¹ Belalu, malaikat kelime nyiup trompet da, ali aap kite erai ti sentomoi lotu ke langit ntong munan tana, ali ntong da na okoi kunsi luang kowang moko akut. ² Da nengau luang kowang moko akut, maka losek lei otut ke luang iro, nget otut ke tengku iye solai, ali mate olo nyang awan jaji denem leka otut ke luang iro. ³ Uli kero, ke suang otut iro losek lei deo paan ntong munan tana, ali dali na okoi kuasa nget kuasa kelewangu tei tana. ⁴ Ali, ntong dali na paket dian sa nenrusak kawan ikut tei tana, pengule-pengelaan, atawa kawan tonga kayu, beloh bali je dali iye beloh na segel Allah tei konat dali. ⁵ Dali sa na lewa dian munu dali, tapi dian nyiksa dali kengola 5 bulan; ali siksaan iro sama nget siksaan kelewangu kede da nyinget meresia. ⁶ Tei kede iro, meresia sagar ngeto pengedate, tapi dali sa ruku iye. Dali nyengkana mate, tapi pengedate ngeleong dali. ⁷ Leen kawan paan iro nget kawan kuda iye na tatap dian bulo; ali tei munan utek dali naan leen nget mahkota amas, wae dali nget wae meresia. ⁸ Balo dali nget balo bawe nyang kukut dali nget kukut singa, ⁹ ali dada dali nget karut besi, ali engan ilar dali nget engan kereta-kereta iye deo kuda iye temeriek ntong runa bulo. ¹⁰ Ali, ikui dali nget kelewangu ali naan singet iye, nyang tei suang ikui dali lei naan kuasa dian penare meresia kengola 5 bulan. ¹¹ Raja iye merentah dali iye lei malaikat kowang moko akut, iye suang bahasa Ibrani aran iye iye lei "Abadon", sadangkan suang bahasa Yunani aran iye iye lei "Apolion". ¹² Bencana iye pengeone apu lalo, tapi sengke naan 2 kenyaya bali iye sagar sulet. Trompet Keonum Mengan ¹³ Belalu, malaikat iye keonum nyiup trompet da, ali aap keringa engan ke keopat tanuk altar* amas iye naan tei hadapan Allah, ¹⁴ ngulek ntong malaikat keonum iye mege trompet iro, "Untis lei keopat malaikat iye na suruk tei sunge Efrat iye solai iro." ¹⁵ Maka, keopat malaikat iro, iye apu na tatap dian jam nyang olo, bulan nyang taun iro, na untis dian munu 1/3 meresia deo. ¹⁶ Keeh tentara dali bekuda iye lei 200 juta kedeo iye; aap keringa keeh dali. ¹⁷ Ali ngetro lei aap kite suang pengite* kuda-kuda iro nyang dali iye tuet tei munan iye; kawan iye nungang iye nunang karut besi bewarna mea dolan, biru denem, ali lemit nget welirang; ali utek kuda-kuda iro nget utek singa nyang ke bowa dali losek apui, otut, nyang welirang. ¹⁸ Ali ketolu iye lei 1/3 meresia na bunu; ali apui, otut, nyang welirang iye losek ke bowa dali. ¹⁹ Leka, pengegalak kuda-kuda iro naan tei bowa nyang ikui dali. Leka, ikui dali nget nipe nyang naan utek, nyang ali iro lei dali penyaya. ²⁰ Tapi, meresia iye selamat, iye sa kune bunu ene bencana iro, tetap sa betobat ke se pengkoe kami dali, mpe dali sa ahan nyemah roh-roh daat nyang berhala-berhala* ke amas, perak, tembaga atawa kayu; iye beloh tau kite, ngeringa, atawa ade malan, ²¹ ali dali sa betobat ke munu-mate, sihir,* percabulan, nyang dako-dalos.