¹ Vuno Mpundhi ya handekele vuchili, ngechiye ku vintcimbu vya ku manethela vamo va ka dhimbala ku kutcelela na ku tolilila vi mpundhi vya ku shevuitha na ku vilongetha vya ndemone ² ha chivembulu cha vaka vishaki, va ka litcimika ku vi mbunge vyavo. ³ Valeketha vantu kuambata na ku valongetha kuli kela ku vya kulya vimo viye vya Kalunga ua pangele linga vavi tambule na ku shangala kuli vaye va tcelela na ku dhivuka vungulu. ⁴ Muomu vyoshe vya panga Kalunga vya chili, na vimo vyahi vitua vuahela kuvyana. ⁵ Muomu vya yela ku lijui lya Kalunga na mu ku lomba. ⁶ Nga uvuluitha vamuna nana vyuma evi, uka kala ngamba ua chili ua Kilistu Yesu. Muomu mu ka kulya ku majui aku tcelela na ku vilongetha vyu na shuamene. ⁷ Vuno vyana vithimo vya ngocho nevi vya vakentu va kukulupa, keho likolethe ove vavenya mu ku lemetha Kalunga. ⁸ Muomu kuli koletha ka mandende mu ku vuaha, vuno kulemetha Kalunga kuna vuaha muomu vyuma vyoshe. Vili na lyuvuathano muomu muono tuli nauo na muono ukenja. ⁹ Mathona ano avungulu ashula mu ku atambula. ¹⁰ Muomu mukemuo vene tuli na ku fuitangana na ku lua muomu tuna tcelela Kalunga muka muono, uye muovole ua vantu voshe, vuno chili vene vaka kutcelela. ¹¹ Evi vyu ka hana vantu na kulongetha vyuma evi. ¹² Na umo uahi apaye vukuenje vuavo, vuno kala chimuetho kuli vaye va tcelela mu lijui, mu ku panga kuove, mu chidhango, mulu tcelelo na mu ku yela. ¹³ Noho njikenja, dhangama na ku tanda, na ku mamuna, na ku longetha. ¹⁴ Keti uivale vuana vuye vuli muli navuo, vukevuo vu ua tambuile ku vupolofeto muye muva kumbekekele mavoko avakuluntu. ¹⁵ Takametha muomu vyuma evi. Kala mu vikevyo, linga kushuena kuove kuyomboloke kuli voshe. ¹⁶ Litale mua chili ove vavenya, na ku lilongetha kuove. Kala vene mu vyuma evi. Muomu mu ku panga ngechiye uka lyohyela yove vavenya na kuli vaye va ka kutolilila.