¹ Vihandeka evi vya vungulu: nga umo ueni ayongola kukala vukuluntu, ndi ayongola vipanga vya vungulu. ² Ngocho vene mukuluntu ale ua kuyela. Lyala ua mukentu umo lika. Yikeye akale muka kuli kehetha, muka kupanga viye vya chili, muka kuyumbula. Na vuahela kukala ku longetha. ³ Kakele kanua ngue muka kupenda ku vinyu, keti muka kushaula, vuno yikeye muka kuthingimika, kulikehetha, na chivovo. Keti muka yongola vimbongo. ⁴ Yikeye muka ku longetha vuino mu njivo yendi vavenya, na vana vendi vamu tave na ku muthingimika muoshe. ⁵ Muomu nga muntu ka dhivuka kulongetha vaka njivo yendi, vati atakametha mbunga ya Kalunga? ⁶ Ayeneke naha ha ku shaukila, linga kuteua ali shangalethe na ku ua mu chetheko cha Satana. ⁷ Keho akale lalo na vukaleho vua chili ha kati ka vaye vali hanja, linga vaye keti va ka uile muka shauka na mu nganjo ya Satana. ⁸ Muye vene, vandiyakunu vana vuahela kukala vaka kathingimiko, keti vaka vindaka vivali, keti vaka kunua vinyu vya vingi, keti vaka chipululu ku nganyo ya ngocho. ⁹ Vakevo vakale na lihungu lya kutcelela na mbunge ya kuyela. ¹⁰ Keho avo lalo va vetheke ha kulivanga, keho va pange ngue va ndiyakunu nga kova kele na ha hovava shaukila. ¹¹ Muye vene, vakentu lalo va na vuahela kukala vaka kathingimiko, keti vaka vishaki, vuno keti vaku penda na kutcelela mu vyuma vyoshe. ¹² Vandiyakunu vakale vamala va mukentu umo lika. vaka kulongetha vana vavo na vinjivo vyavo. ¹³ Muomu vaye vana panga mua chili muomu va nemana vavenya na ku kanyama kua kama mu kutcelela kuye kuli muli Kilistu Yesu. ¹⁴ Ngue vyuma evi njina thono kuli yeni, njina tcelela njinja kuli yeni mualolo. ¹⁵ Vuno nga nji kalako ntcimbu, nji thona linga mu dhivuke vati vantu vana vuahela kupanga munjivo yaKalunga, yikeyo mbunga yaKalunga muka muono, ngundhi na chiyakelo cha vungulu. ¹⁶ Na kuno ko kua kele vimpata lihungu lya Kalunga lyakama: ''Yikeye uye ua yombolokele mu ntcitu ua thambuele mu Mpundhi Yakuyela, tungelo va mu muene, va muambuluile ha kati ka vaka vifuti, na ku mutambula va mu tualele muilu mu vungulu.''