¹ Ngocho vene nji ku mamuna ha ku livanga ngechiye ku kandelela, vilombela, ku hakuila na ku shangala va ka ku vipanga muomu vantu voshe, ² Muomu vimyene na voshe vali ku vukama, linga etu tu tumame na chivovo na ku holoka mu ku lemetha Kalunga na mu vu huanga vuoshe. ³ Echi chikecho cha kuvuaha cha yongola Kalunga muovole uetu. ⁴ Yikeye ayongola vantu voshe vovoke va hete ha ku dhivuka vungulu. ⁵ Muomu kuli Kalunga umo lika, na muka kukoletha muomu Kalunga na muntu, muntu Kilistu Yesu. ⁶ Ua lihanene yendi vavenya ngue fueto muomu voshe, ngue vukaleho vua vungulu. ⁷ Muomu vipanga evi vavi shovuele na kapostolo- nji mileka vungulu, kunja mikuithile- na mulongithi ua vaka Vifuti mu ku tcelela na vungulu. ⁸ Ngocho vene, nji yongola vamala mu nkala muhela mu ku lombela na ku yelula mavoko muilu aku yela kuyeneka vukalu ndi vimpata. ⁹ Ngechiye vene, vakentu vali dhengeye na vidhala, na shuama na ku litakametha ove vavenya, keti vinkambu vya kuvinda ndi olu ndi vihiho ndi vidhala vya ndando ya kama. ¹⁰ Vuno ngue vati vakentu va vuchili muomu va li tumbula vaka kulemetha Kalunga vipanga vya chili. ¹¹ Mukentu ali longethe na ku kuholoka na ku li kehetha. ¹² Kunja tavethele mukentu alongethe, ndi kutumina lyala, vuno aholoke kulu. ¹³ Muomu va pangele Andama ha kulivanga, umba Eva. ¹⁴ Keho Andama kova mukuithile, vuno mukentu va mukuithile na ku tambula ua viyithile mulonga. ¹⁵ Vuno yikeye akovoka mu ku thema vana va ka ku tcelela na liyango na ku litakametha ove vavenya.