu mu kudhivukitha vya vingi vya mangana aye Kalunga. ¹¹ Evi vya kele kushuama ku vutumbe vua yaye vuye vua puithilemo muli Yesu Kilistu Muene uetu. ¹² Muli Kilistu tuli na kuthimpa keho tuatha ku kovela ko na ku yakunguluka muomu tuna mu tcelela muli yikeye. ¹³ Mukemo tumi kandelela ngechiye keti muhone muomu lya tuyando tunji mona ange muomu lyeni, vukevuo vungulu vuendi. ¹⁴ Muomu vyuma evi nji tcikama ku mavuli ange kuli Tata, ¹⁵ muli yikeye mishovo yoshe ya muilu neyi yahantci yina tambula madhina ayo. ¹⁶ Nji kandelela linga yikeye a hane kuli yeni ngue ku vukama vua vungulu vuendi, linga yeni mu kole na ndhili ha Mpundhi yendi ya chili yiye yili muli yeni. ¹⁷ Njilomba Kilistu akale mu vimbunge vyeni haku tcelela: linga eni mu shoke midhi namu kulitungitha mu chidhango chendi, ¹⁸ muku kanyama muku dhivuka hamo navoshe vaka kuyela voshe ngue vati muchi kala muvuihi namu vulahe na muvulahe vua kuilu na mukulova, ¹⁹ naku dhivuka kuyongola cha Kilistu china tuvakana chidhivukitho, linga mushule na kuheta ku kushula choshe cha Kalunga. ²⁰ Mualolo kuli uye ahatha kupanga muaku tuvakana navua-navua mukutuvakana vyoshe viye vitulomba, nevi vitu thinganyeka, ngue kundhili yiye yipanga mukati ketu, ²¹ kuli yikeye kukale ku vuaha mu mbunga mungeleka na muli Kilistu Yesu kuvikota namemo oshe aku myaka ya yaye. Amen.